Di rilo baoh sang baha Khmer bhum taneran kraong Cuu Long, tal bac hu peih yaok bilan padeih pandiak, sap puac akhar di anek naih dalam tal bac mboh sameng. Dang tal pato lac dom “gru pato” karei, oh angan gru dalam karja bien che, oh hu jien bilan, oh tamat sang pato pakai bruk pato halei, min hu pabam yaok baoh akhar huruh, khik yaok ilamo ka rairah uranaih sit.

Sa urang di dalam dom uraih naih gheih hu sa-ai Đinh Sô Van, daok di xa Tài Văn, Ban Can Tho. Sa-ai hu rilo thun tui bac di dom sang baha Khmer, hadei di oh daok ngak acar, mai tame raidiuk bhian yau urang menuac karei. Yaom lac jal val haong raidiuk min sa-ai jeng caik tukvak piah dang tal pato akhar huroh Khmer saong Pali ka dom acar gam haong anek kamuan tui agama Bhat di sang baha Prek on Đơk, xa Nhu Gia, ban Can Tho ndom meyai lac:

“Khol dahlak hulin oh lac urang jakar pakat karja. Hadei di tuk oh daok ngak acar, dahlak hulin khin caong mai gilac sang baha pato sap Pali saong sap Khmer yau sa bruk bayar phol dhar mikva tui agama Bhat. Langiu di nan, dahlak hulin khin pathau khan agal, kadha Bhat, hukum di Karja saong bruk daok dang siam mekre, daong khik an ninh siam mekre dalam bhap bini. Dahlak hulin jeng caong khin dom adei sit meda puac hu akhar huroh Khmer saong thau veik ka ilamo bhap bini di bangsa drei. Dahlak hulin biak bui sambai kayua hu ngak bruk ini; yaom lac hu jien atau oh hu, dahlak jeng srap gap hatai, maong nan yau sa bruk daong ka phum srok dak harei dak bui sambai”.

Daok ngan haong sa-ai Sơn Sa Vết daok di tinh Vinh Long ye maong bruk ba drei tame bruk pato akhat huroh Khmer ka anek bik drei di sang baha Chong Top, xa Song Lộc yau bruk ngak di drei daong khik ramik sap ndom saong akhar huroh di bangsa. Sa-ai Sơn Sa Vết ndom meyai lac:

“Tal bac di sang baha daok oh ka hu ginup ndap nda kaya bac magru, in anek naih chreih bac saong dom gru pato jeng buh abih hatai tian, nan dahlak hulin dak khin khik tani tanat. Dahlak hulin kham merat ramik bruk ngak di drei piah caik tukvak ka tal bac. Yaom thau lac ini ieu lac sa bruk ngak oh hu jien bilan, min hu daong khik ramik sap ndom bangsa ngak dahlak hulin mboh biak hu makna. Tok khin dom tal bac ini hu khik tani tanat biak suai atah”.

Dom cei gru oh hu angan je meda oh hu tapa pato pakai bruk pato, min hu sa bruk yau gauk: dom urang nan thau tani tanat bruk hu makna di akhar huroh Khmer gam saong ilamo, adat cambat saong raidiuk di mikva.

Tui dom ong acar dang akaok sang baha, sang baha tuk halei jeng srap gap brei kein lagaih piah ka tal bac hu peih tabiak. Yaom lac oh ka hu ginup ndap nda kaya duh ka bruk pato bruk bac, paban kik klak pak, ralaoh haluh, min hatai anit ranam di gru pato saong anek saih biak praong. Gru acar Chau Sua, po gru sang baha Tuôl Pra Sat, brei thau ka bruk di sang baha dalam bruk khik ramik sap ndom bangsa.

“Yaok thun, sang baha brei kein lagaih ka bruk peih tal bac, srap gap bilik bac, pasram vak piah mikva payua anek kamuan tame bac. Paban kik, ralaoh juk daok oh ka karo kajap min bruk hu makna abih lac hatai tian di dom cei gru oh hu jien bilan. Meng nan, akhar huroh saong ilamo Khmer bahrau hu khik tani tanat tapa rilo rai rah”.

Dom amaik ame hu anek bik bac megru akhar huroh Khmer, lac dom urang mboh tantu abih bruk siam gheih di tal bac ini. Rilo amaik ame brei thau, oh lac pato akhar, dom adei daok hu bac puac tapuk agal, duah thau ka adat cambat bangsa, thau anit ranam dom bruk siam gheih bo ong muk caik mai.

Gam saong bruk daok rah tabiak, tuk hu rilo ilamo bhap bini daok dak harei dak kurang, ye di dom baoh sang baha Khmer, yaok thun, dom tal bac sit jeng daok hu khik tani tanat meng hu hatai di dom gru pato. Dom “Gru pato” urang bangsa Khmer oh hu jien bilan, oh hu gaok kan kandah halei, tok hu sa bruk, nan lac hatai anit ranam brei ka sap ndom saong akhar huroh di bangsa drei. Saong dom “gru pato” oh hu angan je ini daok vak veik kadha khik ramik ilamo bangsa Khmer brei karo kajap saong gheih ghang di abih./.