Yaok tal harei puac adit, dalam sang bhap bani palei Puăn, xa Ea Phê, tinh Ndak Lak, sap chieng yava tagok ralai pagam haong sap tacei pato di urang ma-in gheih tangin. Sa binah sang bhap bani nan lac dom adei sit mbang akaok mereip pal gai taong chieng. Binah daok nan hu lac dom urang gheih tangin dalam palei daok bac megru dom kadha chieng meng kan piah ma-in ka nyu gheih siam jang, ginup sampurna jang.

Sa gah lac sap chieng di dom tangin daok gila, gaok mada tuk mai nyu balait ragu ragam. Di sa gah karei, dom urang main gheih tangin rilo thun pambuak pagam haong kong caing jeng pamedeih gilac dom kadha caing bhian randap. Adei Y Lisan Kbuôr, 13 thun daok di palei Puăn, khan lac:

“Meng dahlau mai anek oh ka hu bac megru gong, caing, harei ini hu mbaok tame bac mboh biak bui sambai, caong khin bac megru kong caing piah hu mbaok tame kapul nyaom caing.”

Urang dang akaok hu angan Nghe si uu tu Y Phôn Ksơr. Sang daok di phuong Mbuan Ma Thuot, min tuk hu gah ilamo daa ma-in, ong oh huac kanda nao jalan atah labaih 40km piah tal sang bhap bani di palei Puăn, xa Ea Phê dalam dom harei puac adit, pato dom hagait blaoh drei pataom mek hu piah khik tamik yaom prong glaong di mukkei. Nghe si uu tu Y Phôn Ksơr khan brei thau, kadha blaoh ong huac kanda abih nan hu lac bruk khik ramik chung ragam sap caing oh hu pato njauk jalan, njauk ilamu.

“Ini lac jalan piah ka drei pato tacei taong dom hagait blaoh drei thau, kayua lac yaok bhum palei ye hu sa jalan taong karei di gauk, jalan ma-in pachreih karei di gauk min dahlak caong khin lac kadha ngak kakai thei jeng thau. Tuk peih pato kong caing ka tal ranaih ye njauk pato saong abih gu yau di nyu, kuhria gam caing Knah, gam haong yau gu hagar di nyu, gu yau ciang C’har piah taong abih dom kamuan, dom adei, dom urang gheih tangin thei jeng thau.”

Ini lac sa di dalam 3 tal bac pato tacei kong, caing hu So Ilamo, padhih saong rivang jirah tinh Dak Lak peih ngak dalam tukvak he piah ba bruk pacang khik di dalam bhap bani.

Tui So Ilamo, Padhih saong rivang jirah tinh Dak Lak, hadei di tuk tinh patabiak Sarak 03 brei ka bruk daong pacang khik saong patagok yaom ilamo kong caing, gah ilamo daok tacei pato ka dom puk palei ba tabiak danak dak bruk ngak, buh tabiak jien padai, manuac urang piah ba dom sarak tame dalam rai diuk.

Meng bruk daong tacei pato kong, caing, peih ngak bruk pacang khik ilamu mbai choi tal padang ngak harak gar dom inem krung bahrau, Dak Lak daok dak yam dak ba dom bruk ngak pacang khik ilamo meng kan brei ka bhap bani. Jalan ngak nan lac oh padeih di bruk khik ramik inem krung, blaoh daok palaghaih piah ka dom yaom ilamo hu peih ngak saong pato tacei gilac dalam rai diuk.

Min lac, pacang khik ilamo meng kan oh lac sa janih caong pambak tame dom tal tacei pato atau dom danak dak katut panak. Ini lac bruk ngak atah dhua, caong khin hu bruk nao gam di taong abih danak bruk chinh tri. Ong Y Nhuân Byă, Phaok Akaok UBND tinh Ndak Lak brei thau, Sarak 80 nan lac labik pambak prong piah ka puk palei dak padang danak dak saong brei buh tabiak jien padai brei ka bruk pacang khik ilamo meng di puk palei.

“Sarak 80 ieu lac Sarak yau ye ghang jameng asar, biak cambaih laih piah ka khaol drei peih ngak bruk khik ramik asal ilamo dalam dom inem krung oh mboh di meta yau kong caing saong dom janih karei, asal kadha ini jeng njauk kuhria ye brei ngak dahlau, hu danak dak peih ngak cambaih laih, parabha ka dom jabat”.

Tui tinh Dak Lak, ngak brei cambaih laih Sarak 80 oh lac janih peih dom bruk ngak pacang khik, blaoh daok palaghaih piah ka yaok puk palei, yaok urang gheih tangin saong rai rah dam dara hu jeng urang ngak di vaktu khik ramik asal ilamo, palaghaih jang piah ka inem krung hu khik ramik mai meng asar gok hatai di bhap bani./.