6 mlan akŏ thŭn anei, Lĭng kahan răng mgang knông lăn čar Dak Lak pral thâo klă klei mâo hlăm lehanăn êngao krĭng knông lăn; ksiêm dlăng, mtrŭt dŭm anôk bruă mprăp hdră kdơ̆ng mblah lehanăn pŏk ngă kjăp hdră msir kriê dlăng, răng mgang knông lăn lehanăn alŭ wăl.

Blŭ ti knăm anei, Nguyễn Trọng Nghĩa mtă, hlăm wưng ti anăp, Lĭng kahan răng mgang knông lăn Dak Lak lŏ bi kjăp anôk bruă kđi čar, hluê ngă tŭ dưn dŭm gru hmô đru kơ mnuih ƀuôn sang mđĭ kyar bruă duh mkra – ala ƀuôn, msir klei ư̆ êpa, bi hrŏ klei ƀun knap, mkŏ mkra hdră jih jang mnuih ƀuôn sang răng mgang kjăp klei êđăp ênang. Krơ̆ng kjăp hdră bruă lĭng kahan, đru mkŏ mkra krĭng knông lăn êđăp ênang, mjĕ mjuk, bi hgŭm lehanăn đĭ kyar./.