Amăng mông mă bruă, ơi Đào Mỹ, Kơ-iăng Khua Jơnum min mơnuih ƀôn sang tơring čar Dak Lak lăi rơđah, lơm hơđong pơphun bruă, gơnong bruă khom đing nao črâo ba pioh ngă giong jơlan hơdră pơtrut pơsir tuai čuă ngui mơ̆ng tơring čar. Khom yap nao lăp djơ̆, khom dưm kơnar ngăn drap, jơlan hơdră, tŭ mă tơhnal gal pioh mă yua hơdôm tơhnal gal, pran kơtang kơplah wah 2 kual Ngŏ – Yŭ Dak Lak. Rơngiao kơ pơphun hơdôm bruă jơnum lĕ khom ngă phrâo, pơjing gơnam anih anom tuai čuă lăng phrâo pioh pơhưč pran jua tuai čuă ngui.

Tlam lơ 10/7, Jơnum min mơnuih ƀôn sang tơring čar Lâm Đông hơmâo mông mă bruă hăng gơnong bruă gru grua, bơrơguăt drơi jăn hăng tuai čuă ngui kơ bruă mă sit nik, pok pơhai bruă jao tơdơi kơ pơmut hrŏm. Bruă pơlir 3 anôm bruă phun Đà Lạt-Phan Thiết-Gia Nghĩa kiăng pơtrut bơwih brơi tuai čuă ngui pơđĭ kyar hơmâo ba tơbiă. Amăng mông mă bruă, ơi Hồ Văn Mười, Khua Jơnum min mơnuih ƀôn sang tơring čar Lâm Đồng lăi pơtong, Lâm Đồng hơmâo tơlơi dưi prong kiăng pơđĭ kyar gru grua, bơrơguăt drơi jăn hăng tuai čuă ngui. Amăng anun Đà Lạt arăng iâu lĕ “Lâm Đồng hơdôm rơbâo djuai bơnga”, Bình Thuận arăng iâu lĕ “Lâm Đồng ia rơsĭ mơtah”, Dak Nông arăng iâu lĕ “Lâm Đồng čư̆ siăng”. Djop tơlơi gal, tơlơi dưi prong anai kiăng pơlir bơkơnar, lăp djơ̆ hăng ha amăng plĕ, anun gơnong bruă tuai čuă ngui amăng tơring čar phrâo kah dưi pơđĭ kyar kơtang hăng hơđong kjăp.