Mboh njam bonbon biak lagaih ka taneh riya bhum palei, cakrok siam saong ba mai jien mek tame lagaih, kayua yau nan ye meng di akaok thun 2020, rilo baoh sang rahra di puk 4, xa Khánh An saong dom puk palei jaik taphia hu khang marat hatai salih taneh ngak padai oh siam lagaih tapa pala njam bonbon. Min, tuk pala praong rilo, kadha kuhria laik tame bruk theik ndong tuk taong abih pambak tame gah urang blei salih ikak kaiy.

Meng waktu jit ruak Covid-19 tamuh, sa-ai kamei Đặng Yến Như ngak bruk di Ban raya HCM gilac mai bhum palei, mboh mikva ngak nong rambah rambup glaih glar yuak kuak bonbon meng bhum dhaong blaoh gilac njauk gah ikak kaiy kateik yaom, sa-ai biak duh hatai. Tui jalan sahaneng hadah krah, sa-ai tapak ngak dom var livestream, yaih khan saong pablei kaya kan di dom nen tang mang xa hoi piah pablei ka kaya nong brei ka palei pala.

Mboh hatai tian saong prein ngak di sa-ai, karja palei hu jak ba sa-ai daok gilac bhum palei hu mbaok tame bruk di Ndoan. Di umo 28 thun, sa-ai klak tapa kein lagaih bruk ngak di ban raya piah daok gilac bhum palei, patagok kinh te gam haong mikva. Tal thun 2024, sa-ai kamei Đặng Yến Như hu palih ruah pok ngak Yam ndok HTX An Hòa, tal ini HTX hu patagok tal 68 urang dalam kapul. Sa-ai Đặng Yến Như brei thau:

“Meng tuk tame ngak bruk, HTX hu peih praong saong brei rilo kein lagaih ka akaok pablei tabiak ka dom kaya kan meng phun njam bonbon. Urak ini, khol dahlak pablei di dua kenh pasak: Ka sa lac kenh truyền thống tapa bruk pablei salih, tapa gah pablei sit; ka dua lac pambuak ba kaya kan tagok darak pablei salih online piah yaih khan angan je bonbon Ca Mau nao tal rilo tuai damuai pandar di dalam negar”.

Bruk pala drak pambuak “ala ia pala bonbon, angaok tamboh ar pala patei” di bhum palei hu daong mikva palagaih siam. Sa-ai Như dang tabiak peih bruk ngak, tacei ba mikva rahra ba kaya kan tagok darak taka so, gam haong di nan pablei abih kaya ka urang dalam kapul. Langiu di njam bonbon that saong bonbon ngak tamun masam, dom urang dalam kapul daok jhul khang bruk ngak patei thu, keo patei, mek patei.

Meng bruk khan yaih tui jalan angka sok, dom janih ndap nda kaya ngak nong oh daok di darak palei blaoh hu daok hu nao tal rilo tinh, ban. Urak ini yaok harei, HTX pablei labih 3 tan njam bonbon saong labaih 500kg tal 1 tan dom kaya ndap nda hu ngak meng patei. Amuk Dương Thị Nguyên, urang dalam HTX An Hòa brei thau:

"Mboh lac, phun bonbon ba mai siam lagaih brei ka bruk ngak mbang kinh te saong kein laba glaong jang dut saong ngak hamu, brei jien mek tame bhian yaok harei. Adei sa-ai kamei dalam kapul yaok harei nao ngak jeng duah hu meng 100.000 tal yaok rituh ribau dong. Meng jien mek tame tani tanat ini bo mikva di ini brei mboh pagam suai atah haong phun bonbon, min urak ini jeng oh daok ngak bruk hagait karei”.

Dak harei pandar ilamo ngak kong pambuak haong ilamo ngak tabiak lavik thun di urang ngak nong hu daong bhum taneh dhaong njom lakhun Khánh An salih drei. Bhum palei urak ini daok kuhria daong HTX An Hòa pambuak raong ikan di hamu, habao darang saong roh duah ilamo kong nghe ngak thu, ngak kaya dalam piah khik kaya kan hu suai jang. Sa-ai kamei Đặng Yến Như, daok brei thau:

“Biak anak mata di nyu mboh lac, bruk ini hu daong pabak hatai caong ka bruk patrun kathaot siam lagaih di bhum palei. Jalan ngak meng anak jaik tal di HTX hu lac brei patui peih praong taneh pala njam bonbon, gam haong di nan jhul khang jang jalan pablei kaya kan di dom darak pablei salih online piah ba kaya kan tabiak atah, brei akaok tabiak karo kajap jang”.

Di bhum taneh hu kein lagaih ka gah ngak nong yau ca Mau biak khin hu dom urang sit umo mbuan pandar ilamo khoa hoc, ngak kong saong salih taka so piah daong bluh tame angin bahrau, daong urang ngak nong uak drei tagok ngak kaya meda karo di bhum palei drei./.