Rilo urang je saneng lac asau raong di sang sahnang oh hagait nan tuk asau kaik bhian klak tapa atau ta-eng pacang caga oh njauk tantu tani tanat. Min tui ilamu jru gru y khoa ye ini lac bruk ngak chung meda ngak kan kandah tal bruk diukrai. Kayua grauk inem kaik di anek athur, dalam nan lac asau raong di sang, jeng mbuan njom ruak trak meyah oh pacang caga ka njauk.

Dalam pabah anek asau hu biak rilo anek ruak. Tuk asau kaik, dom anek ruak ini meda njom tapak tame rup tapa inem kaik, ngak njom nerak. Ini lac bruk tamuh ruak rah tabiak rilo abih di dom mbang njauk asau kaik.

Tuk nyu barau kaik, inem kaik di nyu meda ngak saluah hasit di angak kulit, min hadei di nan rah tabiak rilo bruk yau ye barah, bhong meraih, pandiak atau nduac ia laneh. Dalam bruk kanjah trak, njom nerak meda pambak tabiak, ngak barah ralo kulit mô, njom nerak darah atau kan kandah dalam tal rup pabhap saong talei arak.

Njauk huac kanda di nyu oh lac tui tame labik kaik dalam atau kaoh blaoh nyu daok tui tame darah di rup urang nyu kayak hu prein jaga jit tal halei. Anek naih dan song urang taha mada mbuan si tamuh ruak glaong.

Bruk mboh huac kanda abih di nyu lac asau kaik lac mbuan njauk ruak kameruai gila. Ini lac ruak njom nerak ngak kan kandah kayua virus mbang tame majam talei arak, saong jaik yau abih 100% ba tal metai meyah tamuh ruak gila kamruai. Ruak meruai gila kayua asau kaik meda pa-auk ruak dalam rilo adit, gaok mai rilo bilan. Tukvak akaok bhian mboh dreih yau ruak kum yau ye pandiak rup, pandik akaok, glaih glar, min hadei nan samar drah tamuh ruak trak ngan haong dom bruk yau huac ia, ndaoh rup, srau kadau bruk thau ka drei jan. Kayua yau nan, juai iek lap mada mboh inem kaik sit.

Tuk asau kaik, mikva brei ngak dom bruk yau ye:

Rao hacih sa-at labik asau kaik meng raok nding ia dalam 10-15 minit, rao meng jabon piah neh klak virus saong anek ruak; Pametai anek ruak di inem kaik meng ia jru dung dich njauk lagaih di nyu; Khik darah meyah khin hu, min oh papaok biak sir biak kajap. Hadei nan mai tal labik y te samar drah di halei siam di nan piah hu pasang iek saong klauk jru caga. Bac si brei kakei caga tani tanat abih tuk klauk jru caga ruak meruai, huyet thanh pacang ruak meruai atau klauk jru caga uốn ván di yaok bruk.

Tuk mboh dom bruk yau ini ye brei nao pasang iek ruak drah samar chip:

Inem kaik dalam, haok darah rilo.

Labik kaik barah, pandik atau hu laneh.

Pandiak rup atau glaih glar tuk asau kaik.

Oh ka thau asau hu klauk jru caga ruak paje ha oh.

Asau kayak drei mboh nyu oh yau bhian yau ye jhak sanak, haok ia pabah.

Tuk inem kaik sit, jeng brei nao tal labik y te piah pasang iek, khik kajap bruk karo salamat.

Piah pacang caga asau kaik saong njom mbak ruak, mikva brei klauk jru caga ginup ka asau raong; Oh palao asau tabiak barat di jalan dan dalam sang; Pato uranaih bruk gaok salamat haong anek athur raong; Tui iek bruk oh yau bhian di asau.

Langiu di nan, yaok urang jeng brei caga ilamo brei thau ka bruk pacang caga anak meta piah dil samu pacang caga tuk rah tabiak bruk asau kaik.

Asau lac anek athur raong jaik taphia di manuac urang, min oh njauk lac nyu oh hu kaik. Sa inem kaik maong dreih yau oh hu hagait meda ba tal bruk kanjah trak meyah drei oh caik hatai.

Asal kadha hu makna abih brei caik hatai hu lac: dom inem di asau kaik jeng brei hu pacang caga njauk lagaih saong tui iek y te, yaom lac asau karei atau asau raong di dalam sang./.