Dom harei ini, tuk malam mai di xa Ea Drăng, tinh Dak Lak, dom jalan hala dok Negar gam haong gom manyek hadah tanrak meng majam gom ndien ia harei ngak jeng mbaok meta karei ka rilo mbon palei. Di mbon palei Lê B, jalan atah labaih 3km dahlau diah sup melup, mejua pa urak ini hu hadah gom. Dua gah tapen jalan, dom hala dok Negar hu tuan atah tapa yaok pabung sang. Ong Nhan Ngọc Tấn, Akaok Kapul Urang ngak nong palei mbon Lê B brei thau, bruk salih ini lac bruk ngak jeng meng bruk sa hatai, daong prein di bhap bini rahra.

“Tapa bruk pathau khan jak ba, ye mikva bhap bini jeng yau dalam kapul jeng njauk hatai. Meng tuk jalan hala dok hu brei ngak lagaih, hu ilamo jang ye thaik thaot mbon palei Lê B hu hadah saong pamedeih dalam yaok rahra khol dahlak hatai anit ranam taneh ia negar”. 

Oh tok lac ngak jalan gom ndien truac hadah, rilo urang dalam kapul urang ngak nong di xa Ea Drăng daok khik tani tanat bruk ramik hacih sa-at jalan palei, pala bangu tapen jalan saong neh rabha hareik harom di labik. Tui amuk Vũ Thị Thúy Hòa, Akaok kapul Urang ngak nong xa Ea Drăng, bruk hu makna abih lac pamedeih hu bruk srap gap di rahra bhap bini dalam dom bruk ta-eng pacang khik meng dom bruk ngak cambaih laih piah dak harei dak ngak salih mbaok meta saong ilamo khik ramik alam langik di labik daok rahra bhap bini.

 “Oh cang tame taong abih bruk daong di karja blaoh khol dahlak hulin nao jak ba bruk rik jien meng bruk ta-eng ngak tapa majam jalan mbak, jalan gom ndien jeng yau neh rabha janih tathuak nerak meng bruk daok dang yaok harei di labik saong neh rabha janih tathuak nerak kanjah jhak”.

Di phuong Buôn Hồ, dom pakat kapul urang Ngak nong jeng jak ba urang dalam kapul ramik pataom hareik harom, ramik kadung jru pacang khik njam patam phun kayau hadei pandar, padang dom jalan hijao – hacih sa-at – gheih ghang saong patakik pandar janih hoa chat dalam bruk ngak mbang pala drak. Bahrau ini, bruk “Kapul urang ngak nong ta-eng ngak ka bruk pacang khik alam langik” hu peih ngak di mbon palei Tring 1 saong mbon palei Tring 2, taduan hu bruk ngak tui di rahra.

Dalam tinh Dak Lak urak ini khik tani tanat 187 bruk urang ngak nong ba drei tame pacang khik alam langik pagam haong padang palei pala bahrau. Rilo bhum palei hu ngak jeng dom jalan hadah – hacih sa-at – gheih ghang, pambak praong tabiak bruk neh rabha hareik harom di bhum, pataom hareik hareik bruk ngak nong saong pandar janih sinh hoc dalam bruk ngak mbang. Ong Ya Toan Ênuôl, Akaok Kapul urang Ngak nong tinh Dak Lak brei thau, jalan ngak di dom danak dak oh tok lac piah pasiam thaik thaot palei pala blaoh daok padang dom bhap bini rahra siam mekre hu ilamo, karo kajap, dalam nan rahra bhap bini ieu lac pasak bruk kadha pasak asal.

“Kapul Pahasa tuk halei jeng brei mboh cambaih laih padang palei pala bahrau urang ngak nong lac ngak po, daok kapul ngak bruk pasak piah padang peih dui ba saong pambuak. Peih danak dak jeng bruk ngak cambaih laih, rabha bruk cambaih laih urang, cambaih laih bruk ngak piah jak ba prein daong taong abih, pagam haong padang palei pala bahrau saong paglaong raidiuk di rahra”.

Di dom mbon palei di Dak Lak harei ini, bruk salih pandol barau oh sa janih hu di dom jalan hadah gom jang atau hacih sa-at, blaoh daok brei mboh tantu tâp bruk rahra thau srap gap jum tangin khik ramik labik drei daok dang. Meng di bruk ngak tabiak, bruk daok dang, dom urang nan thau jang dalam bruk khik ramik labik daok di drei, daong ngak bahrau mbaok meta palei pala dak harei dak hijao, hacih sa-at, gheih ghang jang./.