Anai Gru bangsa K’Ho Ka Duys hu 6 thun pambuak pagam haong Sang bac THCS Tân Thượng, xa bhum atah bayah Đinh Trang Thượng. Pato Ngu van di sang bac rilo anek saih lac urang bangsa K’Ho, anai mboh sa bruk gak gar: rilo anek saih thau puac, thau vak sap Viet pho thong min gilac oh thau puac, vak sap bangsa di drei.

Mai meng bruk suhsah yau nan, thun 2022, hu Mbang Yam hieu daong prein, anai gru Ka Duys peih tal bac pato sap K’Ho akaok meti di sang bac haong 40 anek saih tal bac 7. Akaok meti lac pato akhar, hadei nan anai duah tal dom nghe nhan dalam bhum bac magru taong kong caing, tamia xoang blaoh ba dom ilamo nan tame dom bruk brei ka anek saih.

“Lac urang bangsa K’Ho tui dahlak mboh meyah oh khik ramik ilamo bangsa ye hadei ini nyu dak harei dak lahik kurang. Meng dom bruk ngak sit di dom ayut anek saih ini jeng lac dom apui piah dom adei meda thau hu dom ilamo siam gheih, dom adei meda mek dom ilamo nan dom adei khik ramik ilamo bhap bini di bangsa K’Ho”.

Di dom sang bac bhum bangsa takik di Lam Dong, rilo gru pato jeng daok duah bruk daong anek saih meng dom bruk ngak cambaih laih. Anai gru Nguyễn Thị Hương Giang, urang di Sang bac THPT Phan Đình Phùng, xa Đam Rông, ndom lac bac megru saong ngak tui jalan sahaneng, ilamo di Ho Chi Minh mai meng bruk ngak yaok harei: srap gap tani tanat kadha pato, anit ranam anek saih, abih hatai tian dalam yaok bruk pato megru saong oh padeih paglaong ilamo pato megru. Meng bruk kuhria, daong prein di anai gru Giang, thun bac meng blaoh dom adei anek saih kayua anai gru dang pato mek hu 9 yai anek saih naih joi pakat tinh gam haong 4 kadha mek hu yai STEM pakat sang bac:

“Drei hu hatai anit anek saih meng drei marat peih jalan ka dom adei hu. Tui dom anek saih kan kandah ye oh tok sa janih pato dalam tapuk bac megru blaoh dahlak daok ba anek saih nao bac megru tapak rah tui ar kraong Krông Nô piah dom adei bac magru hu dom sinh thai di labik ini, taneh riya, kraong ribaong. Dahlak sahaneng yaom lac hu kan kandah yau halei min anai gru saong anek saih jeng brei kacah pato saong bac megru siam saong bac biak siam”.

Tui dom gru pato di bhum kan kandah, anit ranam anek saih oh lac sangka tal yaok tanut. Nyu daok lac bruk duah jalan piah dom adei oh klak bac, daong dom adei di dom baoh sang kan kandah patui veik hu nao bac, brei kein lagaih ka anek saih bangsa takik khang hatai brei mboh drei.

Hatai nan jeng hu gru pato Nguyễn Quốc Huy, Bi thu Chi bo, Akaok Sang bac THPT Nguyễn Trường Tộ, xa Tân Hải, tui 22 thun ngak bruk. Tui gru Huy, bruk hu makna abih lac padang sa sang bac blaoh anek saih khin mai tal yaok harei. Meng bruk pasang iek, ndom meyai di urang jakar, gru pato tal bruk pang hatai caong khin di anek saih brei pamaong tal sa labik bac megru siam mekre.

“Wa Ho tuk halei jeng pato khol drei hu hatai anit ranam anek menuac. Sang bac haniem phol lac labik jalan sahaneng siam mekre hu ngak lagaih. Urang jakar pasang iek ye tuk halei jeng pang panuac ndom mayai patao kakei di gru pato. Gru pato ye thau hu hatai sahaneng di anek saih. Bac Wa Ho lac ngak sa labik dan chu labik dom sap ndom hu iek praong, nan lac gok agha di ilamo pato megru karo kajap.”

Di dom bhum mikva bangsa takik Lam Dong harei ini, sa tal bac sap K’Ho, sa var bac megru tapak di kraong Krông Nô, sa kadha STEM atau bruk kham merat daong anek saih baoh sang kan kandah patui bruk nao bac. Meng dom bruk ngak nan, dom gru pato daok daong anek saih hu khang hatai, hu kein lagaih bac megru saong raong caong takre. Nan jeng lac bruk di dom urang ngak bruk pato megru gindang pabam dom asar pajaih ilamo, daong pabak ka harei hadei di bhum taneh Lam Dong./.