VOV4.Jarai- Ama\ng thun blan laih rơgao, hơmâo sa dua neh met wa djuai ania [ia\ [ơi să Đạ Long, tơring glông Đam Rông, tơring ]ar Lâm Đồng, hơmâo bơrơxoa mă lon glai, ngă hơmua pơdai, pla kyâo boh troh ama\ng đang dlai lon ia Bi-đup Núi Bà, ba rai tơlơi pơgun pơgan, hu^ rơhyưt, ngă răm lon dlai adai rơhuông [ơi anai.

{ơi ana\p kơ tơlơi anun, Kông ang tơring glông Đam Rông, tơring ]ar Lâm Đồng, hơmâo hur har ngă hro\m ha\ng go\ng gai plơi pla hyu pơtô pơblang, iâu pơthưr neh met wa wơt glăi plơi pla, mă bruă hđong tơlơi hd^p mơda.

Tui ha\ng kông ang tơring glông Đam Rông, kơnong yap mă ama\ng tar [ar să Đạ Long, hơmâo [ia\ hloh 100 boh ako\ bung sang lui raih plơi pla, nao do\ ama\ng dlai klô đang glai Bi-đup Núi Bà, tơring glông Lạc Dương, pơdơng anih gah, hyu phă dlai klô, bơrơxoa mă lon dlai, jing h^ anih ano\m ngă hơmua pla pơdai.

Tơlơi anai ba rai lu tơlơi dleh tơnăp brơi bruă wai la\ng dlai klô ama\ng kual. {ơi ana\p kơ tơlơi anai, kông ang tơring glông Đam Rông ngă hro\m ha\ng go\ng gai plơi pla, djo\p gơnong bruă, abih băng khul grup, pơtrut ktang bruă hyu pơtô pơblang, iâu pơthưr neh met wa wơt glăi pơ\ plơi pla pô hđăp. Ơi Ha Neh, khua g^t gai kông ang să Dạ Long, tơring glông Đam Rông lăi tui anai:

“ Ta gơnang mơng hơdôm mơnuih hrăm hră anih pơ prong, iâu glăi le\ sang ano\, kơnung djuai kơ hdôm mơnuih anun, boh nik `u kơ hơdôm mơnuih ara\ng pơ pu\ hmư\ tui, jing sang ano\ gơ`u hyu pơtô, iâu pơthưr. Rơgao mơng tơlơi iâu pơthưr anai, boh tơhnal lu boh sang ano\ wơt glăi pơ\ plơi pla laih, tơdơi kơ anun kâo pơ ]râo brơi gong gai plơi pla, kiăng kơ hdôm sang ano\ anai ]ih hră [ua\n, huăi ngă soh glăi bơrơxoa lon dlai”.

Tơlơi ngă kah ha\ng anun, hơdôm tha plơi, khua plơi, mơnuih ara\ng hmư\ tui ama\ng plơi pla, hro\m hb^t hăng gong gai plơi pla, phung khua mua, gah bruă kđi ]ar [ơi plơi pla ala [ôn, laih anun khul tơhan kông ang ngă tui hơmâo tu\ yua, gah bruă hyu pơtô pơblang, iâu pơthưr mơnuih [ôn sang ngă tui hiam, jơlan hdră, tơlơi phiăn kơnuk kơna.

Tui hăng khua pơtô tơlơi đăo phrâo hiam, ơi Ha Bông, [ơi să Đạ Long, tơring glông Đam Rông lăi, boh tơhnal anai [u djơ\\ hjan gum gôp brơi tơlơi hd^p mơda mơnuih [ôn sang djuai ania [ia\ [ơi anai đô] ôh, wơt ha\ng hơ ^n brơi tơlơi rơnuk rơnua mơnuih mơnam [ơi plơi pla. Khua pơtô tơlơi đăo phrâo hiam, ơi Ha Bông lăi tui anai:

“ Sui mơng hlâo laih, kơnuk kơna tuh pơ alin brơi lu tơlơi hd^p mơda neh met wa ta laih, ră anai kiăng nao hduah anih do\ pơ\ kon dơng, [u dưi ôh. Neh met wa [ing gơmơi bơni kơ ping gah, kơnuk kơna hơmâo gleng, djru ba lu lin, tuh pơ alin brơi pưk sang đang jơlan, apui lơtrik, sang hră hrăm, sang ia jrao tum, djo\p ama\ng thun blan laih rơgao.

Hlăk anun le\, neh met wa [ing ta hơmâo tơlơi pơmin lui h^ plơi pla hđăp, nao do\ ama\ng dlai klô, [u hơmâo hget get ôh hiư\m dưi hd^p mơda le\. Ta pơblang brơi gơ`u hiư\m anun tư\ ngă tơnăp mă pô đô]”.

Ăt tui hăng khua pơtô tơlơi đăo phrâo hiam, ơi Ha Bông lăi, găn gao tơlơi ngă hro\m ha\ng kơnuk kơna, boh nik `u ha\ng kông ang tơring glông Đam Rông hăng tha plơi, khua plơi, hơdôm mơnuih ara\ng hmư\ tui ama\ng plơi pla, pơtrut ktăng tơlơi hyu pơtô hăng tơlơi pơhiăp rơnang rơne\, pơblang brơi  neh met wa djuai ania [ia\ [ơi anai thâo hluh rơđah, ana\m lui raih ôh plơi pla hđăp, đuăi nao do\ ama\ng dlai klô tă tăn, ngă soh glăi h^ tơlơi phiăn juăt kơnuk kơna.

Hasa ama\ng hơdôm mơnuih hyu do\ ]a ]ot ama\ng dlai klô, pơdơng anih gah, hd^p mda bơrơxoa mă lon glai, ngă hơmua pla pơdai, ră anai, ơi Liêng Hót Ha Sưng, [ơi să Đạ Tông, tơring glông Đam Rông thâo hluh laih tơlơi phiăn kơnuk kơna, thâo hluh hdră pơgăng wai lăng dlai klô.

Yua kơ anun yơh, ră anai `u ha\ng lu mơnuih [ơi anai nao tư\ mă tơlơi jao wai lăng dlai kyâo, lăng anai le\, pơhrui glăi prăk kak ama\ng sang ano\ pô. Ơi Liêng Hót Ha Sưng brơi thâo tui anai:

“ Tơdah hlơi anun nao ]uh h^ dlai klô, ba rai apui [o\ng glai, tơlơi phiăn amra phat kđi kơ `u yơh. Kâo juăt pơtô na nao , iâu pơthưr na nao neh met wa kah hăng anun.

Kiăng neh met wa pơgăng wai lăng dlai klô, wai lăng glai klô yơh ta mă hơmâo ia yua, ayuh hyiăng mă hđong kơ jăp. Kia\ng lăi, wơt hăng hlô glai, ]ư\ siăng glai klô ta kho\m pơgăng wai lăng `u”.

Bơ kơ yă Liêng Hót Ka Rưng, [ơi să Đạ Long brơi thâo, tơdơi wơt glăi pơ\ plơi pla hđăp, gơnang  kơ go\ng gai plơi pla, ngă tui djru brơi nua prăk blơi djuai pơjeh pla, hlô mơnong rông, pơtô brơi tơlơi mă bruă ngă hơmua, tui anun yơh sang ano\ [rư\ hđong tơlơi hd^p mda. Yă Liêng Hót Ka Rưng lăi tui anai:

“ Sang ano\ kâo pơmin lăng ping gah, kơnuk kơna brơi abih băng mơnuih nao hd^p mơda ama\ng dlai klô. Tơdơi kông ang tơring glông ha\ng tha plơi nao iâu pơthưr, pơblang brơi djơ\ ha\ng [u djơ\, kâo ha\ng sang ano\ wơt glăi pơ\ plơi pla, laih anun hđong ngă hơmua pla pơdai, hd^p [ơi plơi pla pô”.

Tui ha\ng kông ang tơring glông Đam Rông lăi, gơnang kơ tơlơi ngă hro\m hur har ha\ng tha plơi, khua plơi, laih anun hơdôm mơnuih ara\ng hmư\ tui ama\ng plơi pla, lu neh met wa hmư\ wơt glăi pơ\ plơi pla hđăp, gir run mă bruă hđong tơlơi hd^p mda.

Yua kơ anun yơh, mơnuih [ôn sang nao do\ pơ\ plơi pla [ơi glai klô hro\ tui laih, pơkă ha\ng hlâo adih.

Lăi kơ tơlơi ngă hro\m hb^t anai, thượng tá Lê Văn Trúc, kơ iăng khua kông ang tơring glông Đam Rông, brơi thâo tui anai:

“ Djơh hăng tha plơi, mơnuih hmư\ hing ara\ng hmư\ tui, bruă ngă gơ`u yôm pơ phăn bia\ mă.

Gơ`u thâo hluh tui ha\ng anai, kho\m gir a` nao pơtô pơblang, iâu pơthưr gơ`u, jing tơlơi gơgrong ba, djru brơi khul kông ang nao iâu glăi, hơdôm sang ano\ do\ ama\ng dlai klô wơt glăi pơ\ plơi pla hđăp, kiăng hđong tơlơi hd^p mơda”.

Đam Rông le\ sa boh tơring glông [un rin hin tơnăp hloh ama\ng dêh ]ar ta, mrô mơnuih [ôn sang [ơi anai lu bia\ mă hơmâo truh 70%.

Thun blan laih rơgao, tơlơi thâo hluh ngă tui hiam tơlơi phiăn pơgăng wai lăng glai klô, [ơi anai hiam hloh kơ hlâo adih laih.

Hơmâo boh tơhnal kah hăng anai, yua kơ tơlơi ngă hro\m hyu pơtô pơblang, iâu pơthưr mơng kông ang ha\ng go\ng gai plơi pla, ama\ng anun hơmâo tơlơi gum gôp prong mơng hdôm tha plơi, hơdôm mơnuih hmư\ hing, ara\ng pơ pu\ hmư\ tui, mơng abih băng plơi pla.

Rơluch Xuân: Pô ]ih ha\ng pôr