Bruk baoh durian kan si pablei, yaom palei trun biar ieu lac janih susah duh hatai di urang ngak bein pala durian di Can Tho. Ong Võ Hoàng Tấn daok di xa Phong Điền pala 80 gok durian Ri6. Thun ini jien blei khak tagok meng 200.000-300.000 dong/kadung, jru caga phun kayau jeng tagok, ngak ka bruk pala phun durian di sang ong buh tagok labaih sa trieu dong. Min, yaom durian meng tukwak blaoh trun ralo dut tui thun dahlau, ngak ka ong jeng ye dom urang ngak bein susah duh hatai. Ong Võ Hoàng Tấn khan brei thau lac: "Thun blaoh pablei lima pluh, nam pluh ribau. Thun ini di dalam bein pablei hu dua pluh, dua pluh lime ribau dong, oh hu laba. Sang ngak bein khat di abih."

Ngan haong 50 gok phun durian Ri6 labaih 10 thun, dom thun dahlau durian hu yaom ong Nguyễn Văn Tiến daok di xa Phong Điền hu jien glaong ralo. Min meng akaok thun tal ini yaom durian trun biar ngak ka ralo susah brei ka urang ngak mbang. Musiam bilan ini durian di sang ong Tiến mada paik hu labaih kurang 5 tan baoh, kayua urang blei yaom biar yau nan ye ong ba nao pablei barat hu 2 tan. Adit blaoh baoh durian tagok yaom hu hasit sarak, mboh bui sambai dalam hatai min tapi dom harei meng blaoh yaom baoh durian gilac trun.

"Dom harei dahlau mboh yaom nyu tagok ini gilac trun yaom abih. Trun 5, 7 ribau brei ka sa kilo. Urak ini bayar 25 ribau brei abih nyu lac yau nan. Nyu oh kuria baoh durian lek hasa, nyu blei yau gauk taong abih. Pablei aik biso langik tasik, hu yaom 30 ribau ye jeng do jien phun gilac mai phun jien klak, daok 25 ye khat lahik. "

Urak ini taneh pala phun durian di taneh Can Tho tagok jaik 14.500 ha, dang yang ka 2 di dom taneh pala baoh di bhum taheh ban raya Can Tho hadei di pala phun panat.

Piah daong ka urang pala phun durian, So Kong Thuong ban raya Can Tho peih ngak “Adit glaong pablei durian thun 2026”, gam saong ralo bruk ngak blei pablei, yaih khan jeng ye pachreih blei salih gam tapak gam tapa online. Danak dak daok yam tal brei daong pablei baoh durian sang bein, HTX jeng ye urang ngak mbang blei salih di bhum taneh Can Tho; pagam pambuak saong labik blei salih, pasar raya, jabat pablei salih meng online, urang blei, urang ngak dan saong urang pablei tabiak langiu ngar. Ong Hứa Trường Sơn- Phaok Yam ndok So Kong thuong ban raya Can Tho, brei thau lac:

“So Kong Thuong pambuak bruk saong dom gah dhan jeng ye di dom xa, phuong, dom akaok darak pasar blei tame jeng ye di ban raya Ho Chi Minh dan saong Ha Noi padang bruk ngak daong blei durian ka dom HTX, kapul pambuak bruk dan saong dom baoh sang urang ngak nong, dalam nan njauk caik hatai brei ka yaom blei daong ka mikva urang ngak nong hu jien tame ralo. Khol dahlak janji hapah tal bilan 6 thun 2026 ini khol dahlak mada blei bih 36.000 tan durian ini."

Bruk peih ngak gam gauk saong bruk pambuak dom labik blei, pachreih bruk blei salih jeng ye tut tangin tame blei brei mboh bruk caik hatai di Can Tho dalam bruk daong urang ngak bein yam tapa kan kandah urak ini. Patui di nan, oh sa janih daong Pakaro akaok pablei tabiak blaoh daok khik kajap karo brei ka urang ngak nong hu prein ba gah durian di ban raya tagok karo kajap, di dom tukvak meng anak./.