Ƀơi hmua pla hơbơi čên či să Dak N’Drot, tơring glông Dak Mil, tơring čar Dak Nông, mông mă bruă dik dak mơak biă mă. Giăm 30 čô kông ñơn glăk buč hơbơi čên, jua puăi tlao mut hăng jua măi đuh. Ayong Y Đắp Kbuôr, ƀơi ƀuôn Trắp B, să Čư̆ Mgar, tơring glông Čư̆ Mgar, tơring čar Dak Lăk ră ruai, ñu prôk nao mơ̆ng guah kiăng hmao buč hơbơi čên pơ anai:

“Kiăng hmao buč hơbơi čên, ƀing gơmơi pơƀut nao mă bruă. Gơmơi mơak biă mă, hơmâo bruă mă hơmâo prăk kăk amăng akŏ thun phrâo”.

Ăt prôk nao mơ̆ng mơguah kiăng hmao ngă bruă, yă Lê Thị Lan, ƀơi să Ea Drơng, tơring glông Čư̆ Mgar, Dak Lăk hok mơak biă lơ̆m hrơi blung a nao mă bruă hơmâo pô hmua li xi prăk.

“Amăng hrơi blung a gơmơi nao mă bruă, gơmơi hơmâo pran biă. Hrơi blung a nao mă bruă hơmâo pô sang li xi prăk, čang rơmang thun 2025 hơmâo lu bruă hơđong hloh”.

Ơi Lại Cao Điền, pô hmua hơbơi čên brơi thâo, 7ha hmua hơbơi čên Japan anai hơmâo ƀing mơdrô pơkă nua laih, dua bơnah tŭ ư laih mơn hrơi mông jao gơnam. Yua hơmâo ngă hră hlâo yơh, anun jing mrô kông ñơn mơ̆ng Dak Lăk pơƀut đĭ rơdêh nao mă bruă kiăng hmao, pơhlôm djơ̆ hrơi ba nao gơnam kơ ƀing blơi.

“Ră anai nua hơbơi ăt pơmă ƀiă mơn, anun jing pơhmao mă bơyan tê̆t hơmâo pơ-iă či buč, ƀing blơi hai tŭ ư ngă hră hăng gơmơi hlâo laih, nua ñu 12.000 prăk/kg blơi pơ hmua, laih anun prăp lui mơnuih mă bruă, iâu gum djru nao rai. Ngui thun phrâo mơak mơai samơ̆ ƀu wơr kơ bruă ôh, lơ 4 gơmơi nao mă bruă laih yua dah hơbơi čên truh hrơi buč ba sĭ laih”.

 Hơdôm hrơi anai ăt jing hrơi mông lu mơnuih ngă hmua ƀơi hơdôm boh tơring čar kual Dap Kơdư nao pruih kơphê, sâu riêng hăng lu phun pla pơkŏn. Glăk dŏ pruih 1ha kơphê pla plah sâu riêng, ơi Vũ Văn Thắng, tơring kual Ea Tling, tơring glông Čư̆ Jut, tơring čar Dak Nông lăi:

“Hơdôm hrơi rơgao gơmơi dŏ pơ sang ngui ngor ƀong tê̆t, neh met wa thun anai mơak biă, hơmâo ƀong tê̆t trơi pơđao ƀiă mơn. lơ 4 tê̆t ƀing gơmơi hyu laih, nao pruih kơphê, sâu riêng, čang rơmang nua hơđong na nao tui anai, rơnuč thun jing neh met wa hơmâo pran biă”.

Ơ Y Danh Niê, ƀơi ƀuôn Knia 3, să Ea Bar, tơring glông Buôn Đôn, tơring čar Dak Lăk ăt glăk dưm đing ƀek pruih kơphê. Ơi Y Danh brơi thâo hơmâo pruih tal blung a hlâo kơ lơ 20 blan Chạp. Ƀong tê̆t giong jing bơnga kơphê añot laih, krĕp pruih tal 2. Pruih kơphê giong lĕ sang anŏ yuă pơdai laih anun rơnuč blan 1 blan di lĕ pĕ tiu dong.

“Tê̆t abih laih, ră anai sang anŏ gơmơi pruih ia kơphê, tiu. Thun anai sang anŏ kâo čang rơmang đang kơphê, tiu hiam, čuh bơnga pơadai boh lu, kiăng hơmâo hloh. Ăt kiăng nua gơnam thun anai hơđong, pơmă ƀiă đah mơ̆ng hơdip dơnap hloh kơ thun rơgao”.

 Tơdơi kơ hơdôm hrơi ngui ngor ƀong tê̆t, mơnuih ƀôn sang pơ hơdôm boh tơring kual Dap Kơdư dik dak nao bruă laih. Amăng hrơi akŏ thun phrâo, neh met wa lêng kơ čang sa thun phrâo ngă hmua pla pơjing lăp djơ̆, tơphă tơphai, pơdai mơboh jor kơtor mơboh lu, nua ñu đĭ.