Mai meng ngak siam bruk jak ba saong pambuak bruk gheih ghang haong gah  karja nagar Campuchia, bruk tapain negar Balai Bien phong Tân Thành (Bol lin Bien phong Dong Nai) tuk halei jeng karo grap tanat. Dom rik daong oh padeih di dom bol lin gam haong bruk njauk hatung hatai di bhap bani xa Tân Tiến labik tapain negar hu ngak jang sa jalan ngak tapain negar taong abih bhap bani biak khang kajap.

Blai Bien phong Tân Thành khik iek jalan tapain negar labaih 14,5 km. Dom thun tapa, Blai Bien phong Tân Thành hu pambuak bruk biak siam haong pakat uy, karja puk palei saong bhap bani xa Tân Tiến, abih di nyu lac di dom puk palei tapen negar Tân Phong, Tân Hội, peih ngak siam bruk taong abih bhap bani hu mbaok tame khik iek jalan tapen negar, an ninh tapen negar dalam jaman bahrau. Bruk bhian ngak ini pachreih biak rilo kapul, urang ta-eng halar hatian hu mbaok tame gam haong bol lin bien phong pasang iek, khik tamo ghang jameng saong dom inem tapain negar.

Thieu ta Trần Quốc Vũ, Urang ngak Chinh tri phaok Balai Bien phong Tân Thành brei thau: Dom thun tapa hu labaih 20 urang, 4 kapul nyaom tut angan tame hu mbaok tame bruk pacang khik jalan tapen negar, ghang jameng. Bruk njauk hatai di bhap bani oh lac daong khik kajap khik tamo dom inem di tapen negar, bo tapa bruk nan, mikva abih hatai gam haong bol lin Biên phòng khik iek raidiuk sron mbuan di tapen negar.

Bruk pambuak pagam ini hu ngak jeng bruk hu mboh di meta yaok harei. Nan lac dom van tabiak pah trah glai ram, puh ramik jalan tapen negar, ghang kadang tal dom  mbang pathau khan paglaong akaok saneng ka dom bruk ngak di tapen nagar saong pacang cakak kaol kanjah jhak. Sa-ai Thị Trinh, sa urang bangsa takik daok di puk Tân Phong, hadei di tuk hu dom Bol lin Bien phong khan brei thai ka adat cambat, ye hu jeng sa “urang pathau khan jak ba” abih hatai. Sa-ai Trinh klah rabha: "Dahlak biak bui sambai tuk hu pathau khan ka bruk hu mbaok tame pacang khik jalan tapen negar gam haong dom bol lin. Dahlak meda jak ba mikva oh ngak suak dom adat hukum tapen negar saong caong khin patui veik nao gam haong Bol lin Bien phong tapen nagar dalam tukvak anak tal".

Bruk pacang khik jalan tapen negar urak ini oh lac akaok kadha di dom rai rah nao dahlau, bo daok lac dalah apui hu patui veik ka rai rah dam dara ranaih. Tui ayut Nguyễn Hồ Thúy Vi (umo 17 thun, xa Tân Tiến): "Lac sa urang ndoan, adei mboh hadah mbaok meta saong bui sambai tuk hu mbaok gam haong Bol lin Balai Bien phong pacang khik ghang jameng tapen negar. Ini lac sa bruk ngak biak hu makna, daong ka khaol adei ngak abih hatung hatai ranam taneh ia saong bruk ngak di dam dara ranaih".

Tui Dai uy Lê Hoàng Trọng Trí, Phaok akaok Balai Bien phong Tân Thành, peih ngak danak dak pacang khik jalan tapain negar thun 2026, jabat ini patui khik bruk pasang iek bhian harai daong ka jakan tapen negar, ghang jameng tuk halei jeng hu khik tamo saong grap tanat bruk ngak po di jalan tapen negar. Abih di nyu, jabat ini tuk halei jeng iek praong pambuak bruk catang haong dom jabat karja saong bhap bani di dom puk di tapen negar.  

Tuk bahrau blaoh tapa, oh lac sa janih dom canah jalan pasang iek tapen negar di xa Tân Tiến bo rilo puk palei jalan tapen negar di ban Dong Nai blaoh saong daok “caik inem” talai di urang lin tuan quân hàm hijao saong taong abih bhap bani di bhum tapean negar. Labik ini, bruk pacang khik po bhum taneh oh daok lac bruk ngak di ta-eng bol lin pan phao karaong, bo hu jeng hatai saneng di yaok urang bol dalam bhum taneh dom Balai Bien phong khik iek./.