Bac si chuyen khoa II Đỗ Võ Công Nguyên, Akaok Gah khoa iek dlau Chan ndoan thaik thaot, Sang iek ruak Thong Nhat brei thau, gam haong dom phim MRI bhian biasa, bac si jeng taong yaom hu bruk kurang, barah iai tuy talang atau ngak kan kandah sụn. Min tapi, AI urak ini meda ngak langyah dalam jang yau dut tanut kapal, the tich  sụn saong thau ka dom salih sinh hóa meng biak aval drah. Meng nan, bac si hu veik labik karo kajap piah ka tiên lượng saong ba tabiak jalan pacang cakak dil samu:

“Meng AI, bac si meda taong yaom dom salih di tanut langyah dalam sụn atuk talang, meng nan nyu mada mbuan si kurang atuk talang ta-uk aval drah piah srap gap caga. Pagap yau, bac si meda ndom meyai pathau khan ka urang ruak patrun kilo, palagaih bruk mbang huak, pasram saong padeih njauk lagaih piah patakik bruk kurang atuk talang rah tabiak samar”.

Tui PGS.TS.BS Võ Thành Toàn, Phaok Yam ndok Sang iek ruak Thong Nhat, labaih 5 thun jaik ini, AI dak harei dak brei mboh bruk dalam gah pasang iek thaik thaot saong duah thau ka ruak kik ralo janih. Meng hu “bac” meng rilo du lieu thaik thaot, majam meda kakei caga aval dom bruk yau ye sraiy ia khan màng phổi, bak arthak màng phổi atau medil barah phổi di angaok phim X-quang tada. Langiu bruk ngak hu ilamo, AI daok rik daong palagaih bruk pasang iek sang iek ruak tapa bruk ramik dak tukvak pasang iek ruak, rabha urang ruak, pasang iek caneing saong dui ba bilik blac raih dalam tuk urang pasang iek ruak saong taong ruak dak harei dak tagok glaong:

“AI lac sa bruk daong bac si lac oh ka salih urang ngak bruk gah y te hu. Min, meyah urang ngak bruk gah y te oh pandar AI ye lac nyu oh lagaih, sumu. Dahlau diah, sa urang bac si naih joi ralo di abih iek bac puac hu labaih 100 phim X-quang dalam sa harei lac biak kateik geik, min gam haong bruk puac anak meta, kakei caga bruk oh bhian ngan haong bruk je tame glaong, urang bac si brei pataom tame pasang iek, taong yaom gilac saong duah mboh dom bruk ilamo chuyen mon njauk hu”.

Di Sang iek ruak Ung Buou Ban raya Ho Chi Minh, AI daok hu mbaok tapak tame bruk brei mboh ka phác đồ taong ruak ta-eng menuac urang ka urang ruak dalam bruk blac raih phẫu thuật, xạ trị saong taong ruak taong abih dalam rup pabhap. Siam lagaih mboh cambaih laih abih brei khan tal bruk AI daong puac bruk ngak hu di giải phẫu ruak ung thu tasau saong ung thu phoi.

Tui TS.BS. Diệp Bảo Tuấn, Yam ndok Sang iek ruak Ung Buou Ban raya Ho Chi Minh, AI hu bruk di nyu yau sa kaya brei ieik tham chiếu hu makna dahlau tuk bac si ba tabiak bruk mbaoh tangin puac luac di abih:

“Sang iek ruak daok pandar AI piah daong duah mboh dom dot bien gên – sa bruk tacei hu makna dalam dom ruak ung thu yau ung thu tasau, ung thu tung guel saong ung thu phoi jantung. Langiu di nan, AI jeng hu pandar dalam bruk puac CT phoi piah daong duah mboh ka aval drah di abih dom kan kandah. Dalam tukvak anak tal sang iek ruak brei patui veik peih praong bruk pandar AI dalam rilo gah njauk lagaih haong hatai caong khin lagaih saong bruk peih ngak”.

Thau truh gah tani tanat bruk kuhria di So Y te Ban raya Ho Chi Minh, gah y te ban raya daok jhul khang bruk salih lek taka so taong abih piah padang sa majam y te hadah krah, daong kapul urang y bac si patakik kateik geik, paglaong asar siam ilamo chuyen mon saong peih praong Bambang pandar jitvu y te siam glaong ka rahra bhap bini./.