Tui hăng akŏ bruă dăp glăi anom bruă gưl tơring čar thun 2025, dêh čar ta amra hơmâo 34 boh tơring čar, ƀôn prong, hơmâo 6 boh ƀôn prong hăng 28 boh tơring čar. Ƀing khua, mơnuih mă bruă sit nik tơdơi kơ dăp glăi hơmâo abih bang ñu rơbêh 477 rơbâo čô; Anih mă bruă rơbêh kơ 38 rơbâo; hơmâo mă yua giăm 34 rơbâo anih, jing dŏ rơbêh hĭ 4 rơbâo anih.

Bơkơtuai ƀơi grup kơ Kơčăo bruă anai, ƀing khua tŭ ư hăng hơdră dăp glăi hơdôm boh tơring čar, ƀôn prong thun 2025 laih anun ƀuh hơdră dăp glăi anom bruă gưl tơring čar yua Kơnuk kơna ba tơbiă hơmâo kiăo tui tơlơi pơtrun, pơhlôm lăp djơ̆ hăng tơlơi git gai, pơtô ba mơ̆ng gưl wai lăng. Ơi Dương Khắc Mai, grup khua mơ̆ng Dak Nông pơsit, pơmut hrŏm tơring čar jing tơlơi pơsit prong yôm biă, kơđŏm gru grua. Bruă lĕ tơdơi kơ pơmut hrŏm, hơdôm boh tơring amra dưm dăp prăp rơmet khua mua, mơnuih mă bruă hiư̆m pă laih anun mă yua hơdôm anih mă bruă rơbêh hiư̆m pă:“Tơlơi yôm hloh lơ̆m pơmut hrŏm lĕ ƀing ta hơmâo bong lui ƀing khua mă bruă rơgơi. Dua dong, kơ anih mă bruă khŏm wai lăng kjăp, ƀu brơi ngă răm rai, kiăng prăp rơmet tong ten đah mơ̆ng pơdŭ đuăi gơnam tam mơ̆ng hơdôm anom bruă rơbêh”.

Tui hăng ơi Trần Hoàng Ngân, grup khua mơ̆ng ƀôn prong Hồ Chí Minh, pơmut hrŏm tơring čar, amra djru hơdôm boh tơring dăp glăi anih anom či pơđĭ kyar. Tui hăng ñu, kiăng hơdôm boh tơring čar, ƀôn prong pơtrut tơlơi gêh gal, mă bruă tŭ yua tơdơi kơ pơmut hrŏm ƀing ta kiăng ngă tui anai:“Ngă hiư̆m pă kiăng hơdôm plơi pla amăng tơring čar pơtruh nao rai djơ̆ hrŏm, pơhlôm djŏp anih anom, ƀu djơ̆ kơnong jơlan nao rai đôč ôh hơmâo tom hăng măi mok boh thâo mrô. Tơlơi anun kiăng hơmâo djŏp mơta tơlơi gêh gal, bơ yôm hloh lĕ prăk kăk. Anun jing kâo rơkâo lơ̆m pơtŏng glăi Tơlơi phiăn prăk kăk kơnuk kơna lĕ lŏn tơnah rơwang 5 thun 2016-2030 ƀing ta kiăng pioh glăi kơ hơdôm boh tơring čar ƀôn prong, kiăng hơdôm boh tơring čar ƀôn prong hơmâo prăk kăk tuh pơ alin ngă hơdôm ring bruă anai”.

Kơ-iăng khua dêh čar ơi Nguyễn Hòa Bình pơsit, bruă dăp glăi anom bruă gưl tơring čar tal anai jing tơlơi ngă hơkrŭ phrâo gah anom bruă kơnuk kơna hăng mơnuih mă bruă. Tơlơi yôm phun kiăng hơmâo lĕ akŏ pơdong anih mă bruă lăp djơ̆, hơmâo anih đĭ kyar bơwih ƀong huă dưi kơtang, pơlir hăng tơlơi gêh gal mơ̆ng rim kual, wơ̆t čư̆ hăng ia rơsĭ. Him lăng, lơ 30/6, abih bang tơring amra lăi pơthâo anăn anom bruă phrâo mơ̆ng tơring čar, să, hrŏm hăng khua mua git gai phrâo wơ̆t Ping gah hăng gong gai. Mơguah lơ 30/6, hơdôm anăn ƀing khua gưl tơring čar, gưl să amra hơmâo lăi pơthâo, laih anun mơ̆ng lơ 1/7, anom bruă phrâo dua gưl amra sit nik mă bruă.

Bơ tui hăng Khua ding jum bruă čar yă Phạm Thị Thanh Trà, bruă dăp glăi anom bruă hơmâo pơtŏng lăng rơđah laih, sem lăng mơ̆ng lu mơta, mơ̆ng đơ đam lŏn, mrô mơnuih, gru grua, djuai ania, tơlơi đăo, bruă đĭ kyar pơ anăp hăng tơlơi pơmin mơ̆ng mơnuih ƀôn sang:“Dăp glăi anom bruă kơnuk kơna gưl tơring čar kiăo tui kual lŏn anăp nao pơ ia rơsĭ prong, laih dong mơneč mă tơlơi gêh gal bơwih ƀong ia rơsĭ hăng tơlơi gêh gal mut hrŏm tui rơnuk phrâo. Ding jum kơđi čar, Khul khua gum bruă git gai Ping gah, biă ñu lĕ Kơnuk kơna ăt prăp lui giong laih djŏp mơta tơlơi, samơ̆ yôm hloh lĕ hơdôm boh tơring dăp glăi, pơmut hrŏm, lăi pơthâo djŏp tơlơi kiăng đah mơ̆ng dưi ngă hơbô̆ bruă gong gai dua gưl gir kơtang biă mă”.

Tui anun, bruă dăp glăi hơdôm anom bruă gưl tơring čar tal anai ƀu kơnong jing hơyak rơbat yôm amăng bruă ngă hơbô̆t anom bruă kơnuk kơna, mă yua klă tơlơi hơmâo đôč ôh mơ̆ ăt pok rai anih đĭ kyar phrâo, pơtrut đĭ yar bơwih ƀong huă - mơnuih mơnam hơdôm boh tơring. Hăng tơlơi prăp rơmet tong ten mơ̆ng Gơnong dlông truh pơ plơi pla, hơmâo tơlơi tŭ ư ha amăng plĕ mơ̆ng djŏp gưl, anom bruă hăng abih bang mơnuih ƀôn sang, bruă pơmut hrŏm, dăp glăi anom bruă gưl tơring čar thun 2025 amra pơjing tơlơi pơplih phrâo kơ lŏn ia, lăp djơ̆ hăng tơlơi kiăng đĭ kyar hơđong kjăp laih anun mut hrŏm dlăm hloh amăng rơwang phrâo./.