Lai Thieu hu ieu lac bhum negar baoh kayau hu angan di bhum Pur Meraong negar. Min, tukvak ngak ban medin samar daok ngak ka dom bein phun mangut dang anak bruk lahik abih angannyu.

Meng labaih 600 ha tuk ngak mbang hu, tal ini dalam bhum taneh pala mangut daok 275 ha, rilo meng lac di labik xa An Sơn saong phuong Hưng Định (urak ini daok di phuong Thuận An, Ban raya Ho Chi Minh). Dom labik danei angan yau Bình Nhâm, Lái Thiêu klak urak ini lahik rahra binguk halui di janih phun hu angan ndih dalam top 50 baoh kayau hu angan di Viet Nam ini.

Khik hu phun pala di nyu biak kan paje, raong phun diuk karo ieu lac sa bruk kan kandah tuk dom sarak daong meng tuk daok tinh Binh Duong klak hu abih tukvak pandar meng thun 2022. Amuk Nguyễn Thị Thu, hu labaih 1.500 m² taneh pala mang cut ndom meyai lac:

“Gam tui asal kadha khik khik kajap bein phun pala hu angan di Thuận An, dom pakat dom gah brei roh duah hu sarak daong urang ngak nong yau khak drak (meng bau), atau daong tapak dom jien duh ka ngak bein phun mbang baoh".

Langiu di bruk naong trak ka jien padai, dom kadha ka bruk dak danak dak jeng daok ngak haluh hatai pagam haong bein phun pala di urang ngak nong.

Hu jaik 3.000 m² taneh pala mangut, hadei di tuk ein sa banah mbaok taneh ka danak dak jalan Vanh ndai 3 – Ban raya Ho Chi Minh, baoh sang ong Nguyễn Công Chinh tok daok gilac labaih 1.000 m². Nan min, ong meng mboh taneh sit daok gilac daok naong veik dua bruk quy hoach karei. Phun mang cut brei pala luac 20 thun meng brei baoh yamein. Daok dalam bruk quy hoach tuel, phu metai oh thei khin raong, khin pala bahrau kayua huac lahik abih. Ong Chinh ndom meyai lac:

“Dahlau diah pachreih taneh An Sơn ngak jirah rivang sinh thai, min meng tuk jit ruak COVID-19 tal ini oh mboh salih hagait. Danak dak miat blaoh rahra alah ngak, oh aval drah ye jeng suai urang jeng tayah bein salih bruk ngak mbang. Tui dahlak hulin, takik quy hoach veik, kuac kuah kraong ribaong bhian, pachreih urang ngak nong ngak mbang meng dom sarak daong khak drak piah rahra sahnang hatai pagam haong bruk ngak bein.”

Di gah pasang iek di bhum palei, ong Nguyễn Thanh Sơn, Akaok UB Bhap bini phuong Thuận An ndom lac, khin daong mang cut Lái Thiêu ye brei daong meng “gok”, bo gok di nyu lac halau ia.

Mangut ieu lac janih phun pala biak kan taneh gam saong ia; halau ia njom nerak, phun lahik prein saong mbuan drah metai.

Piah langyah kadha kan kandah ini, dalam tukvak masa 5 thun anak daok tal, phuong Thuận An brei caik dahlau labaih 280 ty dong (hu labaih meteh taong abih phun jien hu jao 500 ty dong) piah buh jien tame samu gauk ka majam kraong ribaong, kham merat pacang khik halau ia tuh. Ong Sơn brei thau:

“Bruk khol drei daok kurang abih urak ini ieu lac asar siam halau ia saong bruk dui ba tanut ia ndik piah kajap bruk tui ia, doang mikva patakik lahik prein yava. Tui sarak Quyet dinh 63 di UB Bhap bini tinh Binh Duong ka bruk daong khak drak, karja palei daok padang jalan ba tagok HĐ Bhap bini hu dom jalan dak ramik caga jien padai daong urang ngak nong ka khak drak, patagok janih siam ka mang cut hu siam lagaih ka baoh”.

Mangut Lái Thiêu oh sa janih lac phun ngak mbang kinh te, blaoh meng kan mai hu jeng mbaok meta ka ilamo di taneh saong urang Binh Duong klak. Dalam tuk langik salih karei, sa labik phun hijao Thuận An daok hu bruk lac “hala janji hijao” palagaih alam langik ka labik.

Anak dom bruk suhsah di rahra, ong Võ Văn Minh, Akaok UB Bhap bini Ban raya Ho Chi Minh, brei mboh oh meda luai ka bein phun hu angan patui daok khat kurang. Meyah khol drei padang hu sa jalan ngak lagaih piah khik ka hu bein phun mangut Lái Thiêu, ban raya srap gap brei tapa saong pandar dom co che, sarak hu angan piah daong phu jien, khak drak ka mikva urang ngak nong”./.