Di Pasak Duh bruk karja xa Ea M’Droh, tinh Dak Lak yaok harei di urang jakar, urang pan bruk brei langyah yaok rituh mbang harak hal di dom nen tang so. Meng bruk taduan harak gal online, pabak du lieu, langyah harak gal karja tal bruk tacei ba rahra pandar jitvu karja, rilo di nyu njauk ndom mayai lac bruk urak ini jeng hu ngak di labik ndien tu.

Ong Phạm Trung Kiên, Phaok Akaok UB Bhap bini xa Ea M’Droh brei thau, bruk harak gal meng online di bhum palei urak ini mek hu labaih 75%; bruk mek jien adat jeng dak harei dak salih tapa bayar oh meng jien mbaok. Min, gam haong bruk patagok bruk ngak di labik taka so, caong khin hu paglaong prein ngak kong nghe khau tin ka kapul urang jakar di bhum palei dak harei dak njauk samar chip.

“Jabat hu ba tabiak jalan ngak, pandar kapul urang jakar, kong chuc urang pan bruk di pakat xa srap gap bruk ta-eng bac, ta-eng roh duah piah paglaong ilamo chuyen mon, ilamo bruk ngak. Gam haong nan, bhum palei jeng peih dom tal bac pasram salih lek taka so ka urang jakar, kong chuc. Min, dalam luac jalan peih ngak jeng daok dom kan kandah di nyu.”

Thau mbiah urang ngak bruk lac asal kadha hu makna dalam bruk patagok ilamo ngak kong, salih bahrau hadah krah saong salih lek angka taka so, Dak Lak daok paglaong bruk pambuak pagam jabat pasang iek, gah ngak mbang pablei salih saong dom labik pato pakai. Dalam nan, Sang bac Dai hoc Tay Nguyen ieu lac sa dalam dom labik hu makna pabak urang ngak bruk ka tinh. Ong Nguyễn Thanh Trúc, Akaok Sang bac Dai hoc Tay Nguyen brei thau:

“Sang bac Dai hoc Tay Nguyen daok kham marat salah blaoh dom kein lagaih piah jeng labik pato megru dai hoc hu makna ka bruk pato pakai urang ngak bruk ilamo glaong ka bhum Tay Nguyen tui Sarak Quyet dinh 671 di Thu tuong Rajaei. Sang bac srap gap klah rabha urang ngak bruk saong prein pato pakai piah pabak hatai caong parilo urang ngak bruk di dom bhum palei, labik dalam bhum”.

Dak Lak urak ini hu labaih 4.500 urang ngak bruk ilamo khoa hoc saong kong nghe. Min, kapul urang ilamo dalam dom gah yau ye glo akaok tri tue manuac urang, du lieu baoh kadha praong, ndien toan patih gai taginum atau ilamo ngak kong sinh hoc jeng oh ka pabak hatai caong khin patagok dalam tukvak bahrau. Kayua yua nan, bhum palei daok peih praong bruk pambuak haong dom jabat roh duah, sang bac dai hoc saong gah ngak mbang pablei salih dalam bruk pato pakai, roh duah saong salih ilamo kong nghe, pamaong tal bruk padang kapul urang ngak bruk ilamo glaong duh ka dom gah brei caik dahlau. Ong Bùi Thanh Toàn, Yam ndok So Ilamo Khoa hoc saong Kong nghe tinh Dak Lak brei thau:

“Khol dahlak hulin brei patui peih dom danak dak pato pakai, bac pasram, pabak ilamo urang ngak daok bruk. Langiu di nan, bhum palei brei ndom biai ka dom jalan langyah piah dui pachreih urang ngak bruk ilamo glaong meng langiu. Khol dahlak hulin jeng pambuak catang haong dom gah ngak mbang pablei salih vien thong, kong nghe khau tin piah jak ba kapul urang ngak ilamo ky thuat, urang ngak bruk kong nghe khau tin daong bhum palei dalam luac jalan ngak salih lek angka taka so”.

Dalam bruk salih lek taka di daok rah tabiak biak khang, bruk padang urang ngak bruk ilamo glaong oh lac hatai caong khin di anak meta blaoh daok lac sa bruk brei lagaih ka patagok suai atah di tinh Dak Lak. Bruk pambuak khang catang di jabat pasang iek, co so pato pakai saong gah ngak mbang pablei salih hu caong khin ngak jeng urang ngak bruk pabak hu hatai caong patagok ilamo khoa hoc kong nghe, salih bahrau hadah krah saong dom jalan ngak patagok di bhum palei dalam tukvak mai meng anak./.