Phụng Hiệp, Ban raya Can Tho lac bhum taneh njom lakhun, taneh dhaong biar dahlau diah bruk mgak mbang di bilan ia ndik gaok rilo kan kandah, rilo di nyu hu lac mbang ngak padai Thu Đông. Dom thun jaik di ini hadei di tuk yuak padai He Thu, salih ka patui trun pajaih mbang padai Thu Đông (padai mbang pala ka 3) rahra salih tapa pala caraih, palao ikan tuk ia tuh sua tame hamu.

Ong Hồ Quốc Kế daok di puk palei Mỹ Phú khan, gam haong bruk pala caraih dalam bilan ia ndik, mikva duah hu jien mek tame, saong peih tabiak jalan ngak tabiak bruk ngak nong “patui langik”, karo kajap. Ngan haong labaih 1ha, thun blaoh ong Kế mek tame laba jaik 60 trieu dong:

"Ia bilan ini biak glaong, blaoh lakhun nyu o tuh nao halei hu kayua labik ini lac bhum taneh dhaong blaoh ia biak rilo ngak ka padai oh siam yau nan ye salih tapa pala caraih. Ye drei yuak padai bilan He Thu blaoh drei meng li-ua taneh blaoh pala caraih gilac. Drei ngak yaok thun nan blaoh ye mboh jeng hu lagaih lo. Kuhria jang mbang pala padai rilo, tagok dua mbang padai. Urak ini lac yuak padai yaok harei. Jeng yau drei jaoh ye gah ikak kaiy tame dut kilo. Meyah chroh bangu ye jaoh jaoh sa mbang meng 500kg tal 1 tan/1 hecta ini.”

Sa-ai Trần Văn Zen ruah pilih bruk raong ikan dalam hamu. Thun 2025 sa-ai palao 20kg ikan pajaih di 2ha. Hadei labaih 3 bilan raong, ikan pablei laba hu jaik 20 trieu dong. Thun ini sa-ai jeng palao ikan pajaih yau thun dahlau, kuhria tal abih bilan 10 saka ia bulan brei yuak. Sa-ai Zen ndom mayai lac:

“Meyah drei klak hamu thaoh ye jeng oh hu hagait, drei raong ikan hadei ini pablei ikan ye hu jien mek tame. Jeng yau drei ngak mbang pala He Thu blaoh drei palao ikan tame hamu. Drei palao blaoh tal harei drei yuak kuak, ta-eng ikan duah mbang di hamu ye drei oh brei mbang. Tal tuk drei katung ikan blaoh njuk ia trun pajaih Dong Xuan”.

Langiu di dom bruk pala patui langik dalam bila ia ndik, yaok thun urang ngak nong bhum pei negar daok cang ia mai piah taong mek ikan. Tuk dom mblang hamu hu ia rilo, rilo kaya kan dalam ia hu pataom mai, rahra palaik hanyol, vah ikan, padang dớn… piah hu jien mek tame. Sa-ai Tô Văn Út daok di puk Mỹ Thành xa Phụng Hiệp brei thau, yaok harei sa-ai hu jien mek tame meng labaih 100 ribau dong meng bruk taong mek ikan dalam bilan ia ndik:

“Jhul jeng rilo thun paje, maong hatai blaoh thau ikan kuak atau ikan caklait. Ikan kuak ye tagok hatai sit. Ikan kuak phi ye tagok hatai praong bo tagok gluh rilo. Ikan caklait ye nyu tagok gluh takik bo hatai sit sit rilo lo. Patui yaok var, dua rituh dom jeng hu bo klau rituh dom jeng hu. Bilan 10, bilan 11 lac ikan rilo lo”.

Xa Phụng Hiệp lac bhum taneh dhaong biar saong njom lakhun trak, di bilan ia ndik bruk trun pajaih padai Thu Dong siam lagaih oh glaong. Kayua yau nan ye, xa Phụng Hiệp hu jak ba mikva salih bruk pala drak, srap gap lagaih haong langik. Urak ini mikva pandar kein lagaih taneh dhaong biar piah pala caraih, njam thuy sinh pambuak raong ikan… ba mai siam lagaih kinh te glaong. Ong Hồ Văn Ửng- Phaok jabat Kinh te xa Phụng Hiệp brei thau, pasak di dom bruk ini lac hatai sahaneng “patui langik”.

"Di bhum ini lac taneh njom lakhun nan njauk ndom tal lac phun caraih ye nyu lagaih haong bhum taneh ini rilo jang. Nan meng nan lac mikva salih biak siam. Langiu di pala caraih, raong ikan ye dalam bilan ia ndik nan, mikva urang ngak nong ye jeng pala biak rilo dom janih phun lagaih haong bilan ia ndik yau pala ấu, njam nhút, bangu phao súng… Meng nan lac mikva hu jien mek tame yaok harei jeng yau yaok bilan jeng biak tani tanat.”

Bruk salih jalan pala gam haong dom bruk ngak mbang duah jien karei dalam bilan ia ndik di xa Phụng Hiệp daok ba mai siam lagaih, daong urang ngak nong pandar kein lagaih piah parilo jien mek tame sang. Ini jeng lac jalan nao njauk lagaih brei patui veik hu sangka, peih praong, daong patagok gah ngak nong karo kajap, paglaong raidiuk rahra bhum dhaong biar, njom lakhun tui jalan sahaneng “patui langik”./.