Dang di kreh rai diuk chreih chai di TP.HCM, dom melam puac adit jaik di ini, rilo tuai damuai urang jirah dunya saong bhap bani ban raya mai mong iek kadha biak karei. Oh njauk lac pasak pablei salih atau jalan nao kakai, dom urang ini palih ruah ka drei daok veik dalam sa labik peih ngak bruk adaoh tamia piah pang piah iek dom sap yava ndung bak asal ilamo bangsa Việt Nam.

Di ini, sap capi rabap kanyi T’rưng, capi patau atau dom ragam cồng chiêng Tây Nguyên yava tagok di kreh mejam sap yava 3D bahrau, ba urang jirah tame bruk roh duah ilamo Việt Nam. Labaih 30 alat ragu ragam bangsa gam haong 12 kadha di jaman bahrau hu brei mboh kadha siam gheih di rilo bhum taneh, ngak jeng sa bruk iek tapa gam meng kan gam saong ragam bahrau bahrang. Nan lac danak dak adaoh tamia "Salam Show," rah tabiak di ka 6 Nguyễn Siêu, phường Sài Gòn, TP.HCM.

Mai tal ini, urang jirah oh sa janih lac pang hu ragu ragam, blaoh daok hu duah thau dom janih kaya mbang biak karei di klau bhum Barak – Kreih dan saong Mraong nagar. Bruk pambuak gauk di sap yava, thaik binguk saong kaya mbang, daong yaok melam peih ngak hu jang sa mbang roh duah ilamo Việt Nam meng rilo gah.

Ong Edgar, sa urang tuai mai jirah meng nagar Canada khan brei thau, ong hu nao rilo labik di Việt Nam min ini lac mbang akaok meti hu pang saong mong mboh hu rilo baoh alat ragam ragu pambuak haong gauk gam halai yawa sa tuk. Ong brei thau ini lac sa bruk mong iek biak siam gheih.

Ndom lac, dahlak mboh biak ấn tượng. Dahlak oh saneng lac danak dak gilac pandar rilo alat ragam yau nan. Kadha ngak ka dahlak chreih takre abih nan lac hu biak rilo alat ragam bo dahlak mbang akaok meti dahlak hu mboh saong pang yaom. Bruk pang hu biak rilo ragam karei di gauk ralai pagam sa tuk haong gauk nan lac sa kadha duah thau biak chreih. Van mbang harei ini jeng biak bingi, hu lisei, tapung am bánh mì saong rilo pandap mbang bingi Việt Nam karei.”

Dalam tuk nan, sa-ai Zamanie, tuai damuai jirah mai meng Amirik, brei thau danak dak tapa langiu hatai caong khin tuk hu daong ka sa-ai taduan mek hu dalikan ndom mayai brei ka ilamo saong anek manuac Việt Nam tapa ragu ragam. Kadha ceik rilo di abih dalam hatai ngan haong sa-ai nan lac halaw pren khang di dom nghệ sĩ daok ma-in angaok mblang ma-in.

Dahlak thau tal labik ini mai meng roh duah angaok mạng, dahlak mboh danak dak hu rilo taong yaom siam saong biak chreih bui, kayua yau nan ye dahlak duah mai piah mong iek. Saong biak di nyu, danak dak nyu daok siam jang dahlak caong khin. Hadei di mong iek danak dak, dahlak mboh biak takre bruk ini. Dahlak mboh biak tame dalam hatai haong ragu ragam, halaw pren di dom nghệ sĩ ma-in saong ar thak bo mban ragu ragam ba mai. Dahlak taduak mek hu lac danak dak hu khan brei thau sa dalikan biak gheih ka dom bhum taneh saong ilamo karei gauk di Việt Nam tapa ragu ragam saong mblang ma-in”.

Tui ong Trần Minh Hoàng, Akaok Pablei salih Salam Show, hatai saneng dak padang danak dak mai meng hatai caong khin ngak tabiak sa ndap nda rivang ma-in melam bahrau ka TP.HCM. Salih ka bruk peih ma-in ragu ragam bangsa tui jalan ngak meng kan, ê-kíp palih ruah jalan ngak ka nyu bahrau jang piah ba ilamo Việt Nam mai jaik haong bhap bani, abih di nyu lac tuai damuai dunya.

"Hu peih ngak bhian yaok melam, khaol dahlak jeng caong khin Salam Show meda hu jang sa labik mai tal ilamo biak karei saong biak takik di TP.HCM piah duh ka tuai damuai jirah. Kayua yau nan, khaol dahlak jeng brei thau lac show ma-in ini yau sa urang lambaok ka ilamo, ngak brei pambak prong ragu ragam saong asal Việt Nam tal bhap bani dunya”.

Ba tame pandar main meng di bilan 3/2025, danak dak taduan mek hu bruk brei thau gilac biak siam di urang mong iek. Urak ini, Salam Show hu taduan raok jaik 30.000 mbang tuai damuai. Dalam nan, jaik 40% nan lac tuai damuai dunya saong 60% nan lac tuai damuai Việt Nam./.