Di tinh Ca Mau, bruk ngak lek angka taka so kapal gilai taong mek ikan hu ngak catang nao tal yaok pabah lamnge tasik, tal yaok baoh sang. Lac bhum palei hu kapul gilai praong abih hu labaih 1.100 sruh, xa Sông Đốc padang dom bruk hu makna, tabiak bruk pasang duah taong abih gilai dalam bhum.

Jalan ngak hu ngak tani tanat: dom kapul ngak bruk nao tapak tal yaok baoh kapal gilai, pandar dom janih pandar di nyu hu brei mboh tanut pasak asar toa do saong tukvak njauk piah cuak thaik, pabak baoh kadha du lieu tagok phan mem pandar haong gauk di tinh. Bruk ngak ini daong neh klak bruk “gilai bhut gilai oh hu angan je” atau baoh kadha du lieu chung di angaok majam. Min tapi, luac jalan ba ilamo ngak kong tame bruk pasang iek jeng hu prein pacang meng bruk daok rah tabiak tapa pablei gilai ikan di urang nao ngak mbang di tasik. Ong Nguyễn Văn Thức, urang jakar ngak bruk lek angka taka so di xa Sông Đốc, brei thau:

“Xa rabha bruk ka yaok kapul nao ngak bruk pasang duah, ngak taka so gilai ikan. Jaik di ini, ngak 2 mbang tabung glaong, bhum palei ngak catang mek hu dom bruk lagaih, langiu di nan daok hu dom kan kandah. Hu gilai tapa pablei langiu tinh, oh hu thau labik daok di urang blei, gilai saong po gilai jeng oh daok di bhum palei. Oh hu po gilai dalam bhum nan bruk ngak taka so kan mek hu tui caong khin di pakat karja tinh”.

 Piah pacang thir sir bruk ini, tinh ca Mau hu padang bruk pasang iek gam gam. Hadei tuk baoh kadha du lieu meng pakat xa hu jhul tagok majam, jabat ngak bruk di nyu hu pasang maong iek, mbaoh tangin saong kham merat bayar mai dom harak gal oh ka mek hu tanut njauk piah pabak. Tal ini, labaih 1.900 baoh kapal gilai ikan labaih 15 met di Ca Mau jeng hu pagam kaya ini.

Di kaoh pulao thổ Châu – labik atah taneh riya abih di tinh An Giang, bruk kapul Zalo dom po kapal gilai jeng daok patagok siam lagaih glaong dalam bruk pathau khan IUU. Bruk pathau khan oh lac pataom tame 73 baoh kapal gilai taong mek ikan di bhum blaoh daok peih praong tapa yaok rituh gilai meng bhum palei karei tame lamnge. Amuk Hồ Thị Giao Ha, Phaok Akaok UB bhap bini kaoh pulao Thổ Châu brei thau, bruk pambuak rilo kapul di urang caga Bien phong, Canh sat tasik saong Kong an hu daong pasang iek khang jang, oh luai rah tabiak bruk baoh kapal gilai ikan ngak chung angaok bhum tasik di langiu nagar:

“Pathau khan dakwah bhian ka dom danak dak oh hu mbaok tame pandar suan hukum. Dalam nan njauk ndom mayai lac, dalam tukvak tapa, UB Bhap bini xa jeng pato tacei ka gah hu ilamo pasang duah gilac dom gilai kapal hu ginup kein lagaih harak gal adat brei saong gilai oh ka hu ginup kein lagaih, saong dom jalan ini hu ngak blaoh. Daok ka dom bruk ngak chung pandar chung hukum di dalam bhum, dalam tukvak mai meng anak meng blaoh bhum palei jeng oh ka duah mboh".

Piah daong prein ka urang nao tasik, dom bhum palei daok di tapen tasik bhum Pei negar daok hu rilo sarak daong. Naih gheih yau ye tinh Ca Mau saong tinh An Giang hu pandar, daong 50% yaom kaom paglaong pakat, blei bahrau dom janih ndap nda maong pasang jalan nao. Ca Mau daok hu daong 100% jien jitvu VSM ka dom gilai ikan ngak tui adat. Ong Đinh Hoàng Phi Hoài, urang nao tasik di kaoh pulao Thổ Châu, tinh An Giang brei thau:

“Urang nao tasik taong ikan urak ini daok kan kandah min ngak tui njauk dom adat hulum. Daok gah ngak bruk taong mek, dahlau tuk drei nduac tabiak ye brei patabiak harak saong ngak njauk adat, tabiak tasik taong mek ye oh ngak chung angaok bhum tasik negar langiu”.

Bruk pambuak samu gauk di dom kapul piah pasang iek gilai ikan siam lagaih mengtaneh riya tal dom pulao tapa bruk ngak lek angka taka so, daok ngak jeng mbaok meta bahrau ka gah kaya ikan dalam ia Bhum taneran kraong Cuu Long. Yaom lac janih baoh du lieu taka so tantu cambaih laih, jalan tapen agaok tasik hu khik kajap min luac jalan talaih kat kanyik jeng brei daok hu kadha katih tani tanat bruk ngak mbang suai atah ka bhap bini rahra./.