Glaong ralo jang di sa ragam tamia, Xoe Thai nan lac sa baoh bein ilamo, labik pambuak pagam rilo hatai saneng ka jalan diuk rai, meta mong ka gah langik tasik taneh riya, anek manuac saong bol bhap rahra. Ngan haong urang bangsa Thai di Muong Loh, yaok mbang parah tanjak dalam ragam tamia xoe nan lac panuac daa biak biai, yaok mbang pal tangin nan kac kadha brei mboh ka bruk pataom pren, sa hatung hatai haong gauk dalam bruk ngak saong bruk anit ranam gauk...

Saong kadha ngak jeng bruk karei di Muong Loh nan lac hatung hatai jum pataom gauk dalam bruk khik ramik inem krung. Oh lac tok padeih di harei roya atau dom tukvak biak karei, Xoe Thai hu mboh dalam dalam taong abih bruk ma-in sambai yaok harei. Yaok ribau urang gheih tangin, dalam nan hu dom urang hu umo labaih 80 thun jeng ba abih hatai dang tabiak tacei pato ragam tamia xoe brei ka anek ranaih saong bhap bani, piah ka dom ragam tamia xoe bangsa hu brei daok khik ramik siam gheih, oh njauk lahik nao tui tukvak masa atah dhua. Urang gheih tangin bhap bani uu tu Điêu Thị Siêng, daok di palei Đêu 2, phuong Nghĩa Lộ khan brei thau:

“Mai meng dom ong ong amuk amuk pato tacei brei, dahlak hu thau saong pal hu ragam tamia, dahlak biak huac ragam tamia xoe ini nyu lahik nao kayua yau nan ye dahlak jeng hu tacei pato brei ka dom anek kamuan. Dom anai gru, cei gru jeng palagheih ka dom kamuan mai ini bac langiu tuk, yau nan ye dom kamuan thei thei jeng bui sambai.”

Piah khik ramik saong patagok inem krung di dom thun tapa, karja dom xa, phuong di bhum Muong Loh jeng yau pakat tinh Lao Cai jeng hu peih rilo bruk ngak piah paglaong hatai saneng saong palagaih piah ka ilamo tamia Xoe Thai hu brei patagok. Dalam nan hu bruk peih ngak dom rija roya, danak dak daoh tamia, pambuak bruk ilamo nao mai haong gauk, meng nan meyaih khan tabiak prong jang ngan haong tuai damuai atah jaik ka ilamu tamia xoe.

Dang anak bruk pacang khik inem krung, bruk pato tamia Xoe bangsa Thai dalam sang bac jeng ieu lac sa bruk ngak biak siam gheih. Rilo sang bac di Nghĩa Lộ hu daa urang gheih tangin mai dang pato, ba ilamo tamia Xoe Thai tame dalam danak dak bruk ngak langiu tal pato, piah ka anek saih pal tangin tamia ragam tamia di bhap bani bangsa drei. Anai gru Phạm Thị Thanh Hiền, Sang bac TH saong THCS Nghĩa Lộ brei thau:

“Meda mboh tame dom adei, meng sit tal prong thei thei jeng ranam takre dom ragam tamia xoe, dom adei bac megru biak samar. Dalam dom bruk ngak ini, khaol dahlak jeng mboh hu bruk daong di dom urang gheih tangin, dom urang nan caik tabiak rilo tukvak saong pren yava piah tacei pato dom kamuan.”

Urak ini di Muong Lo hu yaok rituh kapul nyaom daoh tamia di dom puk palei ngan haong yaok ribau urang thau tamia xoe, oh lac tok tamia ma-in dalam yaok mbang rija roya, blaoh daok peih prong ragam tamia xoe dalam taong abih dom harei bui sambai, piah ka ragam tamia xoe jeng suan yava di ilamo urang bangsa Thai, nan lac “lisei mbang, aia menyum” ngan haong yaok urang bol. Adei Lò Thị Xuân, daok di palei Pá Kết, phuong Trung Tâm, tinh Lao Cai khan brei thau:

“Tamia Xoe gheih oh lac tok hu tamia tangin saoh blaoh daok gam suan yava, yau nan ye langiu di bruk bhian pato pathram, khaol dahlak jeng caik hatai tui pang dom amuk, dom sa-ai, thau cambaih laih jang ka makna di dom ragam tamia xoe.”

Thun bahrau mai tal jeng daok ba bui sambai mai tal grauk labik di bhum Tay Bac. Pal tangin gauk dalam ragam xoe, bhap bani Thai bhum Muong Loh dak mboh hadah mbaok hadah meta, kham merat khik kajap inem krung ilamu bangsa dalam rai diuk bahrau hu rilo kadha salih bahrau di bhum palei, taneh aia ./.