Hadei di pambuak pagam gauk, tinh Tay Ninh hu 19 xa ndih di bhum taneh tapen nagar, yaom mada kinh te – xa hoi daok ralo kan kandah, min dom pakat karja hu caik hatai buh prein ngak ha tang daong pasalih lek taka so, majam internet, rayak nao mai, pasak daong bruk di karja; dom bruk ngak pasalih lek taka so, daong ka raidiuk mikva dak harei dak siam makre lagaih jang piah jaik taphia jang saong dom bruk mayit mayao jaman bahrau.

Di xa Long Thuận, bruk pandar kong nghe khau tin dalam bruk langyah brei ka bhap bini ba mai ralo siam makre. Jabat ngak bruk tui “sa pabah mbang” hu pandar tui taka so daong ka bhap bani sahnang ka harak gal, iek glang jeng ye dom janih gah drah samar jang, pakurang hu bruk nao mai bih ralo tukvak yau meng dahlau.

Phaok Akaok UB Bhap bini xa Long Thuận, amuk Trần Thị Tánh brei thau lac, bhum palei oh sa janih buh jien tame blei jamariak, ndap nda baoh kadha brei ka bruk pasalih pasalih lek taka so blaoh daok pandar AI piah daong rahra bhap bini ngak harak gal sahanang jang. Kayua hu yau nan bruk panak pakatut masa ngak bruk, patagok kandang bruk hit, jien ndo jeng ye paglaong njauk hatai brei ka bhap bini rahra.

Xa Phước Chỉ jeng gam ngak bruk pasalih lek taka so dalam bruk ngak jabat karja. Di Pasak daong jabat karja pakat xa, urang jakar, urang pan akaok jabat karja hu daong brei ganap compute pambuak internet, bhain brei pato ilamu kong nghe khau tin piah daong ngak tui ilamu pasalih lek taka so.

Sa di dalam janih mboh di mata hu bruk pasalih lek taka so di dom xa tapen nagar di Tay Ninh yau ye bruk “Bhap bini bac pasalih lek taka so”. Ini lac yau ye sa janih ngak njauk piah brei daong patagok ilamu pasalih so brei ka bhap bini, dalam nan hu brei daong ka urang praong urang taha jeng ye urang ngak nong gam saong urang bhap bini daok di atah bayah.

Di xa Phước Chỉ, bruk ngak “Bhap bini bac pasalih lek taka so” jeng daok peih ngak siam tui ralo janih kadha. Urang rahra hu brei daong di sang Ilamu, daong di kapul bhap bini atau tui tapa harei dakvah dalam bhap bini tal dom baoh sang. Dom janih kadha yau ye duah iek khao tin, pandar mang xa hoi salamat, bayar jien tui app atau pandar dom janih kadha karei dalam bruk ngak nong mbuan sanang si bac magru, lagaih lagua brei ka urang bac.

Xa Long Chữ jeng padang 12 Kapul ngak kong lek taka so bhap bini gam saong 377 urang akaok palei, akaok kapul jeng ye urang thau gah ngak kong nnghe khau tin. Dom Kapul Ilamo kong nghe taka so bhap bini dang akaok bruk ngak dalam dom bruk daong ba urang thau pandar VNeID, jitvu karja tapak online, bayar jien oh bayar jien mbaok jeng ye tapuk iek glang prein yava tui online.

Meng bruk ngak siam tui mbang akaok meti dahlau camreip, mboh lac bruk pasalih lek taka so oh daok atah bayah saong bhum taneh atah bayah di tapen ngar daok di tinh Tay Ninh blaoh mboh dak harei dak jaik tapha saong bol bala rahra urang Tay Ninh. Ha tang lek taka so hu daong brei ngak gam tui, ilamu pandar nyu jeng hu brei paglaong, ralo bruk mayit mayao labik online daong panak ilamu urang daok di tapen jeng ye urang daok di pasak ban raya.

Oh sa janih brei prein khang ka patagogok kinh te – xa hoi, pasalih lek taka so blaoh daok brei patagok bruk ngak pan bruk nagar, khik kajap taneh ia, karo kajap brei ka tapen nagar. Meng dom bruk ngak brei ka pasalih lek taka so nan, bhum taneh ia tapen nagar di Tay Ninh daok dak yam dak ba ragam gam gam tagok dalam tỉnh, peih tabiak ralo janih kadha patagok drah samar jeng ye karo kajap di tukvak meng anak./.