Atah di ini 4 thun, sang sa-ai K’Thị Nam daok di palei 2 hu Kapul Urang kamei xa Đông Giang brei masraiy 50 trieu dong meng Gilang Pariak Sarak karja rahra Hàm Thuận Bắc piah buh jien tame pala phun durian saong raong limo. Tal ini, bruk ngak mbang kinh te di sang sa-ai Nam hu tagok siam lagaih, jien mek tame dak harei dak hu pasiam, kayua yau nan ye raidiuk di baoh sang dak harei dak tani tanat jang. Sa-ai K’ Thị Nam, xa Đông Giang chreih chrai khan brei thau lac:

“Sang dahlak hu mesraiy gah kapul kamei 50 trieu piah pala phun durian, raong limo. Di sang jeng buh tame majam tui ia piah phun samar praong tagok. Drei mboh urang pala phun durian hu siam lagaih yau nan drei bac ngak tui. Gah ilamo ky thuat ye drei bac gilac meng dom po bein dahlau diah pala durian siam lagaih, drei ngak tui”.

Hadei di tuk mesraiy jien, sang sa-ai K’Thị Ẩn ba hatai klak jaik 2ha taneh pala phun durian taha oh siam lagaih piah salih tapa pala 1.000 phun kophi saong 120 phun durian. Sa-ai K’Thị Ẩn, xa Đông Giang brei thau:

"Sang dahlak hulin bahrau salih tapa pala phun kophi, pala labaih 1,5ha phun durian, jeng meng mesraiy meng Gilang pariak Sarak piah buh jien tame pajaih, khak, araok nding ia,… urak ini phun daok praong tagok siam, drei jeng kham merat sangka dua janih phun ini piah hadei ini ba mai kein lagaih kinh te ka sang danaok".

Gam tui labaih 800 urang kumei dalam kapul hu mbaok tame 5 kapul palei, dom thun tapa, piah daong dom urang pandar dom phun jien mesraiy sarak patagok kinh te, Kapul Urang kamei xa Đông Giang hu pambuak khang haong Gilang pariak Sarak rahra Hàm Thuận Bắc, tinh Lam Dong brei mesraiy dom phun jien mek laba lap, brei kein lagaih ka urang dalam kapul patagok kinh te baoh sang, dak harei dak mboh siam dalam raidiuk.

Amuk K’Thị MHảo, Akaok Kapul urang Kamei xa Đông Giang brei thau, tal ini, phun jien blaoh Kapul daok khik ramik labaih 12 ty ndong, hu 350 kapul mesraiy jien. Dom kapul pambuak haong dom palei jhul khang bruk pathau khan, tacei ba urang pandar phun jien siam lagaih, pandar jien njauk bruk njauk kadhar.

“Dalam tukvak meng blaoh, dom urang srap gap mesraiy phun jien saong salih janih phun pala. Langiu di phun pala rilo abih daok hu lac phun pa-aok blait, urang dalam kapul jeng srap gap salih meng phun pa-aok blait tapa kophi, phun durian saong urak ini bruk ini patagok siam, caong khin tukvak anak tal brei ba siam lagaih salih kinh te ka baoh sang”.

Tui sang sa-ai K’Thị Châu, hadei tuk mesraiy phun jien pala durian saong kophi, sa-ai daok raong limo, pabui, pala dom janih phun katut harei piah hu jien mek tame bhian ka baoh sang. Piah phun pala praong tagok siam dalam bilan pandiak bhang yau thun ini, sa-ai buh jien tame ngak majam pruh ia ta-eng, piah patak pataom patakik palai halau ia saong patakik prein buh tabiak ngak, ba jien mek tame glaong.

“Piah hu ia pruh, sang dahlak buh jien tame labaih 200 trieu dong, lac bruk cakac danao caik raok nding ia, pagam bét, blaoh pala phun. Dom phun ini suai brei paik baoh lo, nan ye drei brei pala ritak, pala tangei, raong pabui, raong limo piah hu jien cai pandar yaok harei, jien blei khak drak, jru cavao buh tame ka phun kophi, phun durian).

Meng phun jien mesraiy tal ini, raidiuk di rilo urang kamei dalam kapul dak harei dak cakrok lagaih. Meng phun jien mesraiy ini oh lac sa janih brei daong adei sa-ai kamei hu bruk ngak, parilo jien mek tame ka baoh sang blaoh daok daong brei salih jalan sahaneng di urang kamei bangsa takik bhum glaong xa Đông Giang, tinh Lam Dong dalam patagok kinh te, padang palei pala bahrau./.