Daok di tapen kraong Hậu, palei Cam Đa Phước (puk Hà Bao 2) ba raidiuk salamat sron bon min jeng biak chreih chrai. Subuh page, rahra daong tadai kuan duh tuai mbang panan, menyum kophi raok pandiak tagok. Biar harei mai, tuk pandiak biar harei trun di Jalan 91C, dom tadai kuan hu rilo tuai padeih takai mbang kaya mbang bhap bini saong maong iek biar harei trun bhum palei sron mbon.

Meng subuh page awal, ong Kho Siêm, daok di to 27, ấp Hà Bao 2 bubap ramik kaya kan makanan mbang page ka urang jirah tuai damuai. Di papan ge kaya mbang bangsa palei, dom dang tung lamo angaok dang marah phong mbau pahe. Dom janih kaya mbang pachreih tuai damuai jirah mai Đa Phước, ba mai kadung jien karo brei ka sang di Ong   

Oh lac sa janih pablei ndap nda kaya kan, ong Kho Siêm daok chreih chrai brei thau tal tuai damuai ka ndap nda kaya tamo, bruk ngak ndap nda kaya gam haong dom asal kadha ilamo pa gam haong yaok kaya mbang. Tui ong, ini lac bruk mbuan abih piah yaih khan bruk siam gheih kaya mbang di bangsa Cam tal tuai damuai jaik atah.

Puk palei Hà Bao 2 hu dua baoh sang magik, ini lac labik brei ka urang bangsa Cam Samyang samtu ngak adat saong labik pambuak pagam dalam bhap bini rahra. Dalam raidiuk bhian harei, dom halau janeing tuantuan kemkem, urang hu angan je gam haong karja, kapul di palei jak ba mikva khik ramik an ninh, siam mekre, sangka patagok kinh te, khik ramik dom ilamo siam gheih.

Ong Mohamad Aly Ay Dốp, Akaok Sang megik EhSan, brei thau: “Sang magik oh lac sa labik brei ka mikva bangsa Cam sambah yang ngak adat blaoh nyu daok lac labik kakei grauk urang gul pataom, sangka ngak mbang, pato megru anek taco saong ngak siam dom ibadat di bhum palei”.

Tui mikva urang bangsa Cam daok di Đa Phước, khik ramik ilamo lac thau iek praong sap ndom, khan ao, kaya mbang, adat cambat, bruk ngak meng kal; gam haong nan randap lagaih haong raidiuk vahrau. Bruk salih di Đa Phước daok mbuan mboh meng dom jalan praong laneing lanoi, hacih sa-at tame dom labik daok rahra.

Tui Bi thu Chi mbo puk palei Hà Bao 2, ong Du Số, dalam puk palei jammaah urak ini hu 1.551 baoh sang rahra, dalam nan hu mikva bangsa Cam hu 488 baoh sang. Urak ini daok 9 baoh sang kathaot lac bangsa Cam; baoh sang dalam puk palei jammaah jeng pandar gom ndien saong ia hacih. Dut saong labaih 10 thun dahlau, mbaok meta puk palei Hà Bao 2 hu rilo salih bahrau. Jalan mbak pambuak puk palei hu ngak betong 100%; ndien, ia hacih tal yaok baoh sang rahra, brei kein lagaih ka bruk daok dang, bac megru, ngak mbang saong pablei salih.

Ong Du Số brei thau “Hadei 10 thun, mbaok meta jammaah puk palei salih mboh cambaih laih, jalan hu ngak betong, ndien, ia hacih mai tal yaok baoh sang; raidiuk rahra dak harei dak tagok glaong. Rilo baoh sang ba abih hatai ngak mbang, pablei salih dom bruk ngak mbang pagam haong darak palei jammaah Cam. Rahra njauk hatai dalam bruk khik ramik hacih sa-at labik daok, an ninh, siam mekre saong ilamo bangsa”.

Di jalan nagar 91C, dom kadai kuan mbang huak sit, kuan ia, labik pablei kaya meng kal dak harei dak rilo jang. Ong Mách Ta Rế, daok di jammaah Hà Bao 2, ndom mayai lac: “Rahra biak bui sambai tuk palei Cam harei ini hu rilo salih bahrau, jalan mbak lagaih, raidiuk hu mbang hu ngui jang, tuai damuai duah mai rilo jang. Min tapi bruk njauk bui sambai lac mikva urang bangsa Cam jeng khik hu adat cambat tanarkun ibadat, kaya mbang, bruk ngak meng kal saong hatai gul pataom”.

Palei Cam Đa Phước harei ini daok mbeik drei gam haong bruk patagok di xa Vĩnh Hậu, tinh An Giang. Dalam raidiuk bahrau, palei Cam jeng khik hu bruk gheih ghang, siam mekre, anit ranam, ndung bak ilamo bangsa./.