Dalam dom harei ini, di sa banah mblang sang sa-ai Đổng Thị Mỹ Tiên urang daok di palei Hamu Craok, xa Ninh Phuoc, tinh Khanh Hoa (huyen Ninh Phuoc, tinh Ninh Thuan klak), dom tambok haluk gluh padang jeng mbuk, vil taom dan gam saong dom urang kamei daok mbeik lan jeng dom kaya angui gaok glah.

Nai Tiên brei thau, taong abih dom kaya kan gaok glah lan am Hamu Craok jeng hu dom urang ngak meng tangin. Tapa plak tangin di dom urang nghe nhan, dom kaya angui gaok glah lan am hu ralo bangu thaik thaot biak gheih ghang. Meng bruk jirah rivang dak harei dak tagok, dom kaya kan lan am di ini hu yaih khan praong dalam. Bilan Kate thun 2026 ini, hatai bui sambai di dom urang ngak gaok glah lan am yau hu tagok dua mbang kayua hu Harei raya lan am Cam Hamu Craok mbang ka I mada jaik peih mbaok.

“Lan cam urak ini patagok rilo thaik thaot lan ngak gheih saong pablei sỉ lac rilo abih. Bingun harei Kate ngak tabiak rilo jang piah pablei ka tuai damuai. Bruk urak ini lac ramik hacih sa-at sang danaok, labik parang piah srap gap raok tuai.”

Daok di HTX Lan am Lam Hamu Craok, dom urang gheih tangin dan saong urang ngak jeng daok jal val salah blaoh dom kaya bahrau piah duh tuai jirah rivang iek. Ong Phú Hữu Minh Thuần, Yam ndok HTX Lan am Cam Hamu Craok brei thau, Harei Raya Lan am Cam Hamu Craok mbang ka I rah tabiak njauk tame Harei Kate, nan HTX jeng patagok urang ngak gaok glah lan am:

“Ini lac kein lagaih piah bangsa Cam pambuak gauk, bac tangi saong jum tangin khik ilamo bhap bini. HTX jeng hu mbaok tame langyah ka jirah rivang bhap bini, yaih khan dom bruk hu angan je di bangsa Cam. Dom nghe nhan brei tapak ngak iek bruk ngak lan piah pambak makna di bruk khik ramik yaom kaom ilamo. Ini jeng lac bingun piah HTX ngak jirah rivang”.

Tui jalan ngak, Harei Raya Lan am Cam Hamu Craok xa Ninh Phước mbang ka I thun 2026 rah tabiak meng harei 10 tal 12/10, gam saong bruk pakat xa peih praong, hu bruk hu mbaok di dom bhum palei jaik taphia, dalam nan hu binah adat saong harei raya.

Amuk Chế Hoàng Thu Hảo, Phaok Akaok UB Bhap bini xa Ninh Phuoc bri thau, urak ini bhum palei daok pataom tame brei salah blaoh bruk ngak danak dak, labik parang, dom danak dak ba drei tame saong parang iek bruk ngak gaok glah lan am. Tapa raya adat, bhum palei caong khin iek praong dom yaom kaom di bruk ngak lan cam Hamu Craok saong dom urang daok khik ramik bruk meng tangin, hatai saong bruk hadah krah di drei.

“Harei Raya oh brei caik sa janih yaih khan kaya kan blaoh daok brei ka tuai damuai thau lac gah likuk yaok kaya angui ngak gaok glah lan am lac sa asal kadha ka ilamo, ka bhap bini saong bruk patui veik di rilo rairah. Tapa di nan, caong khin ba ndap nda ka angui ngak gaok glah lan am Cam hamu Craok nao tal jaik jang haong tuai damuai saong darak pasar, pambuak ilamo haong jirah rivang, peih tabiak kein lagaih pablei kaya kan saong brei bruk ngak karo kajap ka urang ngak bruk; pamedeih hatai mboh hadah mbaok meta, uranam bruk ngak kaya angui ngak gaok glah lan am dalam rairah urang dam dara daok sit umo”.

Tui UB Bhap bini xa Ninh Phuoc, tapa pasang duah ieik glang, urak ini dalam bhum hu labaih 151 urang ngak lan, 2 HTX saong hu labaih 100 labik ngak lan, baoh sang pablei salih hu mbaok tame ngak kaya, pablei dom kaya lan am. Thun 2022, UNESCO mbaoh tangin brei angan ka Bruk ngak lan di bangsa Cam Ninh Thuan saong Binh Thuan (dalau diah) tame Sarak angan drap ar ilamo oh mboh di meta brei pacang khik samar chip.

Piah apui di bruk ngak kaya angui gaok glah lan am urang bangsa Cam daok di palei Hamu Craok hu patui pato magru brei ka dom rairah, rilo urang gheih tangin jeng yau rilo mikva bangsa Cam di bhum taneh ini caong takre tame Harei Raya Lan am Cam Hamu Craok mbang ka I jeng danak dak ilamo yaok thun, daong ba kaya angui ngak gaok glah lan am urang bangsa Cam hamu palei Craok jeng sa bruk brei mboh ka ilamo – jirah rivang hu angan je di xa Ninh Phuoc, tinh Khanh Hoa./.