Sa mơguah adai ăt dŏ mơmŏt bơbrui, kơthul gôm, plơi Kon Wang, să Tân Tiến tơring glông Krông Pač hơđăp, tơring čar Dak Lak, lăng hyu jum dar lŏn mơnai glai ia, rơnang blang, mơak mơai tơblŭk kơthul mut tơma hăng asăp sang tia tơƀeñ mơ̆ng ƀing mơnuih tha rơma. Rơgao 80 thun laih ơi A Lih ăt greh gruñ hăng  bruă mă tia wăng tơgă ƀơi anih hơdui dai apui hơdăng hơhur, jua taih, jua tia tơƀeñ phik phik hmư̆ kơ-uă amăng tơngia hăng jơlah apui čir čir čom pơsơi ngur tơbiă asar apui.

Mah thun lu, pô tha rơma baih, mơta ñu ơi A Lih ăt dŏ bơngač rơđah đôč, plă tơngan pơtông, khăng samơ̆ kơjăp kah hăng mơta thong dao, đao jông ñu tia rai mơ̆n, hơdôm mơta wăng, kuôk ñu tơƀeñ hơdôm hơpluh thun rơgao, djop mơnuih amăng plơi blơi yua. Ană plơi pla juăt lăi : “Kơnong hmư̆ jua tơmut ơi A Lih, A Hluh tơ-ua rai thâo yơh amra hơmâo thong dao, tơgă, jông wăng kuôk phrâo pioh ngă hmua pla pơjing či truh”. Samơ̆, kiăng dŏ djă pioh na nao a apui jă kơ bruă tia tơƀeñ, rơnuk anai ƀu amuñ ôh. Ơi A Lih lăi:

“Đưm hlâo, ĕp dŏ hơmâo eh pơsơi ƀơi ter hang ia ania. Ră anai hơgĕt mơƀuh dơ̆ng. Kiăng tia tơƀeñ lĕ khom nao blơi pơsơi pơsă gah rơngiao, nua pơmă soh. Sa per thong, dao, wăng kuôk či tia rai khom abih sa wơ̆t hrơi tơjuh kah mơ̆ng giong, mông anun ƀu hơmâo mông nao bruă pưk hmua dơ̆ng tah. Samơ̆ yua khăp kơ bruă mă, ƀu thâo lui dơ̆ng tah!”.

Rim hrơi, mơnuih ƀôn sang amăng plơi djă ba nao wăng, kuôk, tơgă, pioh tơƀeñ glăi, čruih mơta thong dao kiăng ƀong, mơnuih ƀôn sang ƀu hơmâo prăk blơi, apah, kơnong pơblih hăng ană mơnŭ, braih akuăi, kơtor, rơtă rơbai; đơ đa hơmâo pơsơi duñ mă drung ñip rơdêh sô ba nao brơi gơñu tia pơjing rai thong, dao tơgă, ƀudah wăng kuôk, djop mơta gơnam ƀing gơñu ba tia tơƀeñ kơjăp hăng hiam klă biă mă. Yă La Ghi, djuai ania Hơdang dŏ ƀơi plơi Kon Wang, ol kơdol pran jua lăi:

“Sang anŏ gơmơi ăt juăt ba ană bui, mơnŭ pơblih mă thong sao, wăng tơgă. Wăng tơgă, ơi A Lih tia kơjăp hăng ƀong biă mă. Tơdah ƀah, ƀơñ thâo,ba glăi gơñu tơƀeñ glăi, čruih mơta dưi mă yua hrup phrâo dơ̆ng mơ̆n. Kâo čang rơmang ñu dŏ găng añrăng hiam drơi jăn na nao, laih anun yom hloh kiăng pơtô glăi ană tơčô ƀing gơmơi, kiăng kơ bruă tia tơƀeñ huăi rơngiă hĭ...”.

