Dang di anak caong khin dak harei dak catang, HTX Ngak nong hijao Krông Pắc, tinh Dak Lak oh sa janih pataom tame sangka piah parilo pasiam baoh, blaoh daok hu buh jien tame majam pasang iek asar siam. Ong Trần Văn Thắng, Yam ndok HTX brei thau, labik yaok tukvak di nyu hu peih bruk mek haluk taneh, ia ba nao dut iek roh duah piah pasang iek ia pasei kim loai labaih saong dom tanut salamat ka 200 hecta durian pablei salih. Dom kaya ndap nda cam bien jeng hu pagam piah tui iek pH, janih siam dalam taneh saong dom asal kadha pambuak tal asar siam baoh durian. Min tapi, dom jalan langyah ini rilo meng lac patui tame bruk srap gap di labik, oh ka hu sa jalan yasa piah jeng kein lagaih njauk hu dalam rilo bruk ngak “jalan hijao”. Ong Trần Văn Thắng rabha tian ndom mayai lac:

“Meyah tukvak meng anak tal dom harak gal atau adat tacei ba tantu di Mentri gilac karei saong dom hagait khol dahlak hulin daok ngak ye biak palai tukvak, prein yava. Ka dua di nyu lac kaya di khol dahlak hulin oh hu nao tame jalan hijao tuk mikva daok biak kham merat.”

Dom bruk rabha tian ini brei mboh ka rilo gah ngak mbang pablei salih saong HTX hu srap gap ngak salih min tapi jeng daok kurang sa adat saong gauk piah ngak samu gauk saong njauk jalan. Kayua karei saong bruk pablei tabiak tui jalan bhap bini, “jalan hijao” oh lac bruk pagam sa sarakmak ma QR tagok baoh durian, blaoh brei padang sa majam baoh kadha tantu cambaih laih meng camreip tal puac di nyu. Yaok tukvak ngak meng sangka iek glang, papaok jeng brei hu taduan, khik piah meda hu pasang duah thau di tuk halei jeng hu. Ong Mai Đình Thọ, Akaok Kapul pasang khik iek HTX Jitvu Ngak nong hacih sa-at Krông Pắc, tinh Dak Lak brei thau:

“Meng gah jabat karja, brei daong dom urang ngak habar ka dom urang nan hu mbaok tame bruk ini. Yau lac tacei ba dom urang nan ngak yau habar, dom urang nan pambuak yau habar piah puac abih dom urang nan hu nao tame jalan hijao.”

Tui ong Vũ Văn Hưng, Thu truong Mentri Ngak nong saong Alam langik, “jalan hijao” pablei tabiak oh lac sa jalan langyah ka harak gal atau ilamo ngak kong blaoh daok lac jalan salih bahrau hu makna dalam bruk pasang iek asar siam kaya nong tui chuoi.Piah daong gah ngak mbang pablei salih saong bhum palei pabak hatai caong bahrau di darak pasar blei tame, meng bilan 6/2026. Mentri Ngak nong saong Alam langik hu ba tame ngak iek Majam pasang duah iek halau agha kaya nong negar.

“Khol dahlak hulin tuk halei jeng sanya janji daong karja palei, dom so, dom gah saong bhap bini gah ngak mbang pablei salih piah caga siam abih, srap gap abih saong lagaih abih dalam bruk pabak dom adat bahrau. Jalan ngak lac paglaong siam lagaih bruk pablei tabiak, jhul tagok bruk pablei kaya nong ka rahra, tapa nan daong kaya nong Viet Nam di darak pasar nagar Trung Quoc jeng yau dom darak pasar karei patui hu lagaih, pabak dom hatai caong bahrau dalam tukvak anak tal”.

Tay Nguyen urak ini lac labik pala durian rilo abih dalam negar hu labaih 90.000 hecta, baoh paik di thun 2025 hu labaih 700.000 tan. Dalam mbang pala pasak paik baoh daok jaik mai tal, bruk padang majam pasang duah iek halau agha samu gauk saong bruk pasang iek asar siam khang catang jeng hatai caong samar chip piah khik tani tanat darak pasar pablei tabiak. Bian halei khik hu kajap prein ngak tantu saong pasang iek asar siam, “jalan hijao” meng biak hu patagok siam lagaih, peih praong kein lagaih ka baoh durian Tay Nguyen saong durian Viet Nam tabiak atah di darak pasar dunya./.