Tơdơi kơ sui thun dŏ hơdip amăng sang tơ̆i phŏ, bơyan hơjan ia tơdjoh, angĭn thut mut amăng lăm, sang anŏ ơi Siu Hoàng (djuai anai Jarai) dŏ amăng să Ia Mơ, tơring glông Chư Prông, tơring čar Gia Lai hơmâo sang sir kjăp tui tơlơi čang rơmang. Dŏ amăng sang phrâo yua anom bruă git gai tơhan wai pơgang guai tơring čar Gia Lai man pơdong brơi, ơi Siu Hoàng ol kơdol brơi thâo:

“Hơmâo Ling tơhan wai pơgang guai, kơnuk kơna đing nao man pơdong brơi sang phrâo, sang anŏ gơmơi hok mơ-ak biă mă”.

Mơng prăk gum pơgôp mơng ƀing apăn bruă, ling tơhan hrŏm hăng tơlơi gum tơngan hrŏm mơng ƀing čơmah, anom bruă git gai tơhan wai pơgang guai tơring čar Gia Lai hơmâo man pơdong 10 boh sang djru brơi mơnuih ƀun rin ƀơi kual giăm guai. Rĭm boh sang arăng djru brơi 70 klăk prăk, ling tơhan pơgôp dong čuah pơtâo hăng hrơi mă bruă, pơhlôm man pơdong sang sir kjăp ƀiă.

Đại tá Trần Tiến Hải, khua anom bruă git gai tơhan wai pơgang guai tơring čar Gia Lai brơi thâo, bruă ruh pơkra glăi sang dŏ jang jai, sang tơ̆I phŏ ƀu djơ̆ kơnong djru brơi neh met wa hơmâo sang dŏ sir kjăp, hơđong tơlơi hơdip mơda đôč ôh mơ̆ ăt pơgôp pơjing pran khăp pap ling tơhan mơnuih ƀôn sang jai kjăp phik, gum hrŏm wai pơgang kjăp guai lŏn ia.

“Amăng hơdôm thun rơgao, ƀing gơmơi đing nao biă mă bruă anai, kiăng iâu pơthưr tơlơi gum pơgôp mơng ƀing apăn bruă, ling tơhan hăng ƀing čơmah. Ƀing gơmơi thâo tơlơi glăm ba hăng neh met wa ƀơi kual giăm guai, kiăng pơpŭ pran khăp pap mơng neh met wa hăng tơhan wai pơgang guai”.

Phrâo anai Ding jum ling tơhan ăt hơmâo hră pơ-ar pơsit jao bruă Quân khu 5, Quân đoàn 34, Binh đoàn 15 djru brơi mơnuih ƀôn sang Gia Lai ruh pơkra glăi sang dŏ jang jai, sang tơ̆i phŏ. Hluai tui tơlơi sit nik, hơdôm anom bruă ling tơhan djru man pơdong sang phrâo brơi neh met wa rah, pơkra ming sang dŏ hơđăp, laih dong ngă tui tơlơi pơkă bruă mă hăng pơhlôm rơnuk rơnua. Hơmâo thâo, hlâo kơ hơmâo jơlan hơdră ruh pơkra glăi sang dŏ jang jai, sang tơ̆i rơ̆i đơ đam dêh čar, ling tơhan ăt hơmâo hơdră djru brơi mơnuih ƀôn sang man pơdong sang. Tui lăi pơthâo, 5 thun rơgao, Binh đoàn 15 hăng Quân đoàn 34 hơmâo gum hrŏm hăng gưl Ping gah, gong gai ƀon lan, pel ĕp, man pơdong phrâo, pơkra ming hăng jao rơbêh 1.000 boh sang brơi hơdôm boh sang anŏ ƀun rin amăng tơring čar Gia Lai, Kon Tum.

Phrâo rơgao, jơlan hơdră “Blan tlâo giăm guai” ăt pơphun ƀơi tơring glông giăm guai Đức Cơ, tơring čar Gia Lai, hăng lu bruă mă yôm phăn, amăng anun hơmâo bruă djru ruh pơkra glăi sang dŏ jang jai, sang tơ̆i phŏ. Ayong Đỗ Đức Thanh, kơ-iăng khua khul hlăk ai tơring čar Gia Lai brơi thâo.

“Ƀing gơmơi ăt pơtrut pơsur djru pơkra ming, mut hrŏm bruă pơphun gum tơngan hrŏm ruh pơkra glăi sang dŏ jang jai, sang tơ̆i rơ̆i glăk pok pơhai. Jơlan hơdră thun anai hrŏm hăng bruă gum hrŏm mơng hơdôm anih anom ƀơi ƀôn prong Hồ Chí Minh, ăt hơmâo tŭ mă tơlơi gum hrŏm mơng hơdôm anih anom amăng tơring čar, mơng anun brơi ƀuh, tơlơi đing nao mơng hơdôm khul grup, ƀing mơnuih kiăng gum djru brơi plơi pla, pơjing plơi pla jai hrơi hiam klă”.

Truh ră anai, tơring čar Gia Lai hơmâo man pơdong phrâo hăng pơkra ming rơbêh 2.000 boh sang amăng jơlan hơdră ruh pơkra glăi sang dŏ jang jai, sang tơ̆i rơ̆i. Hăng hơnong pơkă man pơdong rơbêh 8.400 boh sang brơi hơdôm boh sang anŏ amăng jơlan hơdră anai hlâo kơ truh bơyan hơjan thun anai, Gia Lai hơmâo jak iâu gum pơgôp mơng mơnuih mơnam. Amăng anun, sa boh anom bơwih ƀong sĭ mơdrô hơmâo hluai tui keh prăk “Djru brơi mơnuih ƀun rin” tơring čar, djru brơi 10 klai prăk; Ding jum kông ang djru brơi rơbêh 201 klai prăk hăng Jơnum min mơnuih ƀôn sang tơring čar Gia Lai hơmâo kah mă yua 211 klai prăk. Jơnum min mơnuih ƀôn sang hơdôm tơring glông, plơi prong hơmâo jao gum hrŏm hăng Jơnum min djop djuai ania mơnuih mơnam Việt Nam tơring čar tŭ mă hăng pok pơhai gum pơgôp, tañ pơgiong hơnong pơkă ruh pơkra sang dŏ jang jai, sang tơ̆i rơ̆i amăng tơring čar. Kơ-iăng khua Jơnum min mơnuih ƀôn sang tơring čar Gia Lai, yă Nguyễn Thị Thanh Lịch brơi thâo:

“Ƀing gơmơi pơsit pok pơhai ha amăng plĕ, tơnap klă hơƀơi pơsir ƀơi anun. Ƀing gơmơi pơsit tum pơƀut ngăn rơnoh ngă tui jơlan hơdră anai. Tui anun, ngăn rơnoh hơmâo kah pơpha, tơring čar hơmâo jak iâu gum pơgôp mơng ling tơhan, mơnuih ƀôn sang hăng anom bơwih ƀong sĭ mơdrô kiăng gum hrŏm man pơdong sang sir kjăp brơi neh met wa. Tơring čar Gia Lai amra gir run, him lăng amăng blan 6/2026 amra pơgiong bruă ruh pơkra glăi sang dŏ jang jai, sang tơ̆i rơ̆i amăng tơring čar”./.