Bruă pơblih phrâo wai lăng, pel ĕp tong ten gơnam yua mă bruă ngă hmua hăng kơtưn ngă hrŏm amăng bruă pơđĭ tui rơnoh sĭ mơdrô dưi lăng kah hăng hơdră yom pioh pơsir hĭ tơlơi tơnap tap laih anun anăp nap pơđĭ kyar hơđong kơjăp amăng bruă sĭ mơdrô boh sầu riêng- sa bruă mă sĭ mơdrô pơhrui glăi prăk klai dolar.

Anai lĕ tơlơi pơgôp hiăp dưi hơmâo lu khua mua pơdah thâo amăng mông jơnum bơkơtuai nao rai online lơ 10/6 ƀơi Hà Nộ, hơmâo lu khua mua pơ ala mơ̆ng ding jum, anom bruă gơnong dlông, Khul sĭ mơdrô añăm pơtam boh čroh Việt Nam, ƀing mơnuih rơgơi kơhnâo gah bruă ngă hmua, sang bruă sĭ mơdrô hăng ƀing ngă hmua blôk prong pla boh durian ƀơi anih pơtruh nao rai či Cần Thơ, Dak Lak hăng Tiền Giang.

Ƀing khua mua lăi pơtong, boh durian ƀudah sầu riêng lĕ boh čroh jing gơnam sĭ mơdrô phun, djru hrŏm lu biă mă pơhrui glăi prăk kăk sĭ mơdrô kơ Việt Nam. Khă hnun, hrŏm hăng anŏ gêh găl prong ăt hơmâo mơ̆n anŏ aka ƀu găl dŏ kơđông hĭ hăng lu tơlơi lông lăng. Anŏ pơkă tong ten mơ̆ng anih blơi kiăng ngă rơgoh hơdjă, tŭ yua, brơi ĕp djơ̆ phun tơdŭ anih pla, gru pơkă kơnăl kual pla pơjing; tơlơi kơƀah lir hơbit pơgang rơnoh sĭ mơdrô; tơlơi pơhing pơđĭ kyar hmar đơi ƀu hơmâo sem lăng hlâo; tơlơi či hơmâo arong aruač hlăt pơčram; anŏ sat yua pơblih ayuh hyiăng; laih anun tơlơi tơki đơi mơ̆ng anih sĭ mơdrô jing sa tơlơi aka ƀu pơsir djơ̆ lăp. Tui hăng ƀing mơnuih rơgơi kơhnâo lăi, kiăng pok pơhai ngă tui mơta lu hơdră pơsir hmao kru, ječ ameč hloh amăng anun pơblih tơlơi pơmin amăng bruă git gai wai lăng. Bruă čih pơkra tơlơi phiăn sem lăng tong ten mơ̆ng mông mă bruă phrâo pla, phrâo truh bơyan bơnga truh kơ bruă wai lăng boh tha, pĕ ba sĭ mơdrô jing sa bruă mă yom hloh, kiăng mă glăi tơlơi đăo kơnang mơ̆ng mơnuih blơi yua hăng pơjing atur kơ bruă pơđĭ kyar hơđong kơjăp mơ̆ng anom bruă anai.