Sit biă ñu, tơring čar hơmâo čơkă 123.500 čô tuai amăng lŏn ia hăng rơbêh 1.500 čô tuai mơng tač rơngiao, mrô tuai čuă ngui đĭ rơbêh 8% pơhmu hăng thun hlâo. Sang jưh tuai pơhlôm brơi anih dŏ glăi giăm 75%. Ƀơi sa, dua sang jưh tuai amăng plơi prong Buôn Ma Thuột hăng hơdôm boh homestay ter ia krông, anih dŏ glăi hơmâo mă yua 90%. Abih tih prăk pơhrui mơng bruă bơwih brơi tuai čuă ngui amăng tơring čar Dak Lak ƀrô tal anai truh pơ 62 klai 500 klăk prăk.

Tui yă Nguyễn Thụy Phương Hiếu, kơ-iăng khua gơnong bruă gru grua, bơrơguăt drơi jăn hăng tuai čuă ngui tơring čar Dak Lak, tơring čar hơmâo lu tơlơi gal kiăng pơđĭ kyar bơwih brơi tuai čuă ngui giăm đang glai, ia krông, dưi pel ĕp gru grua, čuă ngui amăng plơi pla pơlir hăng bruă ngă hmua. Ƀrô hrơi pơdơi ngă lơphet amăng bơyan không phang pơ-iă hang anai, bruă bơwih brơi tuai čuă ngui tui anai hơmâo lu mơnuih ruah.

Hrơi pơdơi lơ 30/4 hăng 1/5 thun anai, plơi prong Đà Lạt, tơring čar Lâm Đồng pơhưč rơbêh 170.000 wơ̆t čô tuai, đĭ giăm 42% pơhmu hăng thun hlâo. Mơ̆ng bruă sem lăng, anih đih pơdơi mơ̆ng hơdôm boh sang jưh tuai mơ̆ng 1 truh 5 asar pơtŭ hơmâo năng ai 80%, hơdôm anih đih pơdơi pơkŏn ăt hơmâo rơnoh 75%.

Hrŏm hăng bruă pơhrup hiam plơi prong, pơđĭ tui anŏ klă bơwih brơi tuai rơnguai, hrơi pơdơi thun anai ƀơi plơi prong Đà Lạt hơmâo lu bruă jơnum ngui gru grua, adoh suang, ngă pơhưč hăng djơ̆ pran tuai nao ngui, pơdơi pơdă. Amăng mrô 170.000 wơ̆t čô tuai nao ngui, pơdơi pơdă pơ Đà Lạt amăng hrơi pơdơi anai, hơmâo 162.800 wơ̆t čô tuai amăng dêh čar ta. Mah tuai mơ̆ng čar rơngiao ƀiă đôč, kơnong kơ hơmâo 7.200 čô đôč, samơ̆ ăt đĭ 60% pơhmu hăng tơđar thun hlâo.