Kreih Pandiak ong Y Ung Byă, daok di mbon palei Cuôr, xa Ea M’Droh, tinh Đắk Lắk daom bubap padang sang. Dua urang padang sang srau simang, cakak pasei, daok diuk ong ye pok dom xô ximang tagok tadai tong. Baoh sang praong 72 met vuong daok dak harei dak jaik salah blaoh. Ong Y Ung brei thau, sang kathaot hu 6 pabah mbang, meng nan mai jeng daok caong khin hu baoh sang khang kajap. Urak ini, Chi mbo Kong an daong jien blei kaya padang, ong Y Ung pah urang ngak saong ta-eng padang baoh sang caong takre di drei:

“Hu sang ye biak bui sambai, kuhria brei kham merat ngak mbang, nyim adei sa-ai gauk gan piah padang salah blaoh baoh sang. Baoh sang lac bruk daong prein piah patui kham merat ngak mbang, sangka anek bik bac megru tal labik tal adhua, kham merat uak drei tagok patruh kathaot”.

Baoh sang di ong Y Đek Ênuôl jeng bahrau ramik tame baoh sang bahrau praong laneing lanoi, salih ka sang klak hu daok luac 30 thun tapa. Meng bilan 8 thun blaoh, baoh sang di ong Y Đek hu Chi mbo Dom jabat Ndang xa Ea M’Droh daong bruk, bhian rivang suatangi, daong prein, daong sa yau limo pajeih, tacei ba bruk raong glang, pasiam bruk ngak mbang. Akaok thun ini, baoh sang patui veik hu daong labaih 95 trieu dong padang sang Gul pataom. Hu sang, hu jalan patagok kinh te, ong Y Đek sahnang hatai ngak mbang saong tagok jalan sahneng kuhria ka harei hadei.

“Dahlak nyim adei sa-ai gauk gan 40 trieu saong srap gap pambuak padang hu baoh sang yau ye urak ini. Urak ini hu sang blaoh paje ye drei sahnang hatai ngak mbang, bayar rah rah dom jien daok tavak sraiy, blaoh patui veik pataom piah padang sang ging saong danak dak karei, blaoh hu kein lagaih jang ye meda peih praong taneh, pambuak veik bilik daok ka praong laneing lanoi jang”.

Tui ong Y Sắk Kbuôr, Akaok mbon palei Cuôr, oh sa janih lac mai tal brei jien daong sa mbang blaoh nao, dom chi mbo hu bruk pambuak pagam, bhian rivang tangisua, tui iek, tacei ba, pambuak prein daong saong daong prein dom baoh sang dak harei dak tani tanat brei ka raidiuk. Bruk ngak ini ba mai siam lagaih mboh cambaih laih, daong ka dom baoh sang kathaot dak harei dak uak drei tagok. Ong Y Sắk caong khin bruk ini brei daong patakik baoh sang kathaot dalam tukvak mai meng anak jaik tal.

“Meng bruk ngak ye hu rilo bruk daong ba, rahra hu jalan patagok jang, hu daong limo, padang sang, brei kein lagaih, daong prein piah mikva kham merat ngak mbang. Caong khin jaik tal meng anak brei hu dom bruk daong, daong yau ini piah dom baoh sang kan kandah hu kein lagaih truh tapa kan kandah, patagok kinh te”.

Hu labaih 7.000 rahra, dalam nan hu jaik 900 baoh sang kathaot jeng ye dom baoh sang jaik kathaot, piah mek hu bruk oh daok sang kathaot di thun 2030, ndang uy xa hu peih bruk “Yaok pajabat kapul ndang daong haong baoh sang kathaot”, jak ba dom chi mbo tapak pambuak pagam haong yaok baoh sang, tacei ba patagok bruk ngak mbang saong pambuak dom gah daong. Ong Nguyễn Văn Bông, Phaok Akaok Ndang uy xa Ea M’Droh brei thau, bhum palei daok pamaong tal padang bruk ngak piah yaok chi mbo jeng labik pambak di rahra.

“Caong khin praong abih oh lac khol drei daong hu dom jien, dom baoh sang, dom drei limo, blaoh daok lac brei hatai je di mikva urang bangsa takik lac oh luai thei daok gah likuk saong tuk halei jeng hu urang jakar di karja palei daong iek glang. Gam haong nan daong ka urang jakar, urang ndang tuk nao tapak di labik brei hu jaik taphia rahra, thau rahra jang”.

Bruk ini rah tabiak jalan nao bahrau dalam bruk patrun kathaot karo kajap di labik, pagam haong bruk di yaok kapul ndang saong yaok urang jakar urang ndang. Nan lac labik pambak piah rahra khang hatai uak drei tagok meng prein di drei./.