Karei saong dom thun dahlau, mikva urang bangsa takik daok di xa La Dạ, tinh Lâm Đồng (labik huyen Hàm Thuận Bắc, tinh Binh Thuan klak) hu sa janih ngak padai atau tangei, urak ini jeng di angaok mblang taneh apuh nan, mikva hu thau rabha njauk lagaih taneh piah srap gap trun pajaih rilo janih phun pala jang, gam saong jalan ngak lac parilo jien mek tame di angaok taneh di drei.

Pagap yau ye sang ong B’Đam Vương, ngan saong gam tui taneh apuh labaih 3 ha, sang ong Vuong hu pala 2 ha phun kaosu hu brei kuah mek katak rilo thun ini saong 1 ha phun baoh durian. Bein durian di baoh sang ong hu labaih 200 phun daok yam tame paik baoh jeng biak tani tanat.

Ong B’Đam Vương, xa La Dạ, tinh Lam Dong brei thau, hu bruk sangka di Ndang, Karja dalam rilo gah di raidiuk meng daong rilo baoh sang kan kandah uak drei tagok dalam raidiuk. Dalam nan lac hu Sarak 04 di tinh uy Binh Thuan dahlau diah, hu brei kein lagaih ka mikva bangsa takik hu taneh ngak mbang, hu limo piah raong saong hu phun pajaih piah pala.

"Di mblang taneh ini, dahlau diah baoh sang pala phun pa-aok blait, hadei di ini mboh rilo labik pala phun durian brei yaom jien glaong yau nan ye sang dahlak hulin jeng khang hatai salih tapa pala janih phun ini meng thun 2017. Tal tukvak ini, phun durian hu brei baoh paik akaok mbang pala daong baoh sang hu jien mek tame tani tanat meng phun baoh durian ini. Piah hu bruk ngak jeng ini lac sa luac jalan, ye drei brei kham merat bac magru”.

Gam saong bruk jao taneh, jao glai, daong phun jien brei limo… karja bhum palei daok jak ba mikva pandar ilamo jamariak bahrau brei ka pala drak, raong glang, pambuak saong dom gah padang dom tal bac pasram ilamo. Meng nan, rilo thun tapa, mikva urang bangsa K’ho daok di xa bhum ceik glaong ini hu trun khang taneh pala padai apuh, bruk ngak hu biar, salih tapa pala padai ia, tangei lai saong dom phun pala karei gauk ba mai jien mek tame tani tanat ka baoh sang. Oh lac jhul khang patagok kinh te, bruk pato megru di xa bhum ceik glaong La Dạ ini jeng hu sangka buh jien tame. Dalam 5 thun gilac mai, majam sang bac dom pakat bac hu padang khang kajap. Bruk anek saih dalam thun umo mai tal sang bac jeng hu tagok, bruk anek saih klak bac mateh dhih trun mboh rilo, rilo dam dara hu brei kein lagaih bac megru bruk ngak.

Ong B’Rông Thâm, xa La Dạ, tinh Lam Dong brei thau, meng “ine anek huruh akhar” anek kamuan bangsa takik di ini hu pasalih dalam jalan sahaneng, bruk ngak, meng nan daong tani tanat raidiuk di yaok baoh sang.

“Meng bruk caik hatai sangka di Ndang, Karja ka bruk pato megru di bhum ceik glaong, bhum urang bangsa takik blaoh tal ini dom anek kamuan daok di xa La Dạ hu nao tal sang bac ginup, oh daok bruk klak bac yau dahlau diah tra, amaik ame jeng caik hatai sangka tal bruk bac megru di anek kamuan drei rilo jang. Mikva thau ilamo rilo jang piah pandar tame bruk ngak mbang di drei”.

Xa La Dạ, ieu lac bhum taneh daok di ceik glaong di tinh Lam Dong, hu labaih 70% rahra urang bangsa takik. Dalam xa urak ini hu labaih 170 baoh sang kathaot saong labaih 210 baoh sang jaik kathaot. Urang par akaok di xa La Dạ brei thau, bhum palei daok duah jalan langyah patrun kathaot njauk lagaih saong bruk rah tabiak di yaok palei, yaok kapul urang. Bhum palei patui veik paglaong bruk daong ngak mbang, parilo bruk ngak tabiak, patagok bruk raong glang pagam saong pablei kaya ndap nda, peih praong bruk pato pakai bruk ngak, pasiam ha tang saong paglaong siam lagaih dom daanak dak daong daok dang mbang ngui ka rahra.

Gam tui dom jak jeng ngak hu dalam dom thun tapa, hu brei mboh bruk tagok oh padeih di sa xa dahlau diah kathaot rambah, oh sumu lagaih, suai patagok, urak ini hu salih bahrau mboh cambaih laih.

Mikva bangsa K’ho di xa bhum ceik glaong La Dạ, tinh Lam Dong hu biak sahnang hatai ngak mbang, dak harei dak jia tame Ndang, Karja nan ieu lac bruk karo kajap piah mikva patui ngak tabiak, dak harei dak paglaong raidiuk, gam saong gauk padang xa La Dạ dak harei dak cakrok patagok./.