Amăng mơguah hrơi blung a mă bruă tơdơi kơ pơmut glăi tơring čar, khua mua djop sang bruă gah gơnong bruă Ngă hmua hăng Ayuh hyiăng tơring čar Dak Lak phrâo, hơmâo git gai jơnum pơpha bruă mă, jao tơlơi dưi, ngă tui sa hơnơ̆ng hơdră lir hơbit amăng bruă mă. Hơdôm boh yom phun kah hăng jŭ yap glăi djop mơta bruă mă dŏ kơđông aka pơsir abih, đing nao hlâo pơsir hĭ bruă mă ječ ameč hlâo, djru kơ bruă ngă hmua pla pơjing, wai lăng kông ngăn hăng ayuh hyiăng hơmâo pơsỉ laih, kiăng pơphun ngă bruă ba yua djơ̆ lăp, huăi tơ̆i đưn, hruaih na nao.

Ơi Mai Vũ Quốc Bảo, khua mua apăn bruă Wai lăng anŏ tŭ yua ngă hmua, kyâo glai, akan hơdang hlâo adih mă bruă ƀơi tơring čar Phú Yên hơđăp lăi:

“Hăng pran jua mă bruă prăp lui mơtam kơ bruă mă. Hrơi blung a nao mă bruă pơ anih phrâo, dưi hơmâo prăp lui tong ten ngă gêh găl anih dŏ, ƀong huă, rô nao rai mă bruă, truh mông anai, kâo pơphun mă bruă ƀuh ăt kiăo tui hmao mơ̆n hăng tơlơi pơtrun mơ̆ng khua mua pơ dlông ăt kah hăng bruă mă djơ̆ hăng tơlơi thâo ta hrăm laih”.

Ơi Đỗ Tuấn Hưng, Khua anom bruă wai lăng anŏ tŭ yua ngă hmua, kyâo glai, akan hơdang tơring čar Dak Lak, brơi thâo, tơdơi kơ pơmut glăi hơmâo dơ̆ng 8 čô mơnuih apăn bruă mơ̆ng Phú Yên đĭ nao pơ Dak Lak mă bruă. Truh ră anai, abih bang mơnuih phrâo nao mă bruă ƀơi anih plơ̆ng ăt hơđong laih anih dŏ, anŏ ƀong huă, prăp lui djop bruă či ngă amăng tơlơi pơhing phrâo.

“Ƀing gơmơi jơnum pioh pok pơhai, pơpha bruă mă kơ rim čô mơnuih mă bruă amăng anih bruă phrâo amăng sang bruă kiăng tañ thâo tong, bruă či ngă, hơdră či pơphun đah mơ̆ng hruaih, bruă mă amăng 6 blan rơnuč thun huăi kaih hăng kơđong hĭ”.

Yă Đặng Thị Thủy, Kơ-iăng Khua Gơnong bruă Ngă hmua hăng Ayuh hyiăng tơring čar Dak Lak lăi pơtong,  abih bang amăng anom bruă hơmâo ngă hrŏm tong ten, hmar kiăng hơđong amăng sang bruă, anom bruă, đah mơ̆gn tơgŭ ngă bruă hơđong hăng pơtum ngă tui djop jơlan hơdră, akŏ bruă bơwih brơi pơđĭ kyar bơwih ƀong huă mơnuih mơnam amăng tơring čar tơdơi kơ pơmut hĭ jing sa.

 “Ƀing gơmơi prăp laih pran jua mă bruă pơgôp hrŏm akŏ pơdong bruă mă pơđĭ kyar kơ bruă ngă hmua, hneč mă anŏ gêh găl lu mơta bruă ngă hmua pla pơjing kiăng ba anom bruă ngă hmua hăng ayuh hyiăng pơđĭ kyar rơgoh hơdjă, juăt lăi mơtah mơda, brơi kơ tơring čar phrâo. Laih anun anai lĕ hrơi mông gêh găl hloh pơphun glăi bruă mă ngă hmua pla pơjing-pơgang ayuh hyiăng anih dŏ jum dar tui anăp ngă bruă phrâo rơgơi laih anun hiam mơak, rơgoh hơdjă brơi kơ ayuh hyiăng lŏn mơnai glai glô”.