UB Bhap bini phuong Ea Kao, tinh Dak Lak peih ngak danak dak livestream ngan haong kadha “Palei Tơng Jŭ, Ea Kao likau salam”, brei papar tapak angaok dom mejam online. Dalam danak dak, dom ndap nda jih dalah hu munyim ngak meng tangin di urang Randaiy hu yaih khan, meng khan ao likei kumei, khan ao uranaih, ao atah, khan sraok nao ma-in tal ka vat, khan bai lang kapal saong dom janih ndap ndap hu ngak bahrau. Yaok janih ndap nda hu meyaih khan biak cambaih laih ka ilamo, pandap ngak, jalan ngak tabiak saong makna ilamo pambuak pagam haong rai diuk di bhap bani.

Tui ong Trần Công Hữu, Phaok akaok UB Bhap bini phuong phường Ea, jalan ngak ini oh lac piah ngak brei cambaih laih jang tui Sarak nagar 57 bo daok ngak brei salih bahrau dalam hatai saneng meyaih khan saong blei pandar ndap nda puk palei.

“Danak dak live stream oh lac meyaih dom yaom ilamo meng kan, labik peih ngak ma-in, bruk ngak mbang di urang bangsa Randaiy blaoh daok ngak brei jhul khang tagok bruk pablei ndap nda ngak di palei, pagam haong bruk cak rok patagok kinh tế pambuak pagam haong khik ramik asal ilamo. Tapa bruk ngak live stream ini, khaok dahlak caong khin ba mai dom bruk ma-in iek ka nyu jaik taphia, chreih takre saong rilo drut droi”.

Tui bruk ngak ini, tuai damuai meda mong iek hu dom labik dalam puk palei, duah thau hu ka bruk ngak meng kan, mbang hu kaya mbang, ma-in iek hu rai diuk, bruk ngak mbang gam haong bhap bani. Amuk H Yam B. Krông, akaok kapul ngak jirah bhap bani di palei Tơng Jŭ, phuong Ea Kao, tinh Dak Lak klah rabha, bruk ngak rivang sirah bhap bani peih tabiak jalan nao bahrau ka bhap bani tuk gam cak rok patagok bruk ngak mbang kinh tế gam khik hu grap ar ilamo.

“Hu mbaok tame bruk jirah rivang mikva meda ngak rilo bruk, pagap yau ye pala njam, raong glang, pala drak, dom janih ndap nda di mikva ngak tabiak hu ba nao pablei di labik drei daok, nan lac kadha njauk bui sambai. Kayua yau nan ye tuk bruk jirah rivang cak rok patagok dalam phường Ea Kao ye dahlak gam haong mikva thei jeng bui sambai, piah hu jalan ngak pasiam rai diuk yaok harei di drei dak harei dak siam jang. Langiu di nan lac gam khik ramik hu drap ar ilamo di puk palei”.

Gam haong dom bruk ngak di puk palei, bruk panduan salih ilamu lek taka so di tinh Dak Lak peih ngak samu gauk. Ong Trần Quang Năm, Phaok akaok Muyim Dak Lak brei thau, bruk pandar ilamu lek taka so taka piah patagok baoh jeng siam mekre dalam bruk roh duah, rabha janih saong palih ruah ndap nda, harak gar duh ka dom mbang parang iek tui yaok kadha:

“Muyim hu brei ngak tui ilamu lek taka angka so dom janih ndap nda, taka dom bruk ngak adat cambat tanarakun bhap bani meng kan di dom bangsa dalam tinh. Pandar dom ilamu  AR, VR piah hu pambuak bruk nao mai, ma-in iek di tuai damuai haong dom yaom inem krung ilamu meng kan di tinh Dak Lak”.

Tal harei ini, mejam lek taka duh ka bruk pathau khan ta-eng hu padang ngak di 3 inem mek dak rai sajarah pakat negar dalam tinh Dak Lak. Dom harak gả brei thau ka dak rai inem mek, thaik binguk, bản đồ, harak gar, video, adat cambat tanarakun meng kan hu taka, ngak jeng mejam brei ka bruk cak rok patagok dom janih pandap nda rivang ma-in hu dalam. Panduan salih taka daok pabak brei jang mblang taneh piah ka ilamo mblo mbaok cambaih laih jang dalam rai diuk bhian harei di Dak Lak. Tapa di nan ngak brei pambak praong yaom kaom ilamo, peih tabiak jalan ngak mbang patagok paralo jien mek tame brei ka bhap bani saong yam tal jalan ngak mbang khang kajap ka bruk rivang jirah ma-in di di bhum palei dalam jaman bahrau./.