Abih pran jua atông hơdôm tơlơi adôh brơi kơ tuai čuă ngui, laih dong dar mă video, phĭn rup hơdôm tơlơi ngui gru grua hăng pơƀuh amăng pla mơnuih mơnam, Y Justine Adrơng, dŏ amăng ƀuôn Kmrơng Prong A, să Ea Tu, plơi prong Buôn Ma Thuột, hok mơ-ak biă mă. Ayong Justin brơi thâo:

“Kâo hơmâo pơtô brơi atông čing, anai lĕ bruă phĭn rup, dar mă video kiăng kơ lăi pơthâo čing hơgor, tơlơi anai yôm biă mă brơi kơ kâo pô hăng djop djuai ania ƀơi kual Dap kơdư amăng bruă djă pioh gru grua čing hơgor anai. Hơmâo hơdôm rup rap ƀudah tơlơi črâo ba lơm phĭn rup, dar mă video, hơdôm pok rup, video anai ƀing gơmơi djă pioh glăi hăng pơƀuh brơi kơ abih bang mơnuih”.

Mă yua rup rap kiăng kơ bơră ruai glăi gru grua mơng djuai ania, arăng juăt iâu lĕ Photo Voice, anai lĕ sa amăng hơdôm boh thâo hơmâo anom bruă gru grua, gah Ding jum gru grua, bơrơguăt drơi jăn hăng tuai čuă ngui pok pơhai ƀơi Dak Lak mơng rơnuč thun 2024 hluai tui hơbô̆ bruă pơlir “Gru grua čing hơgor kual Dap kơdư amăng bruă bơwih brơi tuai čuă ngui gru grua Buôn Ma Thuột-Dak Lak”. Hrŏm hăng anun, ƀing kiăo tui hrăm ăt črâo brơi atông čing mơng amuñ truh pơ tơnap, pơplih pơkra hơdôm anŏ juăt ƀuh lơm atông čing, pel ĕp dong sa, dua tơlơi adôh lơm atông čing sô hơđăp mơng djuai ania Êđê…Ơi Y Bây Kbuôr, dŏ amăng ƀuôn Kmrơng Prong A, să EaTu, plơi prong Buôn Ma Thuột brơi thâo:

“Hlâo adoh hơdôm tơlơi adôh atông čing mơng djuai ania Êđê ƀu hơmâo pơtô hrăm tong ten tui tal anai. Mơng anih pơtô hrăm anai, kâo pô ƀuh ƀing hlăk ai hor biă mă hăng hluh rơđah tơlơi yôm mơng čing hơgor kual Dap kơdư, ƀing gơñu gir hrăm hơdôm tơlơi adôh atông čing mơng ơi yă pioh glăi”.

Hơbô̆ bruă pơlir gru grua čing hơgor amăng bruă bơwih brơi tuai čuă ngui lĕ bruă mă dong amăng Akŏ bruă mrô 6, gah jơlan hơdră tui hơnong pơkă dêh čar amăng pơđĭ kyar bơwih ƀong huă, mơnuih mơnam kual mơnuih djuai ania ƀiă hăng čư̆ siăng, rơwang thun 2021-2030. Ƀơi Dak Lak, hơbô̆ bruă hơmâo ngă tui ƀơi hơdôm boh plơi pla amăng să Ea Tu, plơi prong Buôn Ma Thuột.

Tơdơi kơ 1 blan pok pơhai, hơmâo 60 video, rơbêh 100 pok rup yua mơnuih ƀôn sang phĭn, anai lĕ tơlơi bơră ruai pơƀuh hăng rup rap pơdah tơlơi jê̆ giăm. Ơi Lại Đức Đại, kơ-iăng khua gơnong bruă gru grua, bơrơguăt drơi jăn hăng tuai čuă ngui tơring čar Dak Lak brơi thâo, hơbô̆ bruă phrâo hơmâo ngă tui tŭ yua sit nik kơ bruă djă pioh, tŏ tui gru grua atông čing hơgor kual Dap kơdư, anăp nao hơmâo lu mơnuih bơwih brơi tuai čuă ngui amăng plơi pla.

“Tŏ tui tơlơi truh kih mơng hơbô̆ bruă anai, hrŏm hăng tơlơi đing nao mơng anom bruă djă pioh gru grua, mơng Ding jum gru grua, bơrơguăt drơi jăn hăng tuai čuă ngui, amăng thun 2025, gơnong bruă amra git gai hơdôm anom bruă bơdjơ̆ nao, djop ƀôn lan čih anăn tŏ tui hơdôm hơbô̆ bruă ƀơi hơdôm ƀon lan phara amăng tơring čar Dak Lak. Hăng amra gum hrŏm kjăp ƀiă dong, pok pơhai lu hơbô̆ bruă ha amăng plĕ, hơdôm anih pơtô hrăm dưi tŏ tui hrŏm hăng tơlơi mut hrŏm mơng ƀing rơgơi kơhnâo”.

Hrŏm hăng Dak Lak, hơdôm anih pơtop hrăm ăt pơphun ƀơi hơdôm boh tơring čar Gia Lai, Kon Tum hăng Tây Ninh, brơi mơnuih djop djuai ania. Bruă pơtô hrăm yua ƀing rơgơi kơhnâo hơmâo tơlơi găn rơgao hăng đăo gơnang amăng mơnuih mơnam ngă tui, črâo ba tong ten, bruă ngui atông ayun suang. Tui Tiến sĩ Nguyễn Thị Thu Trang, Khua anom bruă wai lăng gru grua gah bơngăt, anom bruă gru grua, lơm hơmâo pơtô hrăm brơi boh thaoa, mơnuih ƀon sang amra hơmâo tơlơi găn rơgao amăng bruă mă yua boh thâo kiăng ngă gêh gal tơlơi bơwih ƀong huă, pơđĭ kyar mơnuih mơnam, djă pioh gru grua.

“Bruă pơlir hơbit kơplah wah djop ƀôn lan hơmâo gru grua gah bơngăt bơkơnar, hơmâo tô nao rai djop rơnuk amăng sa boh kual hăng ƀing gơmơi črâo brơi mơnuih mơnam kơ bruă Photo Voice lĕ ană plơi pla dưi lăi pơthâo mă pô, bơră ruai kơtuai akhan gru grua mơng ƀing gơñu. Yôm hloh lĕ, mơnuih djuai ania Êđê amra bơră ruai glăi hơdôm tơlơi ƀing gơñu hor hloh, tơlơi bơră ruai mơ-ak hloh, sit nik, djop mơta, kah hăng thâo hluh rơđah gru grua mơng djuai ania gơñu, tŏ tui djă pioh gru grua mơng djuai ania pô”.

Ƀu djơ̆ kơnong hrưn đĭ tơlơi pơmĭn djă pioh hăng tŏ tui gru grua atông čing hơgor Dap kơdư-gru grua gah bơngăt mơng ană mơnuih, bruă pơlir gru grua amăng bơwih brơi tuai čuă ngui ăt pơgôp pơjing rai pran kơtang amăng gru grua čing hơgor amăng tơlơi hơdip pơhrâo. Tŭ mă tơlơi gal mơng boh thâo ia rơgơi hăng plang mơnuih mơnam, rĭm čô mơnuih dưi tum pơƀut, pơlir hơbit hăng pơjing rai hră pơ-ar čih pioh sit nik kơ tơlơi hơdip mơng mơnuih mơnam, mơng anun pơgôp ngă klă ƀiă dong amăng bruă djă pioh gru grua hiam klă mơng rĭm djuai ania./.