Sa var page di akaok bilan pandiak bhang di xa tapen negar Ia Dom, tinh Gia Lai, diuk pasang sa-ai Kpuih Đin, daok di palei Bi, bui sambai raok nai gru dang tal pato di anek likei gam haong urang jakar xa mai rivang sang. Kadha bui sambai bo blaoh dom urang nan taduan hu lac adei Ksor Đam hu njauk tame bac gam daok gam bac di Sang bac gam daok gam bac pambuak pakat Tieu hoc saong THCS Ia Dom dalam thun bac 2026-2027 jaik tal. Anek likei hu bac megru, mbang daok saong daok dang di sang bac gam daok gam bac nan lac bruk bui sambai praong ngan haong baoh sang kan kathaot yau sa-ai Đin, daong baoh sang sa-ai sahnang hatai.

"Dahlak hulin mboh bui sambai tuk sang bac brei kein lagaih ka anek dahlak bac gam daok gam bac. Hadiuk dahlak ye raong anek sit, daok dahlak ye nao ngak apah ka urang. Brei ka anek bac di sang bac gam daok gam bac piah hu sangka jang, piah ka anek pataom tame bruk bac megru ka naih joi, hu ilamo piah harei hadei klah rambah.”

Hatai bui sambai nan jeng rah tabiak di dalam rilo baoh sang di palei Bi, xa Ia Dom. Sa-ai Triệu Thị Say, bangsa Dao, brei thau, rilo thun tapa, yaok harei anek nao bac mai sang nao tapa jalan atah angaok jalan Quoc lo 19 jeng lac sa harei sa-ai suhsah duh hatai cang anek. Tuk thau anek si bac megru saong daok di baoh sang bac gam daok gam bac bahrau, baoh sang sa-ai thei thei jeng mboh chreih sambai.

“Dahlak hulin bhian nao tapa nan, dahlak jeng dang radaih maong iek blaoh mboh biak bui sambai. Dom sang rilo tal hu padang tagok biak gheih, anek kamuan drei nao bac mboh biak tani tanat. Tame sang bac gam daok gam bac lac dahlak mboh sahnang hatai, hu gru pato daok dalam nan, hu urang pacang khik, hu labik mbang labik daok, blaoh mbang huak jeng lac biak ginup.”

Xa tapen negar Ia Dom hu labaih 9.000 rahra bhap bini daok rai di 7 palei, dalam nan hu bangsa takik hu labaih 34%. Labik bhum praong, rilo labik daok rahra ndih atah pasak, labik hu anek saih njauk nao jaik 20km ka meng tal sang bac. Oh takik adei yaok harei nao di angaok jalan Nagar Quoc lo 19 hu biak rilo radaih praong, mbuan rah tabiak bala di angaok jalan mbak.

Ong Nguyễn Văn Tiến, Phaok Akaok UB Bhap bini xa Ia Dom, tinh Gia Lai, brei thau, xa hu 272 adei meng tal 4 tal tal 9 hu brei tame bac gam daok gam bac. Ini rilo meng lac anek saih daok dalam baoh sang mbang tui sarak, anek saih bangsa takik baoh sang kathaot, jaik kathaot, anek saih metui mejua atau hu sang daok di atah sang bac. Langiu di nan, 876 anek saih karei brei hu gam bac gam daok meteh harei. Xa jeng hu pasiam taong abih majam pasang iek saong gru pato, khik kajap meda raok anek saih tame bac megru meng di dom harei akaok thun bac bahrau.

"Ngan haong asal kadha gru pato, dahlau abih lac khik kajap dom bruk brei caik dahlau ka sang bac gam daok gam bac piah khik kajap bruk ngak. Yang ka dua lac pambak tame ilamo, dom bruk hu ilamo di gru pato yaok mon bac. Pachreih brei caik dahlau gam haong dom sang bac lac gru pato hu baoh sang jaik sang bac, daok sit umo piah daong dalam asal kadha pasang iek anek saih langiu tuk, var kreh pandiak saong malam.”

Ong Phạm Văn Nam, Yam ndok So Pato Megru tinh Gia Lai brei thau, urak ini, So daok pambuak haong UB Bhap bini 7 xa tapen negar salah blaoh danak dak padang sang bac. Gam tui di nan, gah pato megru pasang duah bruk anek saih, kuhria tanut bien che, pambuak haong So Noi vu ndom meyai ginum biai ramik dak kapul urang jakar pasang iek, gru pato tui adat sarak karja.

"Gam tui dom urang gru pato urak ini, khol dahlak brei kuhria pambuak haong So Noi vu ba panuac tagok UB Bhap bini tinh pabak dom urang gru pato piah khik kajap tui bien che brei adat, pabak hu bruk pato megru, Daok urang ngak bruk raong mbang ruak, khol dahlak hulin hu pambuak haong Sang bac Cao ndang Gia Lai, urak ini daok peih tal pato tanek huak piah hu kapul urang ngak bruk raong mbang huak piah duh ka bruk raong, sangka dom adei dalam tukvak anak tal.”

Bruk ngak jeng sang bac gam daok gam bac labik tapen negar di tinh Gia Lai saong dalam negar hu maong yau sa panuac lang talaih ka rilo bruk kan kandah dui suai atah di bhum tapen negar, meng bruk atah di taneh riya, kein lagaih kinh te tal bruk anek saih klak bac kreh tuk./.