Bur kơtor lĕ gơnam juăt ƀong mơng mơnuih ƀôn sang, anai lĕ gơnam ƀong riă hơte mơng pran hơdip hăng pran khăp amăng mă bruă mơng djuai anai K’ho. Kiăng hơmâo hơdôm asar kơtor jơman, neh met wa kiăng ruah pơjeh kơtor ƀlĭu, rơmuăn ƀudah kơtor pơdjuai tui hơđăp, hơmâo arăng wai pơgang amăng ha bơyan. Yă K’Bri dŏ ƀơi să Đinh Văn Lâm Hà, tơring čar Lâm Đồng brơi thâo:

“Lơm kơtor tha laih, ƀing gơmơi nao wok ba glăi, amu krô ƀơi pra ƀudah amu ƀơi lan sang, tơdơi anun pleh mă asar, ba nao uă laih anun ƀing gơmơi amra hơmâo tơpung kơtor jơman”.

Hơdôm asar kơtor tơdơi kơ uă mơ̆ huăi săn pluk kar hăng tơpung arăng pơkra mă ôh, mơ̆ ăt pơsăn samơ̆ ăt dŏ gal asar mơ̆n, jing arăng iâu lĕ “braih kơtor”. Braih kơtor ăt djă pioh glăi asar gră, huăi klok hĭ hơduh hơđăp, yua anun mơ̆ lơm riă tơnă, ƀu djơ̆ kơnong rơmuăn đôč ôh mơ̆ ăt ngă ƀâo hiam phara mơng asar kơtor dong. Bruă riă hơte bur kơtor mơng “braih kơtor” ăt rơkâo tong ten mơn. Kiăng kơtor tañ tơsă hăng lik, mơnuih djuai ania K’ho juăt trăm amăng ia sui hơdôm mông, klă hloh lĕ trăm amăng ha mlăm. Tơdơi kơ trăm giong, braih arăng peč brơi rơgoh laih anun dưm amăng gô̆, riă amăng apui amăng hơdôm mông mơtăm. Lơm riă bur, kiăng kuar nao kuar rai kiăng bur tơsă hiam hăng huăi khiă ƀơi tlôn gô̆. Ayong Ha Zu Na, dŏ ƀơi să Đinh Văn Lâm Hà, tơring čar Lâm Đồng brơi thâo:

“Bur kơtor riă ăt amuñ amĕ đôc, ƀing gơmơi ƀu yua braih, ƀu riă wŏt hăng tơlang mơnong ôh. Kơtor arăng uă giong dưm amăng gô̆, peč brơi rơgoh hăng tuh pơhrua nao ia dong, riă amăng apui djuh truh bur tơsă wuyt, asar kơtor lik ƀơƀul. Mơnuih djuai ania K’ho hor ƀong tui anun, yua amra djă pioh ia ƀâo hiam mơng asar kơtor”.

Bur kơtor ƀong hrŏm hăng akan krô tul săn, akan tuk, akan om laih dong añăm hla rơk mơng glai arăng uh ƀudah hơnia, tut hrŏm pơhăng hra. Hơdôm añăm hla rơk anai ƀong hrŏm hăng bur jơman biă mă, jing gơnam ƀong yôm phara mơng glai rưng. Amai K’Huyền, dŏ ƀơi să Đinh Văn Lâm Hà, tơring čar Lâm Đồng brơi thâo: Hơdôm añăm hla rơk tut hrŏm pơhăng hra ƀu djơ̆ kơnong ngă ƀăt tui đôč ôh ăt pơƀuh anŏ phara mơng añăm ƀong djuai ania K’ho dong.

“Lơm ƀong bur kơtor anai, anŏ mưn pioh glăi blung a lĕ mơmih mơng asar kơtor. Bur kuar wuyt, asar kơtor lik ƀơƀul hăng mơmah jơman. Sit biă ñu, arăng ƀu hơmâo tă nao tơlang mơnong amăng gô̆ lơm riă bur samơ̆ ƀong ăt mơmih yua mơng asar kơtor”.

Bur kơtor anai ƀu djơ̆ kơnong pơdah tơlơi hơdip jê̆ giăm rĭm hrơi đôč ôh mơ̆ ăt pơdah tong ten tơlơi thâo thăi, hluai tui tơlơi hơdip sit nik mơng djuai ania K’ho “hơmâo hơget ƀong anun”, tŭ mă hơdôm anŏ lŏn mơnai glai rưng pơjing brơi. Bur juăt ƀong tơdơi kơ hrơi mông mă bruă glêh glar, ngă trơi hlung, añrăng drơi jăn hăng ngă djôl amăng pran jua dong, kar hăng gơnam pơyơr yôm phăn mơng lŏn mơnai glai čư tơdơi hrơi mông mă bruă glêh glar.

Amăng tơlơi hơdip dik dak pơplih phrâo ră anai, lơm hơdôm gơnam ƀong phrâo hơmâo lu tui amăng plơi pla, “bur kơtor” gơnam ƀong mơng djuai ania K’ho ăt dŏ djă pioh anŏ yôm phara amăng pran jua djop rơnuk. Amăng rĭm dơlŭ bur kơtor, ƀu djơ̆ kơnong hơmâo ia mơmih mơng asar kơtor, ia măt jơman mơng hra đôč ôh mơ̆ ăt wŏt ia ƀâo mơnâo pioh glăi mơng đưm hlâo. Bur kơtor ƀu djơ̆ kơnong ngă añrăng drơi jăn tơdơi kơ ha hrơi mă bruă glêh glar pơ đang hmua đôč ôh ăt ngă ană mơnuih hơdor glăi plơi pla, hơdor glăi apur tơnă hơbai, hơdor glăi rup rap ƀing amĭ, ƀing yă kiăng khăp ƀu-eng./..