Thun anai, mah ñu rơbêh 70 thun laih, tha plơi K’Keo lêng kơ nao hlâo ngă gru amăng djŏp bruă mă, “pơhiăp nao hrŏm hăng ngă”. Kơ bruă đĭ kyar bơwih ƀong sang anŏ, sang anŏ tha plơi hơmâo 2ha đang kơphê, rim thun pơhrui hơmâo rơbêh 8 tơn, 8 sao pơdai ngă dua bơyan, rim thun hơmâo 8 tơn pơdai. Rơngiao kơ anun, sang anŏ tha plơi pla plah djuai ania pơkŏn dong amăng đang kơphê kah hăng sầu riêng, mắc ca, ƀơr, boh mit...Yua hnun mơn sang anŏ ơi K’Keo ƀu kơnong hơmâo gơnam ƀong gơnam djă pioh lui đôč ôh mơ̆ ăt djru ba mơnuih ƀôn sang amăng plơi dong. Ñu brơi thâo:“Hlâo adih neh met wa aka ƀu thâo mă yua boh thâo ia rơgơi phrâo amăng bruă ngă hmua, ngă pơdai, pla kơphê aka ƀu thâo pruai kmơk, wai lăng. Sang anŏ kâo ngă blung a, lơ̆m pô kâo, sang anŏ ngă tŭ yua lĕ ană plơi ñu lăng hăng hla tui, mơ̆ng bruă ta hơmâo ngă, kâo lêng pơtô glăi kơ neh met wa, čang rơmang neh met wa ăt dưi ngă tui hăng kâo mơn”.

Plơi Hàng Làng hơmâo 384 boh sang anŏ (djuai ania K’ho yơh lu biă mă), ră anai dŏ glăi 4 boh sang đôč rin. Tơlơi hơdip jai hrơi đĭ đăi, mơnuih ƀôn sang jai hrơi hơmâo pran jua hloh mơn. Yă Ka’Lèm, dŏ ƀơi să Di Linh brơi thâo, yua hơmâo tơlơi gum pơgôp mơ̆ng tha plơi K’Keo, plơi Hàng Làng hơmâo lu tơlơi pơplih tŭ yua:“Tha plơi K’Keo jing mơnuih ană plơi kơnang, ană plơi hmư̆ tui biă amăng bruă đĭ kyar bơwih ƀong huă mơnuih mơnam, djă pioh gru grua hiam mơ̆ng djuai ania. Ñu hur har pran jua amăng bruă pôr pơthâo jơlan hơdră mơ̆ng Ping gah, tơlơi phiăn Kơnuk kơna hăng neh met wa, pơtô brơi neh met bơwih ƀong tŭ yua, iâu pơthưr ană plơi thâo gum pơgôp, hơdip rơnôm kiăng pơhlôm rơnuk rơnu amăng plơi pla”.

Tui hăng tơlơi iâu pơthưr mơ̆ng tha plơi K’Keo, lu sang anŏ lui hĭ laih tơlơi phiăn ƀu hiam mơ̆ng đưm, gum hrŏm akŏ pơdong tơlơi hơdip phrâo, mơ-ak, pơplih hloh. Ñu lăi:“Hrŏm hăng ƀing tha plơi, mơnuih ană plơi kơnang, tha plơi lêng kơ pơtă pơtăn sang anŏ kơnung djuai, iâu pơthưr ană tơčô hrăm tui tơlơi klă hiam, tơlơi phrâo či đĭ kyar ƀu dưi ngă bruă soh sat, răm ƀăm ôh. Kâo dŏ añrăng lĕ kâo dŏ ngă, djru hrŏm hăng Ping gah, Kơnuk kơna, hrŏm hăng ană plơi pơtă pơtăn ană tơčô ngă hiư̆m pă či pơđĭ kyar bơwih ƀong sang anŏ, djă pioh gru grua boh thâo đưm, plơi pla rơnuk rơnua hơđong kjăp, ha pran kiăo tui Ping gah, Kơnuk kơna”.

Tha plơi K’Keo ăt jing mơnuih thâo hluh dlăm biă kơ gru grua hiam mơ̆ng djuai ania K’ho. Amăng djŏp bruă mă ƀơi kual mơnuih ƀôn sang djuai ƀiă Lâm Đồng, ñu lêng kơ ba grup mơnuih rơgơi kơhnâo nao jơnum hrŏm hăng hơmâo mă lu pri yôm. Pô ñu tha plơi K’Keo hơmâo pơtô 5 anih atông čing kơ ƀing čơđai hăng hlăk ai amăng plơi.

Ơi Phạm Văn Linh, khua hơđăp să Gung Ré, ră anai lĕ să Di Linh, tơring čar Lâm Đồng brơi thâo, tha plơi K’Keo hơmâo djru prong biă amăng bruă akŏ pơdong tơlơi hơdip phrâo amăng kual mơnuih ƀôn sang djuai ƀiă amăng plơi:“Ñu jing mơnuih rơgơi mơbruă, dưi pơhiăp hăng iâu pơthưr neh met wa amăng bruă Ping gah hăng Kơnuk kơna či pôr pơthâo pơtô lăi neh neh met wa kah hăng lŏm lui tơlơi phiăn ƀu hiam, ƀu djơ̆ dong tah amăng tơlơi hơdip ƀudah pơtrut tui gru grua boh thâo hiam mơ̆ng djuai ania K’ho...Tha plơi K’Keo ngă klă biă bruă anai”./.