Dom thun jaik ini, rilo danak dak jalan di pasak hu ngak saong peih ngak di dalam bhum yau ye jalan peih samar Trung Lương – Mỹ Thuận – Cần Thơ, tatua Đại Ngãi, tatua Cổ Chiên 2, jalan di tapen tasik, daanak dak peih praong jalan Quoc lo 60…gam haong rilo jalan pambuak bhum. Abih di nyu nan lac, jalan peih samar CT.33 kuhria pambuak Ban raya Ho Chi Minh haong dom tinh tapen tasik bhum Taneran kraong Cuu Long hu caong takre daong prein patagok bahrau ka dalam bhum.

 Urak ini, dalam tinh hu Labik kinh te Đinh An hu taneh 39.000ha gam haong 22 labik ngak kong tui danak dak hu taong abih taneh labaih 7.243ha. Dalam nan, 5 labik ngak kong hu ba tame ngak bruk dalam nan hu Long Đức, Giao Long, An Hiệp, Hòa Phú saong Bình Minh hu bruk lam dar bak di tanut biak glaong.

 Sa di dalam dom bruk naih gheih ka bruk patagok ha tang gah ngak kong ieu lac hu Labik ngak kong Hòa Phú. Urak ini labik ngak kong ini dui pachreih 40 danak dak meteh pakat, mek hu bruk lam dar bak labaih 99%. Ong Hà Duy Tín, Taong Yam ndok Kongti Co phan Hòa Phú brei thau:

"Labik ngak kong Hòa Phú tukvak mbang ka 3 hu ha tang pandar haong Hòa Phú tukvak 1 saong 2. Ini lac dom kein lagaih piah mbuan dui pachreih gah buh jien tame. Di tukvak mbang ka 3 ini, khol dahlak brei ramik caga saong cih tabiak meng tuk akaok meti tui jalan labik ngak kong hadah krah, labik ngak kong hacih hijao, ha tang padang samu gauk, salah taong abih, hadah bahrau ngak jeng bruk dui pachreih ka gah buh jien tame.”

Oh lac sa janih pataom tame taong abih ha tang ky thuat di dom labik ngak kong daok ngak bruk, tinh Vinh Long daok jhul khang bruk ngak, tinh Vinh Long daok jhul samar tukvak ngak bruk dom labik ngak kong bahrau hu quy hoach saong pabak jalan buh jien tame ngak. Ong Nguyễn Văn Phương, Akaok Pajabat Pasang iek Labik ngak Kinh te brei thau:

 "Urak ini tui dom urang buh jien tame ngak hu UB Bhap bini tinh brei jalan buh jien tame ngak ye Mbang gam haong gah buh jien tame brei jhul samar tukvak ka dom harak gal buh jien tame, ka bruk peih paha mbaok taneh saong buh jien tame ka dom ha tang ilamo ky thuat. Daok ngan haong dom labik ngak kong urak ini daok quy hoach saong daok ieu da-a buh jien tame dom ha tang, lac pasang duah gilac taong abih ka bruk patagok ilamo kong nghiep dalam bhum piah pathau khan ndom meyai haong UB Bhap bini tinh pataom tame quy hoach di tinh ka bruk patagok gah ngak kong dalam tukvak anak tal.”

Tui jalan kuhria tal thun 2030, Vinh Long brei patagok 22 labik ngak kong saong 44 kapul labik ngak kong. Tinh pamaong tal dui pachreih dom danak dak ilamo ngak kong pakat glaong, gah ngak kong hacih hijao, siam mekre haong alam langik, gam haong nan buh jien tame samu gauk ka majam ndien, ia, langyah ia tathuak saong jalan mbak pambuak. Piah ngak lagaih jalan ngak nan, bruk buh jien tame ket cau ha tang saong pasiam alam langik buh tame ngak patui veik hu brei mboh lac bruk hu makna… Ong Nguyễn Quỳnh Thiện, Phaok Akaok UB Bhap bini tinh brei thau:

"Tinh daok pasang duah ka bruk buh jien tame danak dak ngak mbang ilamo ky thuat, rilo meng lac ha tang jalan mbak pambuak tame dom labik ngak kong piah khik kajap bruk peih nduac laneing lagaih. Gam haong di nan patagok bruk pasang iek taneh riya, bruk peih paha mbaok taneh, jao bayar taneh ka gah buh jien tame dil samu. Blaoh pasiam dom harak gal karja ngak habar ka samar ka tukvak saong patakik hu harak gal oh njauk hu, piah daong gah buh jien tame samar drah peih ngak dom danak dak.”

Vinh Long daok dak harei dak padang banek patagok bahrau patui tame ha tang hadah bahrau saong pambuak bhum siam lagaih. Ini oh lac bruk daong prein dui pachreih buh jien tame, jhul tagok bruk ngak kong saong logistics patagok blaoh daok peih tabiak kein lagaih salih co cau kinh te, brei bruk ngak, parilo jien mek tame ka rahra, pamaong tal jalan jeng gah cakrok hu makna di bhum Taneran kraong Cuu Long dalam dom thun anak daok mai tal./.