Dalam bruk ngak mbang pablei salih tabiak langiu negar daok cuang kandah ka bruk duah labik pablei tabiak, rilo jabat ngak mbang pablei salih di Việt Nam daok duah jalan ngak mbang bahrau di dom darak pasar yaom lac takik caik hatai tal meng nan mai. Dalam nan hu nagar Ấn Độ caong khin blei tame baoh kayau nhiệt đới dak harei dak tagok glaong saong thanh long Việt Nam daok lac halaw pabak blei tame prong mai meng kein laghaih meriak gauk ka yaom kaom saong bruk pabak brei tani tanat.

Ong Võ Huy Hoàng, Akaok Công ty Cổ phần baoh kayau Hoàng Thọ, tỉnh Lâm Đồng brei thau, jabat daok peih duk lambaok di Mumbai. Meng takai juak di Ấn Độ, dom jabat ngak mbang pablei salih patui mong tal Bangladesh saong Pakistan. Ong Võ Huy Hoàng khan brei thau:

"Ấn Độ saong dom taneh aia nagar jaik taphia thei jeng caong khin blei baoh kayau di Việt Nam, min biak kan si blei tame hu kayua oh ka pambuak hu hatai caong khin haong gauk... Dalam tuk nan, ka sa di nyu hu lac Pakistan ngan haong bhap bani jeng labaih 300 triệu urang, nyu jeng caong khin blei tame rilo min njauk blei tame tapa trung gian meng Ấn Độ. Blaoh darak pasar Bangladesh jeng njauk tapa pabah mbang Ấn Độ... Tapa taong yaom, dom negar Nam Á hu caong khin baoh kayau biak prong".

Oh lac baoh kayau that, gah ngak tabiak jeng daok salih jalan ngak mbang dalau di anak dom salih bahrau dalam bruk ngak mbang pablei salih saong catang pandiak ka gah chính trị di Trung Đông. Tui ong Nguyễn Văn Hiển, Akaok HĐQT Công ty TNHH Chanh Việt, tỉnh Tây Ninh, jien xăng menyek, jien cước pajeng ba saong yaom akaok tame tagok glaong daok ngak brei khut khat jien laba dalam bruk pablei taiak negar langiu. Salih ka bruk pataom pren ka darak pasa atah, Chanh Việt brei ngak dahlau roh duah dom negar jaik taphia piah cakak trun jien logistics saong padam trun bruk khat lahik. Campuchia hu jeng labik hadah tanjak kayua hatai caong khin blei pandar tagok glaong saong bruk pambuak gauk nao mai dalam bruk pablei salih di dua gah hu tani tanat. Pambak tame labik tapain negar di Tây Ninh, công ty mbuan laghaih peih prong bruk pablei salih tapa Campuchia, meng nan nao tapa darak pasar Lào. Ong Nguyễn Văn Hiển brei thau:

"Urak ini bruk nao mai meng nagar Thái Lan haong Campuchia jeng siam laghaih kayua yau nan ye dahlak hulin jeng sangka jang tal darak pasar ini. Mada yaom di nyu hu lap, ini jeng lac labik siam laghaih daok hu roh duah. Dom darak pasar karei jeng meda hu pataom tame, min jabat meda brei ngak dahlau dom labik meda brei patrun yaom jien pajeng ba, patrun jien tamuh bahrau, abih di nyu lac darak pasar jaik haong Việt Nam".

Dalam tukvak masa darak pasar angaok dunya hu rilo salih bahrau, gah pa-aok blait jeng daok ba tabiak dom jalan nao ka nyu siam gheih jang. Ong Bạch Khánh Nhựt, Phaok Akoak Hiệp hội Điều Việt Nam brei thau, anak dom cuang kandah di darak pasar bhum dom nagar di Trung Đông, bruk parilo labik pablei tabiak saong pambak bruk oh patuah jamo nan lac bruk njauk ngak dahlau meng ini tal puac thun 2026. Yau nan min, yaom lac tok pataom pren tame duah dom darak pasar bahrau bhrang, gah pa-aok blait palih ruah jalan ngak patagok bruk hu mbaok di dom darak pasar prong, hu pren blei tame tani tanat. Ong Bạch Khánh Nhựt khang panuac lac:

 “Thun blaoh, sarak jien je meng nagar Amirik ngak patrun sản lượng pa-aok blait tame darak pasar ini. Kayua yau nan ye, thun ini khaol dahlak jak ba dom sang mac dahlau diah hu pambuak ngak mbang pablei salih haong gah Mỹ njauk samar drah ginum biai veik...kayua lac urak ini, jien je brei ka janih pandap pa-aok blait hu gilac veik di tanut 0%, dreih yau tukvak dahlau di tuk pandar ngak jien je đối ứng. Yau nan, jabat ngak mbang pablei salih Việt meda mbuan taom gaok haong darak pasar jang, yaom lac glaih glar nao duah labik pablei tabiak di dom darak pasar bahrau..."

Meda mboh lac, dom jabat ngak mbang pablei salih tabiak langiu negar kaya ngak nong Việt Nam daok panduan uak drei biak khang meng bruk tok thau pambak tame takik darak pasar praong tapa dak padang sa mejam pablei tabiak rilo tal. Bruk pambuak gauk siam gheih di nao duah darak pasar bahrau, pandar darak pasar jaik taphia saong pasiam pakajap dom labik ngak mbang pablei salih meng kan mai nan lac gai peih daong ka gah ngak nong yam tapa angin ribuk, patui khik jalan cak rok patagok khang kajap dalam tukvak atah dhua./.