Dalam tal bac di Sang bac Tieu hoc Lê Văn Tám, daok di khu pho 12, Phuong Tân Ninh (ban Tay Ninh, tinh Tay Ninh dahlau diah) sap papaoh akhar daok yava tagok. Anai gru Thị Saly Has khan, harei akaok meti mai tal sang bac, adei Abu Bakar, urang bangsa Cam gam haong rilo adei karei daok siam tapak gindang tuk anai gru ieu puac ine akhar huroh kayua dom adei oh ka thau sap Viet. Anai gru buh abih hatai tian langyah meng sap Cam blaoh tacei ba dom adei puac sap Viet tui yaok ine akhar. Adei Abu Bakar ndom meyai lac:

“Adei biak chreih bac sap Viet, anai gru pato 2 mbang, adei bac mboh biak drah thau.”

Anai Thị Saly Has brei thau, di rilo labik daok rahra hu rilo urang bangsa Cam, Khmer di Tay Ninh, uranaih praong tagok rilo di nyu hu meng lac dalam labik ndom meyai sap Cam rilo. Bruk nan daong khik ramik ilamo bangsa saong sap bangsa drei min meda biak kan kandah tuk dom adei tame tal bac Sa. Oh takik anek saih mbang akaok meti nao tal sang bac jaik yau oh ka ndom meyai sap Viet hu. Gru pato anek saih bangsa takik njauk pato meng sap Viet saong sap bangsa di dom adei saong brei hu biak kham merat buh hatai tian. Anai gru Thị Saly Has brei thau:

“Dom adei nao tal sang bac pasram ndom meyai sap Viet, mai sang ye ndom sap bangsa nan biak kan kandah ka gru pato. Gru pato thau sap Cam ye lagaih jang, daok gru pato oh thau sap Cam ye biak kan kandah. Kayua nan tapuk pato sa harei 2 tiet, min brei pato jeng dua var ka meng blaoh. Tuk dom adei oh thau ye drei brei ndom sap Cam piah langyah ka dom adei thau”

Tui anai gru Trương Hoàng Thanh Thảo, Akaok Sang bac Tieu hoc Lê Văn Tám, kan kandah praong abih urak ini lac rilo anek saih oh ka bac pakat mau yao, oh ka ndom sap Viet tanat, bruk ndom meyai oh tanat. Kayua yau nan ye sang bac peih dom tal bac bilan pandiak patagok sap Viet tui rilo jalan yau ye: kadha me-in, khan kadha, ndom meyai tui kapul piah uranaih ndom meyai sap bangsa hu siam mekre jang. Sang bac jeng patagok bruk di gru pato lac urang bangsa takik piah daong uranaih:

“Sang bac hu brei caga ginup hatai, ndap nda kaya piah ngak danak dak. Khol dahlak caga dom cei anai gru hu ilamo, gam haong bruk di gru pato lac urang bangsa piah daong dom adei siam jang. Aduk bilik hu ramik ginup, labik bac megru siam mekre. Langiu di nan, sang bac daok parilo dom kaya thaik thaot gheih mekre lagaih ka pato piah dom adei mbuan ba drei tame, hu ilamo bac megru samar jang”

Gam haong bruk dalam sang bac, Phuong Tân Ninh jeng hu brei jhul khang sap Viet ka uranaih bangsa takik. Tui amuk Bùi Thị Hà, Phaok akaok Jabat Ilamo – Xa hoi Phuong Tân Ninh, tinh Tay Ninh langiu di bruk khik kajap ndap nda kaya, kapul gru pato, bhum palei daok pagam sap Viet tame dom danak dak ilamo, pahat padhih piah ngak jeng labik pambuak ndom meyai me-in la uranaih. Danak dak hu ngak 18 kadha jaik taphia bruk bac magru, daong anek saih bangsa Cam, Khmer bac megru meng bruk pang, ndom saong meyai yaok harei:

“Karja palei biak sangka iek praong nek saih lac urang bangsa takik. Khol dahlak jeng caong dom kein lagaih, dom sarak brei ka kapul gru pato njauk lagaih jang piah gru pato sahnang hatai pato. Tukvak anak tal, karja palei brei patragok bruk klah rabha, pathau khan jalan ngak, makna di bruk srap gap sap Viet ka anek saih dahlau di tuk tame tal bac Sa.”

Meng bruk ngak di Phuong Tân Ninh, tinh Tay Ninh kuhria peih 39 tal bac sap Viet ka 815 uranaih bangsa takik di bhum Tân Đông, Tân Thành, Mỹ Hạnh, ĐỨc Hòa… Ngan haong dom labik takik rahra, bhum palei peih tal bac pagam piah khik kajap oh hu anek saih halei daok gilac gah likuk./.