Tui hăng ƀing khua pơ ala mơnuih ƀôn sang, bruă čih pơkra hăng mă yua Tơlơi pơtrun pơsit mơ̆ng Khua pơ ala mơnuih ƀôn sang kơ djru prăk hrăm kơ čơđai anet, čơđai sang hră 3 gưl, mơnuih hrăm jơlan hơdră pơtô brơi abih anih 12 ƀơi hơdôm bôh sang hră amăng gơnong bruă pơtô pơhrăm kơnuk kơna lĕ bôh than brơi ƀuh bruă tŭ mă, ngă tui hơdôm Klah čun mơ̆ng Ding jum kơđi čar, Tơlơi pơtrun pơsit mơ̆ng Grŭp mă bruă Ping gah dêh čar ta kơ bruă pơtô pơhrăm, djru pơhlôm hơđong tơlơi hơdip mơda mơnuih mơnam, plai ƀiă tơnap kơ hơdôm bôh sang anô̆ hmâo ană bă glăk dô̆ hrăm ƀơi hơdôm bôh sang hră pơtô čơđai anet truh čơđai 3 gưl. Khă hnun hai, ƀing khua pơ ala ăt dô̆ pơmin mơ̆n kơ tơhnal ngă tui mơ̆ng hơdră bruă gum djru mơ̆ng hră čih pơkra Tơlơi pơtrun pơsit, amăng anun hmâo tơlơi prăk hrăm ngă tui. Khua pơ ala Nguyễn Thị Lan, gah grŭp ƀôn prong Hà Nội gum pơhiăp:

 “Kâo ăt tŭ ư hrom mơn bruă pơpha ngăn drăp kơnuk kơna. Khă hnun hai khom pơsit bruă ngă dưm kơnar ngăn drăp mơ̆ng tơring čar, biă ñu hơdôm bôh tơring čar akă dưi ngă dưm kơnar ngăn drăp lĕ Gong gai dêh čar ăt kiăng hmâo tơlơi him lăng pơ ala glăi pioh pơhlôm prăk mă yua kơ hơdôm tơring čar anai pioh bĕ hơdră bruă klă samơ̆ yua kơ ƀu djop ngăn drăp anun bruă ngă tui amra kaih ƀudah ƀu dưm kơnar.

Khua pơ ala Siu Hương, Grŭp tơring čar Gia Lai gum pơhiăp:

 “Rim anih anom hmâo tơlơi gal phara. Hmâo anih anom dô̆ tơnap, kah hăng Gia Lai ră anai rơbêh kơ 60% lĕ ngăn drăp kơnuk kơna dưm kơnar brơi, yua anun kâo rơkâo khom hmâo tơlơi pơsit rơđah hloh kơ hơdră pơpha prăk mơ̆ng ngăn drăp kơnuk kơna pioh ngă hiưm hơpă hơdră bruă gum djru klă hloh mơ̆ng Ping gah, Kơnuk kơna ta dưi ngă tui klă hloh”.

Mơ̆ng tơlơi găn rơgao mơ̆ng tơring čar hmâo ngă klă laih hơdră bruă djru prăk hrăm kơ čơđai muai, čơđai sang hră mơ̆ng anet truh anih 12, khua pơ ala Trần Chí Cường, grŭp ƀôn prong Đà Nẵng lăi lĕ, hơdră bruă djru khom dưm kơnar, rơđah, tŏng teng:

 “Djru prăk hrăm gah sang hră kơnuk kơna hmâo rơnoh amuñ laih, samơ̆ ră anai tơlơi pơkă rơnoh djru kơ čơđai sang hră dŏng gah rơngiao kơ sang hră kơnuk kơna lĕ rơnoh djru gum yua kơ Khul pơ ala mơnuih ƀôn sang pơsit, tơnap biă kơ bruă djru gum, rơnoh ñu hiưm hơpă ăt lĕ jing sa tơlơi mơn. Kah hăng Đà Nẵng mă yua mơ̆ng ngăn drăp djru kơ ƀing čơđai sang hră gah rơngiao kơ sang hră kơnuk kơna lĕ dưm kơnar hăng rơnoh prăk djru hrăm hră mơ̆ čơđai gah sang hră kơnuk kơna dưi čơkă mă, ƀu hleh hloh. Tui anun, ñu hmâo sa rơnoh hrŏm dưm kơnar kơ bruă pok pơhai”.

Gah hơdră pơsir prăk, khua pơ ala Nguyễn Đại Thắng, grŭp Hưng Yên rơkâo:

 “Amăng tơlơi pơtrun pơsit pơsir prăk ƀơi anăp hăng pô dưi čơkă mă. Tui hăng tơlơi pơmin mơ̆ng kâo tâ̆o hloh kơsem min dưi pơsir ƀơi anăp hluai tui hơdôm bôh sang hră amra lăp djơ̆ hloh, kâo hmâo hơdră pel ĕp, wai lăng pioh lăi pơthâo glăi. Sit ñu khom hmâo hơdră pơkă lăng tui, pel ĕp ƀơi hơdôm bôh anom pơtô pơhrăm hmâo mơnuih čơkă mă anun. Sa lĕ hluai tui kơ sang hră pơtô pơhrăm pioh pơsir prăk ƀơi anăp kơ ƀing čơđai. Dua lĕ amra hlong pơsir ƀơi anih pơhrui prăk hrăm hlao, juăt ñu 10 prăk samơ̆ prăk hrăm dưi hrŏ trun 3 prăk lĕ kơnong kơ nộp 7 prăk”.

Gum pơhiăp kơ Tơlơi pơtrun pơsit pơtô pơhrăm čơđai anet mơ̆ng 3 truh 5 thun, sa dua khua pơ ala pơsit, ƀơi hnưr thun anai, ƀing čơđai nao sang hră biă ñu lĕ čơđai muai ƀơi kual asuek, ataih, kual tơnap tap. Tơdah Tơlơi pơtrun pơsit dưi mă yua amra djru pơhlôm dưm kơnar amăng bruă pơtô pơhrăm mơ̆ng čơđai ƀơi hơdôm kual. Khă amra kiăng tuh pơplai lu hloh mơn kơ anom mă yua, măi mok, nai pơtô... samơ̆ kiăng lăng anai lĕ tơlơi tuh pơplai yôm phăn hloh mơ̆ng tơlơi pơđĭ kyar, jing tơlơi pơtô pơhrăm tañ, tơlơi tuh pơplai bruă bơwih brơi tơlơi ƀong huă pioh pơsit tơlơi brô̆ prong, anô̆ klă mrô mơnuih tơdơi anai. Tui hăng khua pơ ala Phan Văn Mãi, grŭp ƀôn prong Hồ Chí Minh, hrŏm hăng ngăn drăp kơnuk kơna, khom hmâo hơdôm hơdră pơsur pran jua mơnuih mơnam pơplih phrâo bruă anai:

 “Tơlơi lăi nao kơ pơplih phrâo mơnuih mơnam pioh pơđĭ kyar pơtô pơhrăm čơđai anet jing yôm phăn biă, tơdah ƀu hmâo hă amra jing tơnap kơ ngăn drăp. Ƀing ta khom kơsem min hăng hmâo hơdôm hơdră bruă pok pơhư hloh, pơplih tañ hloh pioh pơsur tuh pơplai mơnuih mơnam pơplih phrâo. Bơhmutu ñu ƀing ta hmâo ba tơbiă tơlơi jao lŏn ƀu pơhrui prăk ƀudah pơhrui 0 prăk pioh pơjing hơdôm bôh sang hră pơtô pơhrăm čơđai muai hă lui”./.