Meng di bhum taneh mbuan cuah tapen tasik, di gah bhum li-u Ben Tre - Coconut Homestay di xa Mỏ cày Nam hu jeng sa labik mai randap di tuai damuai dunya. Hu padang taong abih meng kaya li-u, labik daok pandaok hu 30 tuai damuai ini hu pagam taong abih bruk ba drei tame haong rai diuk rahra palei pala bhum li-u: juak radaih di ala binguk phun li-u, vah ikan, ta-eng paik saong blah li-u menyum ia, tanek mbang haong pandap tamo ta-eng pabak, atau hu mbaok tame dom labik ngak kaya meng li-u. Sa-ai Thạch Si Na, urang padang Coconut Homestay hu labaih 20 thun hu ilamo dalam gah jirah rivang, klah rabha brei thau lac:

"Coconut Homestay ngan haong jalan pamaong tal hacih hijao karo kajap. Tuai damuai jirah mai tal ini hu ta-eng drei paik li-u, blah li-u piah menyum ia, hu ba drei tame dom bruk pambuak tal pala drak, paik baoh, ngak kaya meng baog li-u. Dalam nan hu jitvu vah gaiy di kraong ia piah maong iek thaik thaot bhum li-u meng ala kraong, gam haong rilo bruk ba drei tame karei.”

Jeng meng phun li-u, min ngak tui sa jalan hadah krah jang, ia bangu li-u Sokfarm di xa Tiểu Cần, tinh Vinh Long daok jeng kadha pataom di gah ngak nong huu co saong jirah rivang. Hu padang tabiak di thun 2019, Sokfarm hu mbaoh tangin huu co meng nagar Japon, My saong Lien minh chau Au; kaya hu mbaoh tangin lac kaya Viet nam siam glaong saong lac sa dalam pak kaya ngak kong palei pala naih gheih pakat negar kayua Mentri Kong thuong Pablei salih ba tabiak.

Meng thun 2023, Sokfarm peih jitvu daok pandaok farmstay, raok 15-20 kapul tuai damuai yaok bilan ngan haong 100-200 mbang tuai damuai dalam saong langiu negar. Tuai damuai hu ba drei tame matxa bangu li-u, ta-eng mek ia bangu, ndih gilac di bein li-u huu co hijao halui saong ba drei tame labik ndung bak ilamo Khmer. Bruk ini pambuak 70 baoh sang pala li-u dalam bhum palei, rilo dalam nan hu meng lac mikva urang bangsa Khmer, brei bruk ngak karo kajap ka mikva. Sa-ai Thạch Thị Chal Thi, Yam ndok Kongti TNHH Trà Vinh Farm, brei thau lac:

"Langiu di bruk brei mek ia bangu li-u, Sokfarm daok hu danak dak raok tuai damuai jirah rivang mai ba drei tame ma-in. Adit halei jeng raok payak sa kapul tuai damuai jirah, sa kapul bhian hu yaok pluh urang. Tal ini rilo meng lac duah thau ka bruk mek ia bangu li-u, menyum ia bangu li-u that saong bruk ngak mbang di labik.”

Bahrau di ini, UB Bhap bini tinh Vinh Long hu ba tabiak Paok asal kadha jirah rivang hacih hijao brei ka dom gah ngak mbang pablei salih saong labik daok pandaok lac sa takai yam hu makna pamaong tal jirah rivang karo kajap, pagam haong pacang khik alam langik saong khik ramik ilamo di bhum. Paok asal kadha oh tok ndom tal ka kadha alam langik sinh thai, blaoh daok pachreih brei caik dahlau bruk pandar urang ngak bruk di bhum palei, sangka iek praong tal urang kamei saong urang gaok kan kandah. Amuk Nguyễn Thị Ngọc Dung, Phaok yam ndok So Ilamo, Pahat padhih saong Jirah rivang tinh Vinh Long, brei mboh lac:

"Khol dahlak peih ngak saong ba tabiak rilo dih gah sarak ka jirah rivang dalam nan hu jirah rivang gah ngak nong. Dalam nan ralo di nyu hu lac brei pambak tame kein lagaih ka gah ngak nong dalam bruk ngak nong piah meng nan patui tame Danak dak jalan ngak pakat negar padang palei pala bahrau, piah pandar rilo gah buh jien tame ha tang, dalam bruk buh jien tame ka menuac urang, ka sarak; piah ngak habar brei kein lagaih abih ka kinh te gam haong kein lagaih ka kinh te gah ngak nong.

Jirah rivang palei pala ngak nong oh lac sa janih kadha ka thaik bingu gheih ghang atau kaya mbang. Nan lac luac jalan pamedeih kein lagaih di bhum palei, patagok yaom kaom ka urang ngak nong saong khik ramik dom ilamo siam gheih di bhum taneran kraong Cuu Long./.