Labik glai praong di glai tràm U Minh Hạ, bruk di “Palei glai Vồ Dơi” di Ca Mau – Eco hu brei mboh gheih mekre ka jaman mesuh metak. Oh padeih di bruk parang, labik jirah rivang ini hu padang sa majam sinh thai sajarah ngan haong dom baoh sang tong tabung tak gak praong labaih 20m2, hu ramik caga tui kapul piah brei mboh ka mbang mesuh metak di rahra jaman bahrau.

Amuk Ngô Huỳnh Trang, Yam ndok Labik jirah rivang sinh thai Ca Mau – Eco, brei thau labik hu buh prein yava tukvak nao duah dom urang meng jaman masuh matak nan piah thau piah ngak yau habar brei ka nyu yau biak di abih. Labik brei mboh hu ba mai bruk gheih karei saong daok hu makna pato megru ka rai uranaih. Hu dom urang daok payua alin kaya ndap nda piah daong padang palei glai praong U Minh:

"Langiu di bruk rik panuac ndom meyai biak hatai di dom mik wa dom cei anai hu ba drei tame mesuh metak di bhum palei, ye rilo mik rilo anai daok alin ndap nda kaya yau mik cei Phạm Lai praong thun umo oh mai tal palei dalam glai hu min hu payua alin phun ben hu tui cei labaih 40 thun tapa. Tapa nan, biak rilo mik saong anai di kapul Urang ngak harak mbao jeng alin dom thaik thaot ka drei piah daong parang, brei mboh veik palei dalam glai duh ka urang jirah tuai damuai".

Tinh Ca Mau daok hu 112 inem mek hu dak brei angan. Min, biak takik labik brei mboh veik hu chreih mekre hu dom yaom kaom ilamo, sajarah piah dui pachrei tuai damuai jirah yau di labik jirah rivang Ca Mau – Eco. Ong Ngô Vũ Thăng, Phaok Akaok UB Bhap bini tinh Ca Mau, brei thau lac brei patagok dom yaom kaom drap ar piah daong tame patagok kinh te – xa hoi:

"Tinh Ca Mau brei gam ngak khik ramik saong gam patagok yaom kaom di drap ar. Patagok jirah rivang brei thau sa dalam dom jalan siam lagaih piah ba Drap ar meng kein lagaih jeng yaom kaom siam gheih, pagam haong bhap bini."

Tinh Ca Mau urak ini daok hu 5 ndap nda kaya negar saong 8 drap ar oh mboh di meta hu tut brei angan. Abih di nyu nan lac, ilamu seni nghe thuat Don ca tai tu Meraong Negar – drap ar hu UNESCO mbaoh tangin – lac sa baoh asar banrik di tinh. Min, rilo drap ar di Ca Mau jeng daok lac “drap ar” tamo, oh ka biak jeng “ndap nda” hu yaom kaom tagok glaong.

TS. Bùi Thị Hoa, Akaok dhan Jabat Ilamo, Seni nghe thuat, Pahat padhih saong Jirah rivang bhum Meraong negar, cih tabiak dom “mata asar” rilo abih di nyu hu meng lac di drap ar bhum Đất Mũi taneh hujung luac di nagar: ndap nda daok gandi gandang, tuai damuai tok hu “ mboh di mata” oh ka hu “ba drei tame”, ha tang inem mek trun pakat, bruk pambuak chuoi jitvu daok oh ka pambuak. Taphia nan, bruk di bhap bini oh ka hu taduan saong patagok njauk.

Piah taoh talaih tavak tavaiy, amuk Hoa ndom mayai lac, brei salih bruk pandar drap ar, brei maong iek dom inem mek lac “drap ar diuk”.

"Rahra bhap bini njauk brei ngak bruk pasang iek, gam klah rabha bruk di drei, rilo meng lac brei hu mbang tui kein lagaih. Makna di nyu hu lac khol drei brei samar drah di gah ngak mbang pablei salih, dom gah hu pambuak piah jak ba prein khik ramik saong pasiam raidiuk di rahra bhap bini".

Tinh Ca Mau daok duah jalan langyah piah “pamedeih” majam drap ar kaya meda di drei. Piah bhum taneh Ca Mau hu jeng labik mai tal jirah ka drap ar oh klak hu, bruk ngak “drap ar daok tamo” jeng “drap ar diuk” daok biak khin hu. Taphia sa jalan kuhria patagok taong abih meng jabat chuc nang ye jeng biak khin yaok urang nghe nhan lac sa urang khik apui, yaok urang ngak jirah rivang lac urang khan dom kadha chreih mekre./.