Ƀơi plơi Kon Wang, bruă tia tơƀeñ ƀu kơnong sa bruă mă ĕp ƀong huă đôč ôh, dŏ jing bruă ngă kah hăng bơngăt jua amăng mơnuih ƀôn sang. Jua tơmut, jia taih, čom, tia tơƀeñ pơsơi, kiăng ƀư̆ pơkra, čruih pơjing pran jua, bluh nao bơngăt jua anŏ kiăng djă pioh gơnam yua mă bruă ngă hmua pơdai. Anun lĕ ƀu kơnong kơ bruă mă đôč ôh, dŏ jing anih djă pioh gơnam phun kơ bruă tia tơƀeñ, djă pioh rơnoh yom kơ bruă pơtô glăi tơlơi thâo amăng bruă mă, dŏ jing anih anom, plơi pla hơdor pioh na nao kơ bruă tia tơƀeñ mơ̆ng jua mơñi taih, čom, tia hăng tơmut, hăng anŏ đăl pioh tia, hăng hơdai hơdui čuh hơdăng apui a kiăng ngă ngur pơsơi čruih mơta thong dao, đao tơbăk mơ̆ng đưm đă, sa bruă ngă lu črăn, lu pran jua sah pơjing mơta thong, tơdŭ đao kiăng ƀong laih anun sa tơlơi pơ-ư ang prong mơ̆ng djuai ania Hơdang. Ơi A Lih ră ruai dơ̆ng:

“Amăng plơi ta ră anai kơnong hơmâo dua klâo čô đôc thâo tia, tơƀeñ kah hăng ơi Mêp, ơi Hluh, ơi Roi Pôa Hlak plơi thôn 5. Mơnuih ƀôn sang dŏ kiăng mơ̆n thong sao, đao ƀong, wăng kuôk, tơgă jông ngă hmua pla pơjing....Gơnam yua mă bruă arăng sĭ amăng sang čơ lu yơh, hiam mơ̆n samơ̆ jik rơ̆k, klơi lŏn ƀu hrup wăng ta tia mă ta pô ôh. Thong dao, wăng kuôk, tơgă jông ta tia pơjing man ƀrô hăng tơngan ta djă, juăt yua. Anun lĕ bơngăt jua, anŏ hiam rơgơi amăng bruă tia tơƀeñ!".

Amai La Ghon, djuai ania Sedang ƀơi plơi Ea Mao, sa čô tuai juăt blơi gơnam tia tơƀeñ ñu lăi:

“Thong tia pơ anai djă man ƀrô, thong čơkiă ƀong biă mă. Thong blơi pơ sang čơ hă, yua mă hơdôm hrơi hơ̆l yơh, sit sah anai ƀah jai. Kâo đăo kơnang biă mă hăng pơpŭ gơnam tia tơƀeñ mơ̆ng ƀing tia amăng plơi ta pô pơjing...".

Bruă tia tơƀeñ mơ̆ng gru grua đưm sa tơlơi lăp pơ-ư ang lu rơnuk truh ră anai mơ̆ng djuai ania Sedang. Mah tơlơi hơdip mơda rơnuk anai pơblih laih, hơmâo lu mơta gơnam yua klă hloh pioh mă bruă, samơ̆ djuai ania Sedang ăt tong ten hăng gơnam yua tia tơƀeñ mă pô ƀơi plơi Kon Wang, să Tân Tiến, tơring čar Dak Lak tia pơkra ming mă hăng tơngan pran jua ană mơnuih.

Lơ̆m hmư̆ jua tơmut tia kah hăng jua tơ-ua amăng glai klô čư̆ čan amăng plơi Kon Wang, sit a apui jă mriah hur, čuh jă pơsơi apui ngur sa tơlơi đăo kơnang bruă gru grua djuai ania Sedang ăt dŏ jă na nao, bang rơđah tong ten kơjăp phik kah hăng apui a amăng pran jua ƀing mơnuih kơhnăk tia tơƀeñ, gơñu kret kruai mă bruă samơ̆ lăp pơ-ư ang djă pioh a apui jă na nao bruă mă đưm mơ̆ng djuai ania pô.