Dom harei tapa, khaw tin ka bruk hu mbaok sa taneh kabo kapul nyaom dom urang ngak bol lin dalau diah, bhap bani klak rup dalam mbang taong praong tame saong brok tagok Akaok thun thak Kra 1968 di mblang bein Lê Thị Riêng (TP.HCM) hu pachreih bruk sangka biak karei di manuac sia. Min takik thei thau tal, gah likuk dom panuac pataom pagun akaok mereip di dom jabat karja harei ini nan lac vaktu jak 8 thun gam giải mã dom harak gar dak rai sajarah, akaok mereip meng klau blah thaik binguk mesruh metak oh hu angan je hu diah mboh angaok internet.

Mai meng dom kadha brei thau di dom calah di gauk yaom lac, dom urang roh duah, urang hu mbaok dak rai sajarah hu daok haong gauk piah pagam pambuak dom hatai saneng mboh daok talaik veik piah duah tabiak inem sa labik dar caik kapul nyaom hu mong yau labik padeih padei di yaok rituh urang dahlau diah ngak bol lin, bhap bani.

Kiến trúc sư Nguyễn Xuân Thắng, urang daok dalam Kapul nyaom daong baoh sang urang dahlau diah ngak bol lin Việt Nam brei thau, puac thun 2018, ong mong mboh hu sa blaih thaik binguk juk mbong angaok internet. Dalam blah thaik nan lac sa uranaih dang taphia sa lubang taneh dui atah, gah ala hu biak rilo rup tau  daok cang dar lam. Meng sa blah thaik oh hu angan je, ong mek tangin tame bruk  duah thau ka dom inem nan. Mai meng dom kadha yaom lac biak mboh bhian hu jeng gai peih peih tabiak kadha oh thei thau daok lam dar jaik 60 thun.

“Njauk rilo thun hadei di nan, dahlak meng duah mboh thaik binguk ka dua. Saong kadha njuak ndom nan lac tuk khaol dahlak duah hu sa blah thaik binguk sambo di hãng thông tấn AP. Patuah jamo dalam talei akhar cih dalam blah thaik binguk, nyu hu vak cih cambaih blah thaik binguk di harei 12/2/1968, tuk dom urang ngak di Sài Gòn daok lam urang ngak bol lin dalau diah saong bhap bani dalam talei lubang ka klau. Nyu hu ndom mayai cambaih lac talei lubang kabo ka klau”.

Nyaom urang ilamu hu pasang iek tani tanat yaok blah harak gar pambuak pagam tal bruk kadha. Nan lac biak rilo janih harak gar dak rai sajarah, dalam nan hu rilo harak gar dak rai sajarah pambuak pagam tal Amirik saong Phrang khik piah, pabak brei. Langiu di nan, nyaom daok pataom mek hu dom harak gar pambuak pagam tal bruk pataom mek urang ngak bol lin dalau diah dalam mbang masuh thun Mậu Thân di Sài Gòn - Chợ Lớn … Puac abih, taong abih dom harak gar jeng brei thau ka sa labik nan lac – mblang bein Lê Thị Riêng di Quận 10 klak, TP.HCM.

Meng dom panuac dak khan di dom urang hu mbaok tuk nan, pambuak haong dom harak gar ilamu, nyaom roh duah jeng duah hu dom labik njauk caik hatai. Tui kadha pataom mek hu di mbang roh duah hu Quân khu 7 khan brei thau di nyaom biai bahrau ini, hu takik abih 5 talei kabo kapul nyaom urang dahlau diah ngak bol lin dalam mblang bein Lê Thị Riêng.

Thiếu tướng Trần Chí Tâm, Phaok Chính ủy Quân khu 7, Akaok Mbang tacei pato 515 Quân khu 7 brei thau dom urang bonlin dalau meda hu lam di labik ini, biak ralo mada meng 900 – 1.000 urang.

“Urak ini, dua labik mboh biak hu yaom prong dalam nan hu phun min Phrang saong bimon aia dalam dom blah thaik binguk dalam harak gar jeng daok. Dua la labik ini lac asal kadha piah ka khaol drei peih ngak dom jalan ngak patui. Urak ini hu brei thau cambaih 5 talei kubo. Dalam nan, cambaih di abih nan lac 2 talei kubo kapul nyaom; 3 talei kubo daok veik njauk patui veik bruk taong yaom.

Jaik labaih kurang 60 thun tapa blaoh, rilo inem mek mesruh metak njauk tukvak saong đô thị hóa brei palahik. Min tapi mai meng bruk njauk ngak di drei, meng dom blah pambuak pagam khaw tin klaih klaoh calah caluan di klau blah thaik binguk oh hu angan je, gam haong yaok ribau blah harak gar saong kadha kanar hadar di dom urang hu mbaok di tukwak masa tuk nan, dom baoh kadha gandi gandang dak harei dak ngak brei ka nyu hadah hadai cambaih laih jang bruk hu mbaok di talei kubo kapul nyaom daok kreh hatai TP.HCM. Anak tal,  jeng daok biak rilo bruk njauk ngak, min jalan ba dom sa-ai bijak anh hùng dahlau diah ngak bol lin dalau diah mai pataom gauk saong ayut sahabat, bhummi saong baoh sang hu mboh cambaih laih di anak meta./.