Tinh Vinh Long urak ini hu labaih 81.000 anek saih urang bangsa Khmer di dom pakat bac. Piah khik ramik saong patagok sap Khmer, So Pato Megru tinh hu pato akhar huroh Khmer tame majam pato megru pho thong.

Kapul gru pato sap Khmer hu pato pakai tani tanat, ilamo dak harei dak hu paglaong. Bruk pato megru hu peih ngak ha sa tui danak dak saong tapuk bac megru kayua Mentri Pato Megru ba tabiak, khik kajap bruk ngak lagaih. Gam haong nan dom sang baha agama Bhat Nam tong Therawadha Khmer jeng hu khik ramik sap ndom, akhar huroh Khmer tapa dom tal bac di bilan pandiak yaok thun. Rilo Acar – urang hu angan je dalam bhum urang bangsa Khmer, dom po acar halan tian pato akhar huroh Khmer dalam sang baha, maong bruk ini yau sa bruk hadah krah, yau sa bruk khik ramik binguk yava ilamo urang bangsa Khmer piah pato meng rai ini tal rai hadei tapa yaok akhar huroh.

Adei Nguyễn Thái An, anek saih bac tal 8 Sang bac Gam daok gam bac Châu Thành, hu 4 thun bac akhar huroh Khmer bilan pandiak di sang baha, ndom meyai lac: “adei gam hu bac sap bangsa drei di sang bac, gam hu bac di sang baha di bilan pandiak. Tuk pang dom po Acar pato ka sajarah, ilamo di bangsa drei, adei mboh biak hadah mbaok meta”.

Ong Thạch Tha Lai, Phaok Yam ndok So Pato Megru tinh Vinh Long brei thau, So Pato Megru hu caga ginup ndap nda kaya ka dom sang bac hu pato sap urang bangsa Khmer; caga tapuk bac megru, tapuk pato megru hu ganap.

Dalam nan lac tinh hu ba tabiak sarak daong dom po Acar hu pato bac di sang baha haong yaom 35.000/sa mbang bac. Ini lac bruk daong prein biak hu makna, taduan bruk daong di dom Acar dalam bruk khik ramik sap ndom, akhar huroh, saong ilamo urang bangsa takik.

Urak ini, dalam tinh hu 9 baoh sang bac gam daok gam bac hu labaih 3.000 anek saih bangsa takik, rilo meng lac urang Khmer. Ini lac dom sang bac daok dalam sarak brei caik daong dahlau, dang ngak bruk “gam raong-gam pato” anek saih lac anek kamuan bangsa Khmer. Langiu di nan, tinh daok hu sa sang bac Trung cap Pali-Khmer jeng daok pato pakai labaih 200 urang bac, daong pato anek kamuan hadei hu thau tani tanat ka sap bahsa saong ilamo urang bangsa Khmer.

Anek saih bac di dom sang bac gam daok gam bac saong sang bac Trung cap Pali-Khmer hu brei bac oh mek jien, yaok bilan hu alin jien pachreih bac samu haong 80% jien bilan; hu pabak brei bao hiem y te, ndap nda duh bruk bac yaok thun. Anek saih bahrau njauk pilih ruah tame sang bac hu pabak cieu, khan masam, ao cuk, ao hajan, khan ao nao bac… Langiu di nan, anek saih daok hu nyim tapuk bac megru piah bac, daong jien radaih, gom ndien, ia pandar…

Ngan haong sarak siam lagaih, bruk pambuak tani tanat di dom pakat, dom gah saong buh abih tung hatian di kapul gru pato, Acar, sap bahsa Khmer daok hu khik ramik saong pambak praong dalam raidiuk urang bangsa takik. Ini oh lac takai yam hu makna dalam bruk padang gah pato megru taong abih, samu gauk, blaoh daok dang pasiam bruk gul pataom gauk taong abih bangsa adei sa-ai, brei bruk khang kajap ka rahra hu rilo ilamo, salih bahrau saong meda ilamo Viet Nam./.