Jalan pataom asal ban sambo ilamo, ieu sa bruk ngak ilamo hadah tanyak, Harei nyaom ilamo bangsa Cam mbang ka VI, thun 2026 meda hu peih pakak di melam ini 28/6 hadei di 3 harei rah tabiak di Mblang prong 16/4, phường Đông Hải, tỉnh Khánh Hòa.

Harei nyaom pataom mbaok jaik 1.000 urang gheih tangin, urang main adaoh tamia oh bhian mai meng 7 tỉnh, ban hu rilo bhap bani Cam diuk rai: yau ye Khánh Hòa, Gia Lai, Lâm Đồng, Tây Ninh, An Giang, Đắk Lắk saong TP. Hồ Chí Minh.

Tuk dom ragam tamia kan dalau pok tagok di hu parang angaok mblang ma-in, tuk sap Ginăng saong sap Saranai yava tagok di kreh mblang prong, tuk dom blah khan ao jih dalah hadah tanjak rah tabiak anak bhap bini, nan oh lac sa janih dom baoh kadha adaoh tamia ngak ma-in blaoh daok ieu lac bruk patui khik ilamo tapa rilo jaman rai rah.

Meda ndom mayai, brei thau ini sa bruk ngak njauk kanar hadhar abih dalam rai di sa-ai Long Quang Thiên saong sa-ai Thông Thị Kim Trầm mai meng kapul nyaom Lâm Đồng.

“Drei mboh biak hadah mbaok meta, biak tatuah jamo tuk hu mbaok dalam Harei nyaom Ilamo Cam pakat negar. Ini jeng lac tukvak masa piah ka rai rah dam dara khaol dahlak brei mboh ka bruk patui khik saong cak rok patagok asal ilamo di bangsa drei. Saong jeng ndua dhal phol Karja hu sangka peih ngak harei nyaom ilamo pakat negar. Ini lac kadha ngak brei hadah mbaok meta bhap bani Cam dalam negar”.

Hu mbaok di harei nyaom, Nghệ sĩ Đạt Kim mai meng TP.HCM brei thau, Harei nyaom hu ba tuai damuai drei tame dom bruk ngak ndung bak asal ilamo meng kan bangsa Cam. Saong ong jeng biak tatuak drei ngan haong bruk adaoh tamia di kapul nyaom Lâm Đồng.

 “Tanut hadah abih dalam danak dak ini tui dahlak mboh nyu hu lac oh sa janih tapok dalam bruk meyaih khan ka dom kadha adaoh tamia kan dalau, blaoh dom ilamo meng kan di urang bangsa Cam, blaoh nyu daok cuk tagok rup jalan suak yava di jaman bahrau piah ba nao meyaih khan di dom labik karei. Ndom pataom, nyu oh lac tapok dalam mbang angui daok dang di urang Cam haong gauk bo dom kadha ini saong dom adat cambat ini daok paglaong jeng sa kadha bahrau piah yaih khan angan je di drei, meyaih khan ilami di urang Cam tal dom labik karei”.

Langiu di dom bruk adaoh tamia saong meyaih khan ilamo, danak dak daok hu nyaom biai ndom mayai brei ka bruk "Pacang khik saong patagok yaom inem krung ilamo bangsa Cam di Khánh Hòa pambuak pagam haong patagok bruk rivang ma-in khang kajap", parang iek bhian kadha ndom ka ilamo Cam dalam bhap bani dom bangsa Việt Nam, bruk ngak ilamo rilo janih gam saong dom bruk meyaih khan rivang ma-in yaih ilamo bhap bani.

Sa bruk ngak njauk caik hatai di Harei nyaom mbang ini nan lac hu bruk pambuak gauk biak catang di gah pacang khik inem krung saong patagok bruk jirah rivang ma-in.

Ong Phú Văn Ngòi, Akaok HTX Menyim jih dalah urang Cam palei Caklaing Mỹ Nghiệp, xã Ninh Phước, tỉnh Khánh Hòa brei thau:

Daok sa-ai ngan saong sa-ai Ức Viết Vòng, mai meng Pasak Parang iek ilamo Cam tỉnh Lâm Đồng, ini lac tukvak biak siam piah jhul pakhang bruk meyaih khan labik mai rivang ma-in biak chreih chai dalam tỉnh tal taong abih ayut sahabat, tuai damuai dalam saong langiu negar.

Harei nyaom Ilamo bangsa Cam mbang ka 6, di tỉnh Khánh Hòa, thun ini, biak biai lac labik nyaom pataom sambo ilamo Cam, taphia di nan brei mboh pren diuk khang kajap di sa bein ilamo kaya meda asal dalam jalan nduac cak rok patagok di taneh aia./.