Meng luac jalan pagam haong hamu padai, daong haong urang ngak nong pandar ilamo ngak kong, ong Doãn Văn Chiến, Phaok Yam ndok dang bruk di Pasak Pachreih urang ngak nong pakat Negar bhum Tanerran kraong Cuu Long, ndom mayai lac: rilo bruk di ini hu ba mai siam lagaih mboh cambaih laih, yau ye patakik pajaih pala meng 120–150kg dahlau trun daok labaih 80kg/ha, pambuak ngak jamraik di dom gah ngak tabiak padai, daong patakik jien buh tabiak, patakik jien pah manuac urang ngak min jeng khik kajap bruk ngak tabiak. Min, hadei di tuk bruk ini salah blaoh, oh takik urang ngak nong gilac mai jalan ngak meng dahlau, brei mboh salih lek taka so oh lac sa janih pandar ilamo ngak kong blaoh daok lac luac jalan salih hatai sahaneng. Meng lagaih di bruk peih ngak, ong Chiến tacei tabiak klau kan kandah praong:

“Kan kandah praong abih urak ini ieu lac mai meng hatai sahaneng, kayua salih jalan ngak mbang di mikva oh meda lac chreih ngak tuk halei hu tuk nan. Blaoh lac halau phun jien di HTX daok takik, khin buh jien tame ka ilamo komg nghe brei hu luac jalan njauk lagaih. Saong puac abih lac bruk pandar ilamo ngak kong nghe lek taka so di urang ngak nong, meng bruk pandar app tal dom ndap nda kaya pasang iek bruk ngak mbang jeng hu tacei ba piah mikva randap lagaih rah rah”.

Urang jru ilamo gah kinh te Nguyễn Hoàng Dũng brei thau, kadha salih lek taka so dalam bruk ngak nong urak ini oh kurang ilamo ngak kong, blaoh nyu daok kurang sa he sinh thai njauk je tame piah urang ngak nong khang hatai salih. Kan kandah akaok meti daok di ha tang lek taka so saong bruk rabha gah di dom nen tang. Urak ini rilo meng lac phan mem duh ka bruk pala drak, brei thau labik pala, pasang iek labik ngak mbang… kayua gah ngak mbang pablei salih ta-eng menuac urang atau dom kapul peih mbang ngui patagok, kurang sa tanut di nyu piah pambuak du lieu, ngak ka urang ngak nong rabha tian dalam bruk palih ruah:

“Dom bruk kein lagaih ye thei thei jeng mboh, yaom kaom tagok, pablei tabiak, he sinh thai… Drei ndom mayai lac lagaih ye mbuan paje, min piah salih hu ye hu dom kan kandah. Dahlak sahaneng akaok meti karja brei buh jien tame ka phan mem haong gauk, brei ka yaok ndap nda kaya, yaok bruk, yaok gah, yaok bhum palei, blaoh ba tabiak yau angan je di negar. Meyah hu ye brei ba hatai je ka urang ngak nog piah khang hatai salih samar jang”.

Jeng hu rilo thun ba drei tame ngak nong ilamo kong nghe glaong, tui ong Lâm Nguyễn Hải Long, Akaok Kapul tin hoc Ban raya Ho Chi Minh – meng dahlau ngak Yam ndok, Kongti phan mem Quang Trung, salih lek taka so dalam gah ngak nong oh ka tuk halei lac kadha tok ba phan mem tame ngak mbang, bo lac luac jalan salih taong abih bruk ngak mbang, bruk pandar saong hatai sahaneng buh jien tame.

Ong Long hu batangin tame ngak iek pandar taka so tame bruk pala tamun ia meng rilo thun dahlau, tukvak kadha salih lek taka so daok biak bahrau. Piah padang hu majam du lieu hu je tame ka sa janih phun pala, gah ngak mbang pablei salih oh meda ngak dalam dom bilan blaoh daok brei pasang iek rilo tapa rilo mbang pala, dit iek yaok tanut alam langik, bruk cakrok, dinh duong, jit ruak… blaoh ngak njauk du lieu tui yaok pajaih phun cambaih laih. Ong Long brei thau:

"Khol dahlak brei ngak du lieu takik di nyu abih klau bilan, yaok bilan 72 harei, harei halei jeng brei pasang iek, taduan biak cambaih laih. Taong abih luac jalan nan brei dut pagap meng klau tal nam bilan ye du lieu meng tabiak hu. Dom bruk ini brei hu buh jien tame, meng jien padai, tukvak ka tal hatai chreih takre di drei ye meng ngak jeng du lieu nan. Hu du lieu blaoh meng bad rei tame patagok hu, min nyu biak kan.”

Tuk darak pasar tagok trun rilo, caong khin dak harei dak glaong ka asar siam, ngak tantu cambaih laih, meyah urang ngak nong, HTX oh srap gap salih, oh lagaih, bruk mbuan kadun gilac gah likuk lac bruk kan plaih hu./.