Ong Kpa Liêm daok di mbon palei Hwing, xa Ea Hiao, tinh Dak Lak brei thau lac, urak ini sahaneng tal mboh cambaih bruk hu makna di jien brei mesraiy ngak nong – palei pala. Meyah yau thun 1997, ong hu brei mesraiy 5 trieu dong piah pala drak sit, jalan ngak lac patruh eik patrun kathaot, ye urak ini hu brei mesraiy tal 500 trieu dong. Phun jien ini hu ong buh tame ka 6,5 ha, pala hu jaik 7.000 phun kophi, 150 tan kophi, 10 tan durian saong 2 tan amraik kalu, jien mek tame labaih 3,2 ty dong. Tui ong Kpa Liêm, gam haong jien mesriay hu tagok, tukvak langyah harak gal jeng hu dui katut panak rilo meng salih taka so.

“Meng dahlau nao mesraiy brei lahik 3 harei meng mesraiy hu jien kayua harak gal suai kandah, brei nao mbaoh tra saksi, ala moi truong blaoh meng nao tal gilang pariak mesraiy hu. Urak ini samar drah paje. Kapul mesraiy phun jien di labik xa Ea Sol klak, var page pasang iek, biar harei tabiak gilang pariak ngak harak gal. Meda ndom mayai lac, dalam harei meda mesraiy hu phun jien, biak khang.”

Xa Ea Hiao hu 7.100 baoh sang, dalam nan hu mikva bangsa takik labaih 52%. Dalam quy hoach bahrau di tinh Dak Lak, Ea Hiao daok dalam bhum daong prein kinh te brei patagok kein lagaih ngak nong. Tui ong Huỳnh Văn Vịnh, Phaok Akaok UB Bhap bini xa, piah ngak lagaih quy hoach, phun jien brei mesraiy ka gah ngak nong palei pala lac hu makna di abih. Karja palei daok pambuak haong gah gilang pariak, brei kein lagaih ka rahra mesraiy phun jien:

 “Tuk mikva pambuak piah brei tut angan dom harak gal mesraiy phun jien, UB Bhap bini xa pato tacei biak catang ka Pasak Duh bruk harak gal karja saong Jabat Kinh te di xa pataom tame langyah harak gal di mikva dalam 1-2 tukvak lac blaoh. Ndom meyai gilang pariak brei ramik caik dahlau dom paok jien mesraiy, njauk ndom tal lac dom paok brei mesraiy laba lap, daong baoh sang kathaot, baoh sang mbang tui sarak saong mikva bangsa takik di bhum atah bayah hu mesraiy phun jien.”

Peih ngak sarak brei mesraiy phun jien gah ngak nong saong palei pala Dak Lak, Agribank ieu lac sa labik ba drei ngak dahlau. Tui ong Nguyễn Văn Tùng, Phaok Yam ndok Agribank Dhan Barak Dak Lak, ngak Sarak 55 di Rajaei saong gilang pariak pakat angaok ka jien brei mesraiy gah ngak nong, dom thun tapa, taphia pataom tame phun jien ka gah ngak nong, palei pala, chi nhanh sangka iek praong mikva bangsa takik bhum atah bayah hu phun jien buh tame ka ngak mbang, raong glang. Gam haong jien brei mesraiy, bruk an sinh rahra jeng hu labik sangka, daong rahra tani tanat raidiuk, patagok kinh te. Ong Tùng brei thau:

“Chi nhánh peih ngak 15 danak dak, sarak brei mesraiy phun jien laba lap, hu kein laba biar jang laba brei mesraiy bhian meng 1 – 2%/thun, brei ka tuai lac menuac urang, dalam nan mikva bangsa takik. Dom sarak ini biak rilo, meng sang daok, raidiuk tal bruk ngak mbang pablei salih gah ngak nong, pala drak, ikan hadang saong ngak jamraik… Kayua yau nan, patui hatai caong lagaih di tuai damuai, meda hu palih ruah lagaih piah mesraiy hu phun jien lagaih jang.”

Meng dom paok mesraiy lagaih, rilo baoh sang bangsa takik di bhum atah bayah tinh Dak Lak hu pok veik kein lagaih brei ka bruk buh jien tame ngak mbang, raong glang, dak harei dak patruh kathaot, uak drei tagok ngak meda. Phun jien oh ieu lac hu sa janih daong pasalih raidiuk yaok baoh sang blaoh daok daong patagok sumu gauk, padang mbon palei dak harei dak ginup meda. Ini lac sa dalam dom kein lagaih daong Dak Lak patagok samar, karo kajap dalam tukvak bahrau./.