Dom harei ini, dom urang dalam kapul HTX Padai pajaih Amaik Phan Lâm, xa Phan Sơn, tinh Lam Dong daong pasiam, ngak bahrau labik parang iek kaya ndap nda di HTX. Amuk Nguyễn Thị Hoa urang dalam HTX brei thau, HTX hu padang meng akaok bilan 2/2026, min kayua jalan Nagar 208B tapa xa Phan Sơn daok padang ngak, nan labik pasang oh ka hu padang, urak ini jalan hu padang ngak blaoh HTX mek tangin tame ngak bahrau, pasiam veik labik parang iek, jabat di HTX.

“Adei mboh biak bui sambai saong mboh hu rilo yaom kaom dalam hatai. Phun padai, nyu lac prein diuk, hu lac yau ye “asar intan” di langik, dalam tuk nan khol dahlak saong dom urang mbang tui jeng oh ka thei thai cambaih laih ka halau agha di nyu, gaok mai di dom urang ngak nong jeng njauk kurang jang yaom kaom halau agha meng kal. Adei caong khin lac hadei ini rilo urang thau tal jang yaom kaom di phun padai Amaik jeng yau dom kaya ndap nda karei lagaih haong langik tasik ia taneh, piah meng nan grauk urang meda thau jang ilamo saong dom hagait blaoh drei hu”.

Dang anak bruk phun padai pajaih ine pajaih Amaik mada lahik khat, thun 2024, baoh sang ong Nguyễn Văn Chung, urak ini ngak Yam ndok HTX padai Amaik padai ine di Phan Lâm hu mek tangin tame pala padai pajaih Amaik tui jalan pala huu ke di taneh 2ha, dalam bruk daong ilamo ky thuat di jabat Ilamo Khoa hoc Ky thuat Ngak nong gah bhum Meraong. Thun 2025, ong Chung hu peih taneh praong tagok jaik 5ha di labik palei Phan Lâm klak. Urak ini mikva peih praong taneh pala padai Amaik pajaih ine tagok jaik 10ha, kaya ndap nda ngak tabiak hu HTX Padai Amaik Phan Lâm blei abih.

Tui mikva urang bangsa Raglai saong K’ho daok di xa Phan Sơn, asar padai amaik padai ine mboh praong yau ye “asar intan”. Tui rilo angan kadha makna karei karei di gauk, tal ini tok bahrau hu dom baoh sang mikva daok pala padai Amaik di hamu taneh sit. Ong Mang Ngọc Văn, sa urang ong taha palei hu angan je brei thau, tapa rilo rai rah, tal ini baoh sang ong jeng pala padai amaik pajaik ine yau ye sa bruk khik ramik bruk meng kal mai, oh klak hu.

“Bruk HTX ngak labik parang saong blei abih kaya ndap nda huu ke di bhum palei ieu lac sa bruk ngak biak siam, rilo dalam nan hu meng lac padai ine padai Amaik. Kayua pajaih padai Amaik daok kurang, taneh pala daok sit, urak ini hu pasasiam saong mikva pala veik, harei raya Tet Akaok padai bhap bini di mikva thun ini mboh biak chreih chrai jang, rilo padai brah jang”

Lambaok wakil brei ka Kongti Bách Mộc, kongti blei abih padai Amaik tui 3 asal kadha tani tanat: Pala mbang lagaih tui langik, taneh, ia tamo di nyu; Khik kajap karo kaya mbang saong bruk daok dang mbang ngui di labik; Gam haong bhum palei sangka patagok raidiuk brei ka mikva urang bangsa takik. Ong Mai Hồng Đăng, Akaok UB Bhap bini xa Phan Sơn, padai Amaik oh sa janih lac kaya hu angan di bhum palei blaoh nyu daok ba dom yaom kaom bhap bini pagam haong raidiuk duh yang mebang di mikva urang bangsa daok di ini.

“Urak ini khol drei hu padang HTX Phan Lâm oh lac ngak sa janih brei pataom tame ka padai Amaik padai ine blaoh daok hu ngak rilo ka dom kaya ndap nda huu ke karei. Pagap yau ye urak ini bruk pala bamao, patui bhum palei hu dom bruk yau ye pala phun va ni, cà ri... Dalam tukvak mai meng anak mai tal bhum palei brei sangka dom asal kadha brei ka kein lagaih di bhum palei, njauk ndom mayai tal lac gah ngak nong”.

Padai Amaik meng kal mai hu maong yau lac “asar intan” di langik, pagam haong raidiuk duh yang mebang adat cambat di mikva bhum cek di xa Phan Sơn, tinh Lam Dong. Blaoh urak ini, asar padai Amaik – nyu yau ye baoh “asar intan” di xa bhum cek Phan Sơn oh lac vil di mbon palei mikva bangsa K’ho, Raglai dalam raya Tet Akaok padai di bhap bini blaoh daok tui takai tuai damuai jirah nao tal grauk bhum palei dalam negar./.