Dalam baoh sang sit di palei Brang, xa tapen negar Ia Púch, adei Nguyễn Ngọc Minh Tâm tani tanat dak tapuk siphau , khan ao saong dom kaya angui tame bac kadung. Thun ini tagok tal bac 7, adei Tâm lac mbang akaok meti atah di sang, gam daok gam bac saong tal harei puac adit meng hu mai sang. Thun bac bahrau, yam tame sa labik bac magru hu bahrau taong abih, hu kein lagaih ka bac magru, pasram, bui me-in ngak ka adei Tâm biak chreih chrai.

“Kamuan biak chreih chrai tame thun bac bahrau kayua kamuan meda hu bac rilo ilamo, rilo mon bac saong hu tukvak piah bac kadha, tuk oh thau ka dom kadha bac, kamuan meda tangi sua tapak cei gru blaoh oh khin cang tal harei hadei. Langiu di tuk bac magru, khol dahlak daok meda ba drei tame, nao trun gilang tapuk duah tapuk atau biar harei nao me-in balaong balau cau long, caoh balaong. Nan lac tukvak biak bui sambai.”

Thun bac ini, dua anek di ong Rơ Mah Ca, urang bangsa Jrai, daok di palei Chư Kó, xa Ia Púch, jeng tame bac gam daok gam bac. Diuk pasang ong lac urang kuah katak kasu, bhian srap gap mai sang piah dil samu ba anek nao bac. Ong Rơ Mah Ca chreih chrai brei thau, Thau phol Ndang saong Karja hu padang sang bac praong laneing lanoi. Urakni, tuk dom anek hu mbang daok, bac magru saong me-in di sang bac meng akaok adit tal puac adit nan diuk pasang ong biak sahnang hatai:

Sang bac Pho thong gam daok gam bac pambuak pakat Tieu hoc saong THCS Ia Púch thun bac ini hu 752 anek saih, hu ramik dak jeng 23 baoh tal bac. Gru Trương Duy Hồng, gru pato di sang bac brei thau, bruk pandar sang bac gam daok gam bac jeng brei ka gru pato salih bruk peih ngak saong pasang iek anek saih.

 “Dom gru pato dang pan tal bac hu nyaom amaik ame, payua harak ka amaik ame ndom meyai ka bruk ngak di sang bac gam daok gam bac saong gam daok gam bac meteh harei. Rilo amaik ame biak sahnang hatai. Kayua dom urang nan thau ka sang bac bahrau biak praong, hu ginup bruk di sang bac, labik me-in, mbang huak, padeih padei, biak siam makre”.

Dalam thun ini labik gah Pei tinh Gia Lai hu 7 baoh sang bac dreih gauk hu ba tame pandar, raok anek saih di dom xa tapen negar tame bac. Ini lac salih njauk caik ngan haong labik tapen negar gah Pei Gia Lai, labik hu labaih 90km jalan tapen negar, rilo mikva bangsa takik daok, daok rilo kan kandah. Gam haong bruk bahrau, anek saih hu bilik bac, labik puac tapuk, me-in padhih saong hu makna jang, bruk bac di dom adei hu khik karo tani tanat.

Ong Phạm Văn Nam, Yam ndok So Pato Magru tinh Gia Lai brei thau, dom sang bac gam daok gam bac pambuak pakat brei daong dui katut bruk pato magru di bhum tapen negar haong dom labik hu lagaih jang, gam haong nan brei gru pato di labik dalam bhum.

“Sang bac pho thong gam daok gam bac pambuak pakat di dom xa tapen negar biak hu makna. Dom adei brei hu sangka, raong pabam tani tanat, abih hatai tian piah hu kein lagaih bac magru siam jang, daong salih jalan sahaneng. Dom sang bac ini brei pato pakai ka urang ngak bruk ilamo pakat glaong piah hadei ini dom adei mai duh ka bhum palei drei, daong patagok kinh te – xa hoi bhum palei.”

Gam haong anek saih dalam negar, harei ni, anek saih bhum tapen negar tinh Gia Lai jeng tame bac magru, mbang daok saong pasram dalam sa labik bac magru samu gauk. Sang bac gam daok gam bac bahrau oh lac sa janih kein lagaih bac magru harei ni, blaoh nyu daok lac labik daong, peih chiaok par di harei hadei ka uranaih bhum tapen negar di bhum palei ./